見到冰蘋果，有無諗起當年嘅經典日劇《戀愛世紀》(Love Generation)？有日本網民喺Twitter分享咗圖，據講個蘋果結咗冰，之後腐爛跌咗落地，但個冰殼就保留喺樹上，仲見到中間吊住個蘋果掟，好神奇！事發地點係美國嘅密芝根州，外國人稱佢為Ghost Apple，因為落雨令蘋果表面結冰，但蘋果熟透之後掉地，大部份都會連表層嘅冰一齊跌，只有少部份會剩返個冰蘋果殼，勁靚！搵相嘅時候睇返當年嘅木村，真係超靚仔，入嚟有回帶。

如果而家呢刻要你合埋眼，諗吓一啲好出名嘅Logo，例如Starbucks、IKEA、7-11等等，然後畫返出嚟，你估效果有幾多成相似？外國公司做咗個研究，搵咗156個年齡介乎20至70歲嘅美國人，要佢哋畫返10個著名logo出嚟然後睇吓準確度，效果好好笑。以為最易記嘅蘋果logo好多人連顏色都記錯，Starbuckcs個女人直情變咗條蟲，最相似嘅係IKEA嘅logo，專家話其實顏色對一個logo嚟講好重要，人類情感上會先記顏色，之後先記得形狀，最後係文字，入嚟有齊10個案例，仲有假想GIF圖，好豐富。

夏天嚟到，係時候幫隻喵星人換間新屋嘞。日本網站Belle Maison最近有呢款藤製嘅蘋果貓屋，唔止外型夠晒得意，而且透氣度高，成身毛嘅喵瞓入去都唔覺熱。最重要係清洗方便，簡單搵個花灑淋兩下就得，賣11500円。另外仲有個可拆蓋式嘅正方形貓屋(2990円)，用咗冰感底墊，瞓上去涼浸浸，賣2990円。佢哋仲有出一個紀念離世貓咪嘅專用盒，上面可以放貓相，下層有個櫃筒仔可以放佢嘅遺物，好細心。

好靚嘅木顏色筆！最近有日本網民放咗幾張漫畫圖上Twitter，佢用嘅木顏色筆「ミックス色鉛筆」好特別，每支都係混色嚟嘅，例如黃加藍、紅加黃等等，畫出嚟嘅效果好靚好有層次感，簡單畫個蘋果都靚過人。其實呢盒顏色筆喺2012年出品，由日本繪本作家監修設計顏色配搭，最近又成為網民嘅討論話題。至於價錢方面，10支裝賣1200円，20支裝賣2400円。鍾意畫畫嘅可以買嚟試吓。

日本人好鍾意食可麗餅(Crêpe)，而且擅長將佢哋整到好靚。最近好多人喺Twitter熱傳呢款玫瑰可麗餅，將薄薄嘅蘋果味可麗餅捲成玫瑰形狀，淨係影相呃like都抵。呢間店舖「ちっちゃなクレープ屋さん」位於日本岩手縣大船渡市，去開附近旅行記住試吓嘞！

《死亡筆記Death Note》新作電影、啱啱喺10月29日上映嘅《デスノート Light up the NEW world》，啱啱拎咗電影週末票房榜首，今次除咗有松山研一同藤原竜也再度出演之外，當然唔少得死神流克，啱啱佢就拍咗段片，同PICO太郎（ピコ太郎），玩返之前好hit嘅《Pen-Pineapple-Apple-Pen》，係就係遲咗少少，但夾晒一向鐘意食蘋果嘅流克一樣有驚喜，段片放上網好快被瘋狂RT。最尾流克仲用支Pineapple-Apple-Pen嚟寫死亡筆記，好正！

呢啲冒雪排隊買蘋果福貨嘅情景，今年應該唔會發生喇。每年1月1日新年，日本Apple Store都會跟日本傳統有福袋發售，隨時以平價買到Macbook呢啲好嘢，所以每年一早就有人排隊。今年如果要排都差唔多時候喇喎……可惜，根據日本媒體報道，2016年1月1日日本全國Apple Store都唔會有福袋買，有傳媒查詢過點解，佢哋就話係為咗提供全世界均質嘅服務……日本網民話好可惜，好期待總有一年有人因排隊而凍死(！？)，亦都有人話係因為強國人、轉售者搞到咁……不過講句公道說話，呢壇嘢我都覺得唔太關強國人事，之前幾年報道排隊都唔係太見有中國人排，始終太花時間。

