小動物有時啲動作同行為都係好奇怪，好似呢隻黑貓仔ちょび君咁……其實同屋仲有另一隻白茶貓女モモ，兩隻都係差唔多……咁可愛啦。

記唔記得之前日本東京新宿駅東口個巨型屏幕，咪係立體貓貓嘅？啱啱有新嘢，唔係貓，係宇宙大王菲利！其實賣緊嘅係電話遊戲《Dragon Ball Z Dokkan Battle》。

今朝有冇起身睇？如果未睇的話，呢度嚟個新消息大集合，首先，《BAYONETTA 3》將會喺2022年發售，希望堅啦。仲有《Monster Hunter Rise Sunbreak》呢隻強化版2022年夏季發售，星之卡比有新作《星のカービィ ディスカバリー》2022年春發售，《Mario Party Superstars》就10月29日發售，《刀剣乱舞無双》2022年2月17日發售。仲有電影《マリオ》配音陣容超強！2022年末公開。最後，因為加入咗N64同Mega Drive遊戲，所以都會有手掣喎！

係好好好好好期待嘅，鄺彬強重掌《新著龍虎門》，10月7日出版，我萬二分開心。新人事揸旗，梗係要搞吓特別版，嚟緊第1118、1119同1120一連三期會推出9+1特別版，每期包一書一唔同主筆嘅複印賀圖畫板三塊，參與主筆有柏迪、馮志明、司徒劍僑、黃水斌、胡紹權、葉明發、米奇、夏偉義同周勝，每期各售$138，畫板Size為15x15cm，9塊畫板儲齊，可以合併為1118期封面圖，都幾有心思。早鳥優惠，提早向「至Goal Club」預訂，送多塊阮大勇賀圖畫板，正呀喂。

好了，落實了，今期第1116期《新著龍虎門》出咗正式宣傳圖了，鄺志德亦喺專欄「主編話」透露書名：「團隊新作品《新著中華英雄》，已經開始得如火如荼，工作會議暫時非常順利，暫定10月出版，敬請各位讀友們繼續支持！」我會支持，真心希望可以畫一本出色作品畀大家睇吓喇，要加油呀。另，就呢幅宣傳圖，我朋友咁話：「係咪點都要畫吓華英雄呀？就咁畫把赤劍算數？好求其囉。」我不苟同，下下畫主角邊有癮，赤劍亦屬《中華英雄》Icon，畫赤劍無問題，問題係圖係黑白圖，啲線又多又亂，根本突出唔到把劍，赤劍加番紅色會唔會搶眼啲？ 再另，就住上期《新著龍虎門》封面將「火雲七式：火蛇吐信」誤植字為「雷電神腿：火蛇吐信」一事，今期書末重新刊登一次修正圖，不過得罪講句，有啲多餘喎，用文字交代Say個Sorry咪得囉，事關修正圖足足霸咗珍貴的一大頁，留番嚟出多一頁內文好過喇。

邱瑞新《火武耀揚》上期已經預告咗蝙蝠會死，睇完今期見到蝙蝠咁死法，我覺得有啲唔夠轟烈。為師爺陳捱刀，互劈，斷手，嚎叫，諗住點都會同石頭鍊多幾頁，至少都爆多幾滴血喇，點知轉個頭就成個人頭飛出窗俾火武一抱入懷，連如何斬甩人頭都無交代，如此這般咁就釘咗咯，大有落雨收柴之感。 唔知點解，好多港漫都係咁，隨住劇情發展，主角好多時都會俾二線角色搶風頭，例子有《鐵將縱橫》鐵路人、《西遊》白狼等等，而於我，蝙蝠亦屬此例，對比起所謂嘅尖東玩嘢王臭口柱唔知玩過乜大中小鑊嘢、成日將「江湖百年浩劫」掛喺口邊嘅道理哥永遠齋吹當秘笈懶係有智慧、成日話人「柒到上月球」其實自己最柒嘅虎兒、打極唔死話死又唔死仲要臨老入花叢溝海潮嘅黑骨棠、成日挑來挑起「挑那媽」一味得個打字嘅火武、出親場都懶有霸氣實情得個惡樣嘅雷公等人，我覺得呢個二線角色更立體，描寫得比較有血有肉，忠心有義氣性格鮮明，同翠如BB互溝又夠Funny。咁死法係有啲不捨，個人意見，不喜勿插。

Oh！今期第9期《妖怪道》嘅下期預告寫錯咗「《卷十》猿王爭霸篇3死亡獻祭」將會喺「九月二十三日星期四準時出版」，好明顯係睇錯日曆。聖人都有錯，最緊要有錯要認，何況並唔係大錯，Bookone亦已經即時喺面書出Post補鑊，有擔當，就畀番個Like和仔大人喇。記住，正確出版日期係九月三十日，下個禮拜四唔該繼續買書。

如果你習慣拎遮(冇打開時)時係握住遮身，咁有問題喇，好容易會用遮尾拮到人，尤其係上樓梯嘅時候。咁如果你有呢個「槍柄」，加裝上把遮度，咁你以後拎遮就可以好似揸槍咁，好有型，而且仲可以加個扣，好似人哋啲槍帶咁掛喺個身度……不過如果喺依家嘅香港用，我驚……

本身係都覺得講得太多，日本一Coser「えなこ」噚日出寫真集《OFF COSTUME》未必再提啦。但見到佢呢輯相，入面仲有兩張玩貓圖，又忍唔住喇。

輪到《聖闘士星矢》喇，早前hollywoodreporter就報道咗真人版嘅演員陣容，當中24歲嘅新田真剣佑會演主角「星矢」，咁收兵女神始祖「沙織」就係Madison Iseman，仲有《權力遊戲Sean Bean演「城戸光政」，Diego Tinoco演「フェニックス一輝」，另外仲有Famke Janssen、Nick Stahl、Mark Dacascos參演……強烈建議「紫龍」搵番中國演員，成龍啦個名又有個龍字。

多謝張君豪先，佢想大家開心，所以搞咗個節日限定送禮活動。只要大家Post一張《火伙》畫集相片，PM佢通知佢地址，即送呢張2021年新版蛋散仿電影海報Postccard。正呀喂，開心喇？

今日中秋節，聽日紅日使返工返學，大家有乜好節目？希望大家玩得開心啲，笑多啲，人月兩團圓，中秋節快樂呀喂。

又一間。今次係池袋嘅「セガ池袋GiGO」，將會喺今日9月20日閉館。呢間由GENDA SEGA Entertainment營運嘅店舖，1993年開館，今日就結束28年歷史。而喺今日香港時間下午4點半，網上亦會有直播，入嚟有link，去過或者經過過嘅，可以齊齊歡送佢。

呢條片真係好正，一開始門口冇乜特別正正常常，但推開門之後，入去竟然好似個庭園咁？再行又好似山洞，經過兩條橋之後，再推門，又竟然有條樓梯上去，入到去就係一間超大遊戲機中心，有街機又有夾公仔機……似唔似某啲動漫嘅設定？至於地點，就係日本埼玉縣「ウェアハウス 岩槻店」，下次有機會真係要去呀！

有冇睇奧浩哉嘅《GIGANT》？相比起《GANTZ》覺得點？我自己就覺得都有趣嘅，可以一睇，不過就冇每周追看嘅衝動喇。之前都有唔少Coser變身女主角「パピコ」，今次就係「プーチン」，係咪見過最似嘅一位？話時話，之前「えなこ」都Cos過，入嚟回埋帶。