Post Tagged with: "牛佬"

《洪門女將》因敏感禁發書局 牛佬嬲到爆粗
by / on 20/08/2018 at 8:20 pm

《洪門女將》因敏感禁發書局 牛佬嬲到爆粗

利申,《飛女正傳》喺《古惑仔》連載嗰陣,我期期有追,呢個以飛女為主題嘅古仔追落津津有味,但唔算超出色,所以輯錄成小說並改名為《洪門女將》,我無撐。雖然無撐,但唔畀發書去書局呢,我卻一千億個不認同。剛剛,牛佬嬲到喺面書大聲疾呼,全Copy and paste如下:「X佢老母我發覺呢個世界已經傻能咗,《洪門女將》居然話因為敏感而發唔到去書局?乜鳩嘢發行嚟架?」香港三大書局係乜背景,大家心知肚明,但《洪門女將》由封面到內容有邊一忽踩過界?邊忽敏感呢?因為書名有「洪門」兩個字?香港仲有無出版自由?我睇唔透,只知道香港瓣瓣都在倒退中……嗚,我都好嬲。

Read more ›

上官小威推出《愛情故事》封面集 豪華尊貴金版$330
by / on 15/08/2018 at 3:55 pm

上官小威推出《愛情故事》封面集 豪華尊貴金版$330

唔講大話,我係未睇過《愛情故事》嘅,因為細個無咁多零用錢,唔可以本本公仔書都買齊。Fine,家陣上官小威推出《愛情故事》封面集,雖然無內文只有封面,但可以買番一份老情懷,我覺得值。《愛情故事》封面集分兩個版本,一,豪華尊貴金版,附3D立體卡、製作花絮專輯、證書,售$330,限量100本,「收藏家港漫專區」獨家開訂;二,翡翠金版,售$330,限量100本,各大中小漫畫店有售。早鳥優惠,頭十位讀者訂購各版本,都會有埋牛佬同上官小寶親筆簽名。好嘢要搶,有買趁手。

Read more ›
牛佬宣佈《古惑仔》加價至$23 讀者有贊成有反對
by / on 23/07/2018 at 9:31 pm

牛佬宣佈《古惑仔》加價至$23 讀者有贊成有反對

牛佬喺今期第2150期《古惑仔》宣佈,下期正式調整售價至$23。為此,幾個港漫相關面書專頁都留言不絕,有人贊成,仲話牛佬加得遲,好應該加到$28甚至$30;但以反對聲音佔大多數,話誓要Cut書云云。我呢,加$3,一周兩本即係畀多$6,成個月計落都不過係畀多$24,絕對接受得到。惟一想牛佬改善嘅係──都係老問題──期期書都畫得太大格,唔多襟睇,如果格數畫得充實啲,內容紮實啲,橋行得好啲,畀多$3真係無乜所謂。或者正如牛佬自己所言:「鍾意睇,唔貴!唔鍾意睇嘅話,莫講加價,減價都嫌你貴。」此言甚是,我認同,並選擇繼續捧場。

Read more ›
讀者求牛佬放過《古惑仔》小馬 幫小馬求平安包
by / on 19/07/2018 at 10:15 pm

讀者求牛佬放過《古惑仔》小馬 幫小馬求平安包

睇完今期第2149期《古惑仔》,洪興小馬對加藤二之戰已近尾聲,暫時仲勝負未分,但強弱之勢已呈。上期牛佬講過是但一個會「擺橫」,照計就算死,加藤二都會死喺佐維或立花正仁之手,所以咯喎,呢一戰死嗰個99%係小馬。我諗好多讀者都同我一樣,都唔捨得小馬打柴,讀者Andy Wong好搞笑,投入到直頭幫小馬求平安包,影埋相畀牛佬,求牛佬放小馬一馬。希望啦,死吓一個死吓又一個,我有啲心傷。

Read more ›
輯錄《飛女正傳》 牛佬書展出《洪門女將》
by / on 17/07/2018 at 10:00 pm

輯錄《飛女正傳》 牛佬書展出《洪門女將》

剛剛喺《古惑仔》完結嘅連載小說《飛女正傳》,我追足每一期,感覺都唔錯,起碼有追看性,四個飛女結局有死有著草,我睇嗰陣都幾投入,算幾牽動到情緒。牛佬決定斬多二兩,將之重新輯錄成書,易名《洪門女將》喺2018書展出售,每本$88,大家記得捧場。話時話,個封面幾靚,唔知出自邊個手筆?

Read more ›
悼!《古惑仔》牛姑之死!
by / on 04/06/2018 at 6:09 pm

悼!《古惑仔》牛姑之死!