Apple Watch之後又整多隻Apple Watch Sports，網上好多人又心思思想買，我只想大嗌一句：「那有錢？！」或者好似呢個外國網友Mike Martin咁，用真蘋果雕隻Apple Watch出嚟，最多戴一日，肚餓嘅時候又可以食埋佢，最重要係可以呃Like。網上仲有好多人都一齊用蘋果整Apple Watch，好過食葡萄吖。

真心覺得Apple專為中國市場拍嘅新廣告《老唱片》好睇，最近趁住中國春節，蘋果搵咗導演許鞍華、美指張叔平、攝影師杜可風等粒粒巨星(好耐無見過咁強陣容喇) 拍咗呢個全新廣告《老唱片》，講述孫女一日無意中發現婆婆當年試音嘅封塵黑膠唱片，於是用結他同Macbook重錄呢首《永遠的微笑》，之後放喺iPad比婆婆重溫，短短1分半鐘交代完整個故事，唔老土有感動位，仲有啲似舊年蘋果聖誕節嘅廣告《The Song》嘅中國版，值得一睇。

有無聽過Nabi？佢係美國嘅平板電腦牌子，專出巨型平板，目標對象係小朋友，啲機閒閒哋都24吋，最大仲去到65吋。最近佢哋想宣傳，諗倒搵魔術師Adam Trent去Apple嘅紐約分店搞搞震。當啲人買完iPad走出嚟，佢就借啲意問人借部機，之後1、2、3，將佢哋部iPad變晒做巨芒Nabi，唔知係咪我多心，我覺得啲人好似唔多願意咁，好多人都露出苦笑，鏡頭後有無人發脾氣？

一講起自拍同Samsung，我就諗起上年奧斯卡頒獎禮嗰張世紀大合照，最近喺網上又見倒另一個Samsung平面廣告，今次概念繼續玩自拍，但自拍嘅人，就係名畫入面嘅人物，喺電話芒度就會見倒張原畫作，宣傳句語係：「For self-portraits. Not Selfies.」格調即時提升。名畫家梵高都掉底支畫筆，周去拎部手機玩自拍喎，我哋返工玩手機send下message嘅普通人，一般吹水一般更好。

之前都已經報道咗蘋果會由11月28日至12月日搞活動，就係將部份收益捐去慈善機構Global Fund對抗愛滋病。今日(1日)係世界愛滋日，大家仲發現連店舖嘅蘋果Logo同店員著嘅衫都變咗紅色！唔只日本，世界各地都有，入嚟睇埋澳洲悉尼、法國嘅蘋果店先。

蘋果本來就應該係紅色嘅，不過Steve Jobs嘅蘋果品牌係白色，最近喺官網見倒佢終於被染紅，原來係為咗嚟緊嘅世界愛滋病日籌款，由11月28日至12月1日喺online或者店舖買嘢，部份收入會捐去慈善機構Global Fund對抗愛滋病。另外仲會喺App Store推出25款「Apps for (RED)」，所有收入會捐晒去Global Fund。唔知香港Apple Store會唔會照做呢？

Apple嘅老爺機應該好多人唔捨得掉，點知第時會唔會升價百倍o架？外國設計師Klaus Geiger就物盡其用，將佢哋改裝成傢俬，例如將兩部03年出品嘅Power Mac G5，中間加塊木板或者喺面層加塊玻璃當枱用，又可以改裝成櫃筒。呢個傢俬系列叫BENCHMA(R)C，屋企有大量舊蘋果又唔知點算好嘅果迷可以參考吓，自己DIY整返件。

iPhone 6炒價越跌越低，大家都係留返嚟自用好過。外國拍賣行Bonhams嚟緊將會拍賣嘅呢件蘋果產品就唔同，呢塊蘋果第一代電腦嘅底板，今個月22號會拍賣，估計價位可以去到美金40萬，即係港幣300萬左右！足足係佢原價(美金$666.66)嘅600倍！原因之一係佢係世上僅存15件仲可以行得郁得嘅收藏品之一，據講係Steve Wozniak喺蘋果教主Steve Jobs嘅屋企搵倒嘅，炒家飛過去入手啦。