o依家好多YouTuber呀，尤其日本，競爭咁激烈，點樣突圍好呀？好似呢位Cosplayer「天津いちは」咁，佢YouTube同Twitter都又有Cosplay又有時性感又盛咁啦，不過近排有一條YouTube片嘅Views數係其他嘅幾十倍喎？成90萬喎，點解呢？我諗應該係因為個題材夠吸引，係「第二種電気工事士の実技試験の候補問題1番を作るよ」，唔會關佢件高叉泳衣事啩？

本田翼喺大約8年前2012年已經喺「JR SKISKI」CM演出過，有冇印象？冇唔緊要，入嚟有回帶。不過個人覺得8年後仲可愛，連環幾條片又嗌又瞓雪地又盛，好想去日本滑雪呀！雖然我唔識。

浜辺美波主演嘅真人版《狂賭之淵 (賭ケグルイ)》外傳《狂賭之淵 雙(賭ケグルイ双)》嚟緊3月26日開始配信，咁啱啱就有60秒影片睇到啦，女主角「早乙女芽亜里」森川葵之外，仲有崎山蒼志〈逆行〉主題歌，仲有連「夢子」浜辺美波同「鈴井」高杉真宙都有出演。

Wii掂，WiiU唔掂(其實我覺得都好玩)，Switch又掂，原來今日3月3日，已經係Switch推出4周年，4年前你係咪第一時間買機？咁多年嚟玩得最多時間嘅係邊隻遊戲？真係未必估到嘅，我自己係《Dead Cells》，隔籬嗰位就《動物之森》……講番依家，全球已經賣出7,987萬部，面對PS5、Xbox新機又缺貨又冇乜新Game，依然每星期領先銷量，都勁吖。

其實異形呢個題材，要出隻好玩嘅射擊遊戲應該唔難吖？嚟緊又有一隻挑機，由Cold Iron Studios開發，協力型第三身視點，有五種類兵種，30種以上武器，敵人都有超過20種類以上，似乎係幾對辨，2021年夏季推出PS4/PS5/Xbox Series X/Xbox One/Steam版本。

太極樂隊成員唐奕聰猝逝……好Sad。人真係好化學，可以毫無先兆，話去就去，奉勸大家都係多行善事，珍惜眼前人喇。RIP，一路好走。

仲有5日，3月8日就要同真嗣一樣，同所有EVA說再見。咁香港仲未有消息啦，又飛唔到去日本睇，大家都應該好驚被劇透，但似乎都好難唔中招，我只能夠喺度承諾不幸見到嘅話會自己捱咗佢，唔會報道關於劇透嘅消息……咁日本呢，有電影院嘅職員就呼籲大家離開戲院附近範圍時唔好大聲討論劇情，因為可能有好多人未睇，仲更可能有人等緊入場睇！之後就有人回覆話當年等入場睇《天氣之子》時就中咗招，聽見有人話「Happy ending真係好呀！」再嚟又有人講當年《THE END OF EVANGELION》散場時，大家都好似喪屍一樣唔講嘢，唔知今次會唔會一樣？呀！好期待呀！

PS4《機動戦士ガンダム EXTREME VS. マキシブーストON(Mobile Suit Gundam: Extreme Vs. Maxi Boost ON)》都出咗半年有多，咁未玩嘅可能係未玩過呢個系列，又想試吓啱唔啱玩？其中一個方法係買二手啦，不過Bandai俾多個足不出戶嘅方法你，就係推出STARTER EDITION，3,000円，香港賣$249，就可以玩到部份機體部份內容，啱玩先再升級。

好了，又來特別版了，邱福龍第225期《山海逆戰》推出特別版，有A版「戰神勾徹」同B版「炎神殞滅」兩個封面選擇，各包專刊及一張3D立體畫，各售$68。「收藏家港漫專區」開訂，龍少Fans豈能錯過。

早排喺港島區出現嘅李小龍主題電車，唔知大家有無打到卡呢？無都唔緊要嘅，事關阮繼增同Dear Jane主音Timothy開攝影聯展《Salute to Our Legend Bruce Lee》，向一代功夫傳奇致敬。

惻隱之心，人皆有之，邱福龍唔例外。話說佢早前透過面書朋友留意到單奪命工傷新聞，地盤工身亡，剩低老婆同幼女惶傍無依，為此佢捐咗$1000聊表慰問之餘，並喺嚟緊「福龍週記」以四分一版位作呼籲，希望大家幫吓手捐錢，「多得一蚊得一蚊」。成件事好人間有情，OK，咁如果大家有餘力的話，就幫吓手喇。

呢位Coser「赤木クロ」一向都有畫漫畫，不過係成人向，今次係首次有作品係「一般誌向」，喺《近代麻雀》連載。啱啱噚日3月1日發售，咁當然都有Cosplay拎住本漫畫雜誌影吓相，而且Twitter同IG都幾好睇，可以跟進吓。

好咯，咁先係路吖嘛，想當日話唔出就唔出，我都不知幾Hurt，依家一天都光晒了。多謝牛佬，佢剛剛喺面書出Post，話「延續未完的故事！洪興史上最轟烈的一役」，打算出番《古惑仔》復刻珍藏版（十九），即〈洪興八壯士篇〉第10期，兼隨書附送禮物，叫大家密切留意出版日期同銷售方式。Happy！不過我好貪心的，希望牛佬可以出到第2335期大結局為止。

Very soon，我哋又有機會欣賞到林祥焜大作喇，佢為集咖啡、餐廳同Salon於一身嘅「Base8」創作巨幅牆畫，首階段完成。從面書所見，牆身暫時只得黑白稿，但Raw Raw哋已經有極震撼視覺效果，期待快啲真正著色，到時肯定更加正，一定要去打卡。

撐開頭六期，無理由唔繼續撐落去。留意番，許景琛《龍虎門Z》第7期將於3月12日出版，老例普通版有可以合併封面嘅「正」同「邪」兩個版本選擇，各售$68。特別版亦繼續分A同B開訂，A版包8+1閃卡，售$118；B版包之前提過嘅黑級浮屠浮雕金屬卡連卡套，附親筆簽名，售$138。報告完畢。