忙到甩轆,今日係周一,我先有時間睇番上周四出版嘅第2135期《古惑仔》,睇完悲悲戚戚。牛姑,細細粒拜門大佬,一拳,就因陳浩南扯盡吃力之力嘅一拳,呢個橫跨二千幾期嘅角色就咁死咗,一心尋死嘅佢埋尾選擇跣佐敦一鑊,為三聯先輸一仗,求仁得仁。其實有無必要整死佢呢?牛佬想為「巨星之戰」掀起高潮,死啲重要角色無可厚非,但硬係覺得牛姑死得有啲兒戲咗。而更心驚嘅係,仲有幾多主要角色會喺未來十期八期消失?梁家仁?迪文?佐維?唔想左右牛佬度橋,但我真係越諗越驚……

Read more ›

牛佬《金蒙空》唔出實體書 科月費$65有得睇
by / on 23/05/2018 at 9:45 pm

牛佬《金蒙空》唔出實體書 科月費$65有得睇

有啲失望,又有啲心郁,講咗唔知幾多年嘅《金蒙空》,牛佬終於決定推出,但可惜嘅係並非推出拎得上手翻煲又翻煲嘅實體書,而係網上連載。畀月費$65,就可以「欣賞到由牛佬及倫裕國之獨家日刊連載,外加五套全新週刊式漫畫及30套完整漫畫」,日刊,即係每日更新添。老實講,價錢一啲都唔貴,想睇就肯肯定百分百想睇架嘞,但一諗到要篤住個Mon放大縮細打橫打掂睇,我始終唔慣,所以依家個心仲十五十六中……唔知大家又點睇?

Read more ›
牛佬搞Gag有啖笑 金正恩+馬雲突入《古惑仔》
by / on 24/04/2018 at 9:45 pm

牛佬搞Gag有啖笑 金正恩+馬雲突入《古惑仔》

好耐未試過睇公仔書睇到笑出聲,今期第2124期《古惑仔》非常正斗,估唔到牛佬可以搞笑成咁。話說三聯舉行選拔賽以應付「巨星之戰」,埋尾居然出現一眼就睇得出……都唔使「疑似」……係直頭係金正恩同馬雲嘅兩個新角色,名就係咁意改過吓,馬雲改名云「馬騰」,金正恩改名云「北正恩」,而負責考馬騰嘅察拉仲有句超抵死對白:「聽聞宇宙最強的甄子丹和洪金寶也不是你的對手……」為此,網民反應都好兩極,有人覺得如此忽然搞笑,會搞到壇巨星之戰無厘正經不倫不類,緊張氣氛消磨殆盡;有人卻認為出吓呢類騎呢角色,誠然多個話題,反而令故事更聚焦。我呢,都覺得牛佬此著OK,有啖笑固然開心,有新角色加入更加係好事嘛,話唔定呢兩兜友之後有好大發揮呢。猶記得初初地中海出場,都係樣樣衰衰賤賤格格鹹鹹濕濕,毫無高手風範可言,而事實證明呢個角色好成功。

Read more ›
《古惑仔》標錯名 迪文/世傑調亂咗
by / on 20/04/2018 at 9:34 pm

《古惑仔》標錯名 迪文/世傑調亂咗

今期第2123期《古惑仔》出錯,仲要錯喺第一頁版頭第一格,陳浩南昔日保鑣迪文同世傑兩個唔對名,調亂咗,畫嘅係迪文,名就標咗世傑;畫嘅係世傑,名就標咗迪文。牛佬記得過執番好佢,他朝出合訂本唔好出錯。另,劇情講到陳浩南思良將,搵迪文打「巨星之戰」,今期三分一篇幅都描寫迪文有幾好打,越係好打就越……唔知點解我覺得牛佬會整死迪文,而柏美娜,會嬲南哥一世。

Read more ›
《古惑仔》牛姑唔追究李建興 點解嘅?
by / on 30/03/2018 at 5:00 pm

《古惑仔》牛姑唔追究李建興 點解嘅?

睇完今期第2117期《古惑仔》,我眉頭有啲皺,劇情發展唔多對勁喎。上期先話牛姑親口講:「我想死。」今期就話牛姑答應佐敦代表三聯出戰「巨星之戰」,咁都算,但之前李建興挾持潘少枝對付洪興,搞到牛姑無端端同李志高打咗一鑊,事後陳浩南都講到明邊個從中搞鬼,牛姑咁就算數?咁都仲肯同佐敦賣命?牛佬試圖透過旁白說明「但最終因潘少枝認為──那是正確的。是以沒有向李建興追究」解畫,但著實牽強咗啲,唔係好合情理。我有個大膽假設,會唔會牛姑喺巨星之戰專登放水,打輸畀洪興跣番佐敦一鑊兼順便尋死?希望估錯啦。

Read more ›
《古惑仔》送潮爆貼紙 No輝唔係斷咗手咩?
by / on 02/03/2018 at 8:00 am

《古惑仔》送潮爆貼紙 No輝唔係斷咗手咩?

今期第2109期《古惑仔》繼續送潮爆貼紙,構圖係陳浩南坐梳化煲煙,後面有大大個寫住「義」字嘅匾額,整體構圖係型嘅,要讚係咁細張貼紙,南哥五官都可以畫得咁清楚,製作一啲都唔馬虎。另,睇完今期,除擔心洪興楊思樂會唔會俾察拉搞正外,我仲有個疑問,雖然唔記得斷咗邊隻手同因邊鑊大戰搞到斷手,但三聯No輝唔係斷咗隻手嘅咩?今期講佢同佐敦、九尾狐同藍鯨打牌,一格畫左手揸住一對碰唔出嘅二筒,另一格見右手完整無缺,唔通我記錯?定之後有交代過佢駁番隻手我唔記得咗?記錯勿插!

