我好鍾意Tik Ka from East嘅插畫，呢輯《佛系疫經Fight coronavirus together》好正斗。如來合十，拒絕握手；觀音洗手，千手清潔；觀音下凡，面罩加持；連達摩祖師都變埋宅窩祖師，宅家打機唔出街，齊齊為抗疫出一分力。總括嚟講，畫面精緻有創意，想傳達嘅訊息亦正確，值得大家開心Share畀朋友仔睇。

喂，有無劇透呀？無呀吖，Good boy。我呢，就未有時間入戲院睇戲《Avengers: Endgame》，所以打算睇住插畫師Tik Ka from East《梨園復國者》系列畫作止住癮先。甚麼蛛師、忠國將軍、不詳人、奇將軍、軍機大臣、洛神將軍、快師、爆將軍、星將軍、寒將軍、紅女將、黑女將、豹師、鷹將軍、蟻師、箭神將軍、幻將軍、雷霆將軍同戰神將軍，全部變晒戲棚中人，睇造型就知畫緊邊個超級英雄，真心型。

Tik Ka from East多搞作，出品多樣化，甚麼聖誕關公Figure、揮春、玉璽等等，全部都叫人眼前一亮。最新有呢系列聯乘本地品牌Ginger推出嘅港產映画Tee，「神鳥鳳凰」、「忌廉血滴子」同「今晚打老虎」三個Print當中，我最鍾意後者，周星馳經典對白，有氣勢吖嘛。

「Santa Guan is coming to town~」我無唱錯呀，「Santa Guan」者，「聖誕關公」是也，此Figure乃Tik Ka from East作品，極有諗頭地將聖誕老人同三國名將關羽二合為一，慈祥變英氣，攣鬚變白長鬚，聖誕老人裝束變盔甲，主調色維持一貫嘅紅。最過癮係唔揹禮物袋，改執青龍偃月刀。限量300個，每個159美金，如果有人送呢份聖誕禮物畀我就好了。

插畫家Tik Ka from East手畫不嬲都Cult Cult哋，就算畫Halloween賀圖都唔例外，呢系列畫作好有個人風格，一望就知出自佢之手，如此高質，係值得畀手指公嘅。

中國水墨畫風聯乘Marvel超級英雄，再加萬聖節元素，造就插畫家Tik Ka from East創作「Super Heroween