繼續高質文宣圖欣賞會，今次要介紹嘅係面書專頁「HeungShing香城」，豬嘴、頭盔、黑衫、雨遮、旗幟、口號、面具、口罩等元素有齊，提醒我哋要Keep住團火，香港人加油。

相可以執，片呢……有日本網民就發現一條食嘢影片中，出現奇幻嘅空間扭曲現象，留意喺筷子位置……

出水炮車咁過癮吖拿？噴濕清真寺就即時死狗道歉，平時唔係好威嘅咩？今次終於知衰嘞咩？可惜吖，這邊廂幫手清潔班警察無演員道德，做Show咁做求其抹五分鐘了事；那邊廂阿尊貴特首已經跪低道歉，偏偏又有啲甚麼警察員佐級協會二打六主席大放厥詞話道歉不代表我，真係一地花生殼，笑大人個口。清真寺染藍，網民紛紛出圖抽水，以下呢四幅網圖呢，若果擺啱個次序，我覺得直頭可以當四格漫畫咁睇──第一格，有請Felix Ip「水炮惡機」出場，演繹擒日喺彌敦道出現嘅星戰場面；第二格，網民「菇嘰迷因」接力，二創疑似伊藤潤二漫畫對白，寸警察幫手清潔多舊魚，以「一開始咪撚射咪得囉」作結；第三格，輪到謝曬皮記錄市民自發幫手清潔清真寺，盡顯香港人質素；第四格，Cuson畫藐嘴藐舌林奠趕赴清真寺道歉，耶穌、車公同黃大仙大呼大細超──成件事嘅來龍去脈，係咪好一清二楚呢？

嚟緊下個月，暴雪就會有Blizzcon 2019舉行，再之後就有《Diablo》新Art Book推出，不過當中就有人發現喺本Art Book嘅宣傳中提到「featuring more than 500 artwork from Diablo, Diablo II, Diablo III and Diablo IV」。照咁講，即係Blizzcon 2019會公佈《Diablo 4》啦？另外亦有消息指同時仲會公佈埋《Diablo 2 Remastered》。我知大家都未必會有興趣買同玩，我都係，不過得個知字囉。

之前見過CG圖你未必信，見埋相會唔會信多啲啲？PS5新機預定下年年尾上市，網上流傳就有PlayStation5開發機嘅相，真係之前咁V字形？不過放心，睇番PS4，開發機同真機推出時都好唔同。

香港學生去考試，大部份地方都有公共交通可以去到，但喺日本呢，有啲地方就唔係咁容易去，仲可能要步行一段路。有日本考生就出相，話去埼玉工業大學考場諗起《Hunter x Hunter》入面考獵人執照嘅考場，之後亦有人出圖話愛知縣中京大學一樣有條捷徑經過郊區，咁唔知去到會唔會見到冨樫喺度打緊機呢？

去得北海道紋別市，Seal Sea Paradise呢個海豹天堂應該都係必去嘞。入面啲海豹超肥超可愛，佢哋嘅官方Twitter都成日有新片睇。最近呢段就見到訓練員同隻海豹做按摩，睇佢瞇晒眼似乎好享受，入嚟有片睇。

柴仔有幾得意相信唔駛多講，今次呢隻日本柴就示範點樣為之放鬆嘅姿態。撻落個咕臣度，之後反轉個身，呆吓呆吓咁瞓喺度，搞到做緊嘢嘅主人都忍唔住要摸吓佢個頭，超可愛，入嚟有片睇。

Google Map經常都會拍到啲奇怪情景，最近有日本網民就喺Twitter分享咗張相。當時一個男人除緊另一個男人條褲，仲露出咗半個屁股。之後網民發現佢哋其實係藝員宮川大輔同山崎弘也，當時佢哋應該同攝製隊一齊拍緊嘢，入嚟可以親身喺Google Map追擊吓。

喵星人對於識郁嘅嘢會表現得特別興奮，最近有日本網民喺屋企睇緊欖球賽，點知隻貓仲興奮過佢，不停瘋狂咁抓部電視，超肉緊。咁搞法全程都睇唔到喎。

橋本環奈閒時鍾意去迪士尼，啱啱佢又出圖，仲要擰轉背部，其實都唔肥吖。不過今次佢就約埋個男仔去……同佢去嘅一男一女，就係萩原利久同上白石萌歌。

2020年6月上映，大家對《シン・エヴァンゲリオン劇場版》唔延期有冇信心？睇埋呢幾個Tweet，有啦。聲優緒方恵美同「カラー」都出咗圖，就係後半部份已經開始配音工作！

立體得嚟又極有動畫感覺，呢個用記事簿製作嘅動畫真係好高質，而且都有故事，講嘅係小朋友每日都經過病院嘅故事，仲有一種淡淡嘅感動。

講到日本「百鬼夜行」，你會諗起咩？好多動漫畫都出現過啦？我印象最深都係《Gantz》大阪篇，因為啱啱買咗大本版翻睇緊。咁啱啱喺周六，京都一条通商店街就有「百鬼夜行」巡遊，每年10月第三個周六都會搞，你睇吓個氣氛！好正喎！

很想要吧？許景琛手繪原畫真跡，我很想要，尤其只此一家嘅超靚Q版。想要，唔難，只要有錢，事緣佢開咗個專賣店，正式登陸Yahoo拍賣網，暫時所見有7幅原畫，Size由24x27cm標準畫板同A4任擇，價錢由$3500至$4000不等。睇啱的話，落價喇。