Read more ›

《古惑仔》送潮爆貼紙 賀伊文華唔使死
by / on 26/02/2018 at 4:41 pm

《古惑仔》送潮爆貼紙 賀伊文華唔使死

今期第2108期《古惑仔》封面,我覺得好型,南哥啖煙兼眼睥睥嘅表情,韓賓耷晒頭嘅肢體動作,好表達到韓賓呢個洪興龍頭對南哥「功高震主」嘅憂慮,內文韓賓同佐敦通話嘅幾段對白,亦非常精彩,睇嚟三聯離間計開始得逞。今期送「古惑仔父子」潮爆貼紙,我買嘅係雷霆同雷耀揚版,好Like;而更加Like嘅係,雖然俾小海打到仆街裂胸骨,但伊文華只需瞓床唔使死,算不幸中之大大大大大幸咯,我幾驚新年流流又死多件二代呀。

Read more ›
《古惑仔》送超靚素描年曆卡 伊文華過唔到狗年?
by / on 15/02/2018 at 7:50 pm

《古惑仔》送超靚素描年曆卡 伊文華過唔到狗年?

今期第2015及2016期孖寶號《古惑仔》送素描賀年卡,一如上期有陳浩南版同大飛版兩款選擇,又一如早幾日咁樓下報紙檔只得大飛版賣,奇怪。張大飛賀年卡真係畫得好靚,倫裕國手畫真係無得頂,不得不寫個服字!今期孖寶號,一次過睇兩期,感覺一氣呵成好多,尤其采妮趕南哥出門口又跪南哥嗰幾格,究竟求南哥啲乜呢?係咪已經Sure咗豹子健已經係游子健?之後又整多格南哥疑似功高蓋主唔放洪興龍頭韓賓在眼內,啲衝突位開始慢慢浮出嚟嘞,估計呢Part故事應該幾正!不過我驚嘅係,為咗製造高潮兼煲勁小海武值同頭腦,牛佬好似想整死伊文華咁款喎。唉,最好唔好喇,二代死吓一個死吓又一個,斷估好多讀者都會同我一樣,好傷心架。

Read more ›
《古惑仔》送財神揮春 陳浩南重遇采妮好有Mood
by / on 14/02/2018 at 12:22 am

《古惑仔》送財神揮春 陳浩南重遇采妮好有Mood

講得出做得到,牛佬繼續送禮,今期第2104期《古惑仔》送賀年財神揮春,開心。本身揮春係有兩款嘅,但唔知點解我樓下公仔書檔只見陳浩南版本,上網見有師兄Post咗大飛版本,搞到我想買兩本公仔書撐一撐牛佬都唔得,或者咁啱俾人買晒喇。另,今期封面陳浩南同采妮對望個構圖好有Mood,食啱情人節氛圍,尤其內文「男女感情,就是一件這麼奇妙的事。不管你是甚麼年紀,不管你智慧有多少,不管你是貧窮或富有……只要你一旦在意,而又即將面對時……心裡還是忐忑不安,卜卜亂跳,控制不來,也驅之不散」呢幾段旁白,睇到我都有少少諗番起以前啲Ex,牛佬起字係幾能夠惹起人共鳴嘅。字好,但有少少嘢想插一插,又係老問題,畫到好大格呀,第九頁隻小腿加高跟鞋、第三十一頁嘅陳浩南倒抽一口涼氣,真係大格到過份咗少少喎,希望可以正視吓喇,《古惑仔》死忠Fans敬上。

Read more ›
寫個服字俾牛佬!峰迴路轉佐維唔使死!
by / on 14/12/2017 at 7:29 pm

寫個服字俾牛佬!峰迴路轉佐維唔使死!

Fake晒!真係俾牛佬玩死,又二呎四度頸對峙,又疑似中流彈,又甚麼「後腦附近拖出一條血水,頭部似是無力的往左方一側」,原來統統都係為製造高潮而設,今期第2087期《古惑仔》揭盅嘞,結果係因為「好彩」子彈射唔中,佐維呢個「永遠第一」今鋪唔使死。相信呢兩三個禮拜,一眾讀者包括我個個都心如鉛墜兼鬼殺咁嘈,全拜如此有壓迫感劇情所賜,計落牛佬係好嘢嘅,抵讚。這邊廂執番身彩,那邊廂趙繼邦睇個勢都係要死,我估計係死喺丁瑤呢個老虔婆手上,不過就由金尊貴落手,唔知有無估錯呢?

Read more ›

本週人氣

10151 views

【有片】可愛到癲!「你點解嚟日本?」節目 日本網民狂讚16歲波蘭妹妹

8084 views

【有片】日本狂人搗亂Family Mart 網民:「激似《人中之龍6》!」

7584 views

日本網民自製「LED眼鏡」 發光效果勁似「碇司令」

7404 views

我就是高達!舞台劇《機動戰士Gundam 00》角色登場

6082 views

黃符遮三點 超性感殭濕子Figure