Post Tagged with: "《古惑仔》"

牛佬宣佈《古惑仔》加價至$23 讀者有贊成有反對
by / on 23/07/2018 at 9:31 pm

牛佬宣佈《古惑仔》加價至$23 讀者有贊成有反對

牛佬喺今期第2150期《古惑仔》宣佈,下期正式調整售價至$23。為此,幾個港漫相關面書專頁都留言不絕,有人贊成,仲話牛佬加得遲,好應該加到$28甚至$30;但以反對聲音佔大多數,話誓要Cut書云云。我呢,加$3,一周兩本即係畀多$6,成個月計落都不過係畀多$24,絕對接受得到。惟一想牛佬改善嘅係──都係老問題──期期書都畫得太大格,唔多襟睇,如果格數畫得充實啲,內容紮實啲,橋行得好啲,畀多$3真係無乜所謂。或者正如牛佬自己所言:「鍾意睇,唔貴!唔鍾意睇嘅話,莫講加價,減價都嫌你貴。」此言甚是,我認同,並選擇繼續捧場。

Read more ›

讀者求牛佬放過《古惑仔》小馬 幫小馬求平安包
by / on 19/07/2018 at 10:15 pm

讀者求牛佬放過《古惑仔》小馬 幫小馬求平安包

睇完今期第2149期《古惑仔》,洪興小馬對加藤二之戰已近尾聲,暫時仲勝負未分,但強弱之勢已呈。上期牛佬講過是但一個會「擺橫」,照計就算死,加藤二都會死喺佐維或立花正仁之手,所以咯喎,呢一戰死嗰個99%係小馬。我諗好多讀者都同我一樣,都唔捨得小馬打柴,讀者Andy Wong好搞笑,投入到直頭幫小馬求平安包,影埋相畀牛佬,求牛佬放小馬一馬。希望啦,死吓一個死吓又一個,我有啲心傷。

Read more ›
甘尚武打爛仔交贏沙隆 咁先係《古惑仔》
by / on 07/07/2018 at 7:14 pm

甘尚武打爛仔交贏沙隆 咁先係《古惑仔》

唔知咁講牛佬會唔會嬲,但睇完今期第2145期《古惑仔》真係有感而發,我終於覺得似番黑社會故事。巨星之戰,打擂台爭地盤,唔係格鬥MMA表演比賽,為求勝利,梗係乜那渣招數都要用。甘尚武唔夠泰國拳王沙隆打,單靠燃燒太子之魂唔夠,靠鼓起意志都唔夠,經大梵指點原來要靠惡先掂。啱架,插眼咪插眼囉,噴血咪噴血囉,頂埋頭槌都好合理,再唔掂就連咬人呢招都出埋。無高手風範?武林大俠君子過招咩?咁打爛仔交先似古惑仔架嘛。

Read more ›
《古惑仔》巨星之戰第二場 李成克打唔贏梁家仁?
by / on 10/06/2018 at 1:30 am

《古惑仔》巨星之戰第二場 李成克打唔贏梁家仁?

俾今期第2137期《古惑仔》封面Fake一Fake,書名叫〈前路難行〉,黑白Tone,構圖係李成克耷晒頭咁,仲以為呢個脫北者打輸咗添。睇完內文,李成克未輸,但感覺武值低咗好多,好似得鋪牛力咁,而梁家仁就醒咗好多,有智慧有耐力識得忍。勝負下周一揭盅,純個人預測,呢場應該雙雙墮海,打成平手Super!萬望牛佬唔好為咗煲起第二代,夾硬要李成克輸or慘輸,話晒喺武值排行榜,李成克有6星,梁家仁得4星半,太過夾硬嚟,著實講唔通。

Read more ›
悼!《古惑仔》牛姑之死!
by / on 04/06/2018 at 6:09 pm

悼!《古惑仔》牛姑之死!

忙到甩轆,今日係周一,我先有時間睇番上周四出版嘅第2135期《古惑仔》,睇完悲悲戚戚。牛姑,細細粒拜門大佬,一拳,就因陳浩南扯盡吃力之力嘅一拳,呢個橫跨二千幾期嘅角色就咁死咗,一心尋死嘅佢埋尾選擇跣佐敦一鑊,為三聯先輸一仗,求仁得仁。其實有無必要整死佢呢?牛佬想為「巨星之戰」掀起高潮,死啲重要角色無可厚非,但硬係覺得牛姑死得有啲兒戲咗。而更心驚嘅係,仲有幾多主要角色會喺未來十期八期消失?梁家仁?迪文?佐維?唔想左右牛佬度橋,但我真係越諗越驚……

Read more ›
《古惑仔》巨星之戰競猜遊戲 估洪興同三聯五比五平手收場
by / on 21/05/2018 at 10:30 pm

《古惑仔》巨星之戰競猜遊戲 估洪興同三聯五比五平手收場

《古惑仔》三聯對洪興嘅巨星之戰正式開打,男一陳浩南戰牛姑,一開波牛姑就處於劣勢。為煲大呢壇大戰,牛佬搞咗個「巨星之戰競猜遊戲」,邊個估中十場對戰勝出者,即送「得奬者本人與陳浩南一起的彩畫一張」,獨一無二親筆畫,正呀喂,截止日期5月27日午夜12時正。我呢,就咁估,頭場陳浩南險勝、第二場李成克慘勝、第三場何小海勝迪文死、第四場甘尚武大勝、第五場北正恩使詐勝、第六場加藤二勝小馬死、第七場郭秀青勝、第八場立花正仁勝天川秀死、第九場佐維極速勝、第十場大梵完勝亞披勒死,結果係五比五打成平手,廃後輪到金尊貴出場執死雞,唔知估唔估得中呢?

Read more ›

《古惑仔》新專欄「百戰話當年」 當海報儲
by / on 07/05/2018 at 8:59 pm

《古惑仔》新專欄「百戰話當年」 當海報儲

今期2128期《古惑仔》有新專欄「百戰話當年」,主要重溫重要角色嘅重要戰役,第一話係「立花正仁大逃亡」,構圖並唔係用舊畫拼拼砌砌撈埋一碟就算,係重新畫過,質素直達海報級數,安排喺書中間做跨頁,擺明係方便大家可以搣低落嚟收藏嗰隻。

Read more ›
牛佬搞Gag有啖笑 金正恩+馬雲突入《古惑仔》
by / on 24/04/2018 at 9:45 pm

牛佬搞Gag有啖笑 金正恩+馬雲突入《古惑仔》

好耐未試過睇公仔書睇到笑出聲,今期第2124期《古惑仔》非常正斗,估唔到牛佬可以搞笑成咁。話說三聯舉行選拔賽以應付「巨星之戰」,埋尾居然出現一眼就睇得出……都唔使「疑似」……係直頭係金正恩同馬雲嘅兩個新角色,名就係咁意改過吓,馬雲改名云「馬騰」,金正恩改名云「北正恩」,而負責考馬騰嘅察拉仲有句超抵死對白:「聽聞宇宙最強的甄子丹和洪金寶也不是你的對手……」為此,網民反應都好兩極,有人覺得如此忽然搞笑,會搞到壇巨星之戰無厘正經不倫不類,緊張氣氛消磨殆盡;有人卻認為出吓呢類騎呢角色,誠然多個話題,反而令故事更聚焦。我呢,都覺得牛佬此著OK,有啖笑固然開心,有新角色加入更加係好事嘛,話唔定呢兩兜友之後有好大發揮呢。猶記得初初地中海出場,都係樣樣衰衰賤賤格格鹹鹹濕濕,毫無高手風範可言,而事實證明呢個角色好成功。

Read more ›
《古惑仔》標錯名 迪文/世傑調亂咗
by / on 20/04/2018 at 9:34 pm

《古惑仔》標錯名 迪文/世傑調亂咗

今期第2123期《古惑仔》出錯,仲要錯喺第一頁版頭第一格,陳浩南昔日保鑣迪文同世傑兩個唔對名,調亂咗,畫嘅係迪文,名就標咗世傑;畫嘅係世傑,名就標咗迪文。牛佬記得過執番好佢,他朝出合訂本唔好出錯。另,劇情講到陳浩南思良將,搵迪文打「巨星之戰」,今期三分一篇幅都描寫迪文有幾好打,越係好打就越……唔知點解我覺得牛佬會整死迪文,而柏美娜,會嬲南哥一世。

Read more ›
《古惑仔》牛姑唔追究李建興 點解嘅?
by / on 30/03/2018 at 5:00 pm

《古惑仔》牛姑唔追究李建興 點解嘅?

睇完今期第2117期《古惑仔》,我眉頭有啲皺,劇情發展唔多對勁喎。上期先話牛姑親口講:「我想死。」今期就話牛姑答應佐敦代表三聯出戰「巨星之戰」,咁都算,但之前李建興挾持潘少枝對付洪興,搞到牛姑無端端同李志高打咗一鑊,事後陳浩南都講到明邊個從中搞鬼,牛姑咁就算數?咁都仲肯同佐敦賣命?牛佬試圖透過旁白說明「但最終因潘少枝認為──那是正確的。是以沒有向李建興追究」解畫,但著實牽強咗啲,唔係好合情理。我有個大膽假設,會唔會牛姑喺巨星之戰專登放水,打輸畀洪興跣番佐敦一鑊兼順便尋死?希望估錯啦。

Read more ›
《古惑仔》送潮爆貼紙 No輝唔係斷咗手咩?
by / on 02/03/2018 at 8:00 am

《古惑仔》送潮爆貼紙 No輝唔係斷咗手咩?

今期第2109期《古惑仔》繼續送潮爆貼紙,構圖係陳浩南坐梳化煲煙,後面有大大個寫住「義」字嘅匾額,整體構圖係型嘅,要讚係咁細張貼紙,南哥五官都可以畫得咁清楚,製作一啲都唔馬虎。另,睇完今期,除擔心洪興楊思樂會唔會俾察拉搞正外,我仲有個疑問,雖然唔記得斷咗邊隻手同因邊鑊大戰搞到斷手,但三聯No輝唔係斷咗隻手嘅咩?今期講佢同佐敦、九尾狐同藍鯨打牌,一格畫左手揸住一對碰唔出嘅二筒,另一格見右手完整無缺,唔通我記錯?定之後有交代過佢駁番隻手我唔記得咗?記錯勿插!

Read more ›

《古惑仔》送潮爆貼紙 賀伊文華唔使死
by / on 26/02/2018 at 4:41 pm

《古惑仔》送潮爆貼紙 賀伊文華唔使死

今期第2108期《古惑仔》封面,我覺得好型,南哥啖煙兼眼睥睥嘅表情,韓賓耷晒頭嘅肢體動作,好表達到韓賓呢個洪興龍頭對南哥「功高震主」嘅憂慮,內文韓賓同佐敦通話嘅幾段對白,亦非常精彩,睇嚟三聯離間計開始得逞。今期送「古惑仔父子」潮爆貼紙,我買嘅係雷霆同雷耀揚版,好Like;而更加Like嘅係,雖然俾小海打到仆街裂胸骨,但伊文華只需瞓床唔使死,算不幸中之大大大大大幸咯,我幾驚新年流流又死多件二代呀。

Read more ›
《古惑仔》送超靚素描年曆卡 伊文華過唔到狗年?
by / on 15/02/2018 at 7:50 pm

《古惑仔》送超靚素描年曆卡 伊文華過唔到狗年?

今期第2015及2016期孖寶號《古惑仔》送素描賀年卡,一如上期有陳浩南版同大飛版兩款選擇,又一如早幾日咁樓下報紙檔只得大飛版賣,奇怪。張大飛賀年卡真係畫得好靚,倫裕國手畫真係無得頂,不得不寫個服字!今期孖寶號,一次過睇兩期,感覺一氣呵成好多,尤其采妮趕南哥出門口又跪南哥嗰幾格,究竟求南哥啲乜呢?係咪已經Sure咗豹子健已經係游子健?之後又整多格南哥疑似功高蓋主唔放洪興龍頭韓賓在眼內,啲衝突位開始慢慢浮出嚟嘞,估計呢Part故事應該幾正!不過我驚嘅係,為咗製造高潮兼煲勁小海武值同頭腦,牛佬好似想整死伊文華咁款喎。唉,最好唔好喇,二代死吓一個死吓又一個,斷估好多讀者都會同我一樣,好傷心架。

Read more ›
《古惑仔》送財神揮春 陳浩南重遇采妮好有Mood
by / on 14/02/2018 at 12:22 am

《古惑仔》送財神揮春 陳浩南重遇采妮好有Mood

講得出做得到,牛佬繼續送禮,今期第2104期《古惑仔》送賀年財神揮春,開心。本身揮春係有兩款嘅,但唔知點解我樓下公仔書檔只見陳浩南版本,上網見有師兄Post咗大飛版本,搞到我想買兩本公仔書撐一撐牛佬都唔得,或者咁啱俾人買晒喇。另,今期封面陳浩南同采妮對望個構圖好有Mood,食啱情人節氛圍,尤其內文「男女感情,就是一件這麼奇妙的事。不管你是甚麼年紀,不管你智慧有多少,不管你是貧窮或富有……只要你一旦在意,而又即將面對時……心裡還是忐忑不安,卜卜亂跳,控制不來,也驅之不散」呢幾段旁白,睇到我都有少少諗番起以前啲Ex,牛佬起字係幾能夠惹起人共鳴嘅。字好,但有少少嘢想插一插,又係老問題,畫到好大格呀,第九頁隻小腿加高跟鞋、第三十一頁嘅陳浩南倒抽一口涼氣,真係大格到過份咗少少喎,希望可以正視吓喇,《古惑仔》死忠Fans敬上。

Read more ›
《古惑仔》送Q版迷你揮春
by / on 08/02/2018 at 6:45 pm

《古惑仔》送Q版迷你揮春

就嚟過年,牛佬好識做,喺今期第2103期《古惑仔》隨書附送Q版迷你揮春兩大張,分別係Q版梁家仁嘅「家宅平安」同Q版李志高嘅「吉星高招」,仲講到明嚟緊幾期會繼續送添。雖屬小小禮物,但都開心嘅,好意頭吖嘛。最重要係,《古惑仔》係唯一初一嗰個禮拜依然會出書嘅港漫,你知喇,成個禮拜無公仔書睇,好籮籮攣架嘛。

Read more ›

本週人氣

8076 views

《銀魂》完結篇最後畫面 原來……

7514 views

Nintendo Switch Online遊戲列表 20隻經典周三有得玩

6391 views

新片速報 陳年街機合作幾打 《Capcom Belt Action Collection》網上連線

6019 views

日本「裝銀仔」神器 網民推介Twitter熱傳

5257 views

機迷出圖 如果出Marvel’s Iron Man遊戲