自細同動物一齊成長真係好開心嘅事，最近呢段片喺Twitter熱傳，有個小朋友俾一班狗狗包圍，幾隻狗仔超熱情圍住佢要錫錫，仲大力到推咗佢落地，超可愛，睇得出班狗狗超鍾意佢，鍾意到想食咗佢落肚咁，入嚟有得睇片。

好感人！寵物離世對主人嚟講係好傷痛嘅事，日本呢位主人嘅狗狗「ハナ」離開咗，佢嘅好朋友竟然用咗半年時間，將狗狗嘅毛髮加埋羊毛，織成同隻狗狗一模一樣嘅迷你公仔，背面仲有對天使翅膀，好有心思好感動，對狗主嚟講，絕對係世上最好嘅禮物。

好正呀呢架日本鐵道列車，可以俾狗狗一齊搭，係狗狗專屬嘅觀光車。日本有網民分享咗片同相，全車都係狗狗，仲有大人細路一齊搭，好開心！想搭嘅可以留意返，地點係茨城縣嘅「ひたちなか海浜鉄道」，不過我哋去旅行唔可以帶埋狗狗，但就可以玩人哋啲狗嘞。

嘩，好驚呀，想嚇死人咩？萬聖節又到，除咗人可以cosplay之外，動物都可以，好似網民分享嘅幾隻狗狗，一塊白布就搞得掂，材料又簡單又平，效果仲超正！不過首先要有一隻白色嘅狗先得。

體積越細嘅動物越叻裝兇作勢，唔打得都嚇得嘛！好似呢兩張連環圖，隻友善嘅狗狗想同隻黑貓仔玩，不過隻黑貓嘅反應就超大，好似想講：「你唔好行埋嚟呀，我食咗你架！」隔住芒都感覺到隻狗仔想笑出嚟。不過都正常嘅，站喺黑貓嘅立場嚟講，隻狗狗打個乞嗤都噴走佢呀！

日本嘅玩具好得意，小朋友同狗狗都鍾意。好似呢隻龍蝦毛公仔，呢隻狗狗就好鍾意玩，仲成日擔住佢周圍走，不過可能隻龍蝦鉗太大，搞到佢面容扭曲埋，但佢都緊持要咬住佢，好可愛！張相喺Twitter好高人氣，入嚟有多啲呢隻狗狗嘅相同片睇，原來佢有好多玩具嘅，超幸福呀！

而家啲動物好識嘆，仲好幸福，好似日本呢隻狗狗，主人就同佢去箱根享受狗狗專用嘅露天風呂，最正係佢浸完之後個樣，完全表現到乜嘢叫「嘆」！超搞笑呀。

嘩！好多粒棉花糖呀！最近有日本網民分享咗呢幾張圖，話係棉花糖牧場，其實係一隻隻白色嘅狗狗，不過數量極多，全部都好似識郁嘅棉花糖喺度走嚟走去，超可愛。

呢張狗狗床真係睇見都想瞓！一張普通嘅床，上面加多個頸枕，狗狗撻上去就啱啱好可以放個下巴上去，超hea！俾枕頭包圍住嘅感覺好爽，官方仲話可以促進血液循環，屋企有旅行頸枕嘅可以自製一個喎。

呢兩隻住喺日本嘅雪橇狗狗真係核爆級可愛，最近喺Twitter睇到呢幾張圖，佢哋合力砌咗個心型出嚟，睇返其他相，原來佢哋好鍾意腳貼腳咁瞓，睇落好似第三類接觸，唔通係傳心術嘅一種？入嚟有多啲佢哋嘅影片睇，超可愛！

狗主每日返屋企最開心嘅一刻，就係隻狗狗飛撲嚟迎接，不過外國呢位機師隻狗狗，6歲嘅 維茲拉犬Murray嘅接門方式就好特別，因為佢會企喺屋企最高嘅位置等主人返嚟。主人最先發現時好驚，好怕佢會跳落嚟或者跌親，於是封咗唔同嘅位置防止佢跳上屋頂，不過過咗幾日之後，隻狗狗就搵到其他位置跳上屋頂。既然佢咁堅持，主人亦決定唔阻佢，而家企喺屋頂等主人返屋企就成為咗佢嘅標記，佢仲會做大佬帶埋其他狗狗一齊上屋頂，霸氣！

最近有個網民分享咗佢嘅故事，話說佢隻10歲嘅狗狗Cody最近被診斷出有癌症，只係剩返1-3個月命，為咗令佢剩低嘅日子過得開心啲，佢哋每日都會去附近嘅Burger King買個plain cheeseburger俾狗狗送藥食。有日其中一位店員就好奇問佢哋點解會點無任何醬料嘅plain cheeseburger，狗主就講咗Cody嘅事比店員知，而店員轉身同經理傾咗幾句之後，就問咗狗主人嘅姓名，然後同佢講，嚟緊佢再買俾Cody嘅plain cheeseburger都會係免費嘅。呢位狗主人好感動，將件事放咗上Twitter，吸引好多人留言。大家都讚Burger King做得好好，而Burger King嘅官方帳號亦喺個帖下面留言話：「呢個世界需要多啲仁慈及同情，多謝你俾機會我哋為Cody做少少嘢。」回應大方得體又恰到好處，下次都買返個Burger King包食吓先。

日本天氣咁熱，唔止人類要避暑，狗狗都要諗方法消暑。日本有網民分享咗呢段片，隻狗狗超識嘆，坐喺水澗度仲要放鬆晒順住水流漂走，睇見都覺得透心涼，難怪樓主話想學佢啦。

日本而家嘅天氣熱到街都唔想出，有主人就幫佢隻狗狗灑水降溫，之後狗狗瞓上地，就出現咗呢個淺色嘅印，好搞笑，咁即係代表佢個身已經黑咗一撻？

狗狗出名鍾意出街，呢隻日本嘅狗狗就喺3秒內完美示範咗，主人拎咗個頸圈出嚟，離遠見到嘅佢即刻飛奔埋嚟，3秒唔駛已經直接將個頭套咗入個頸圈度，非常俐落，滿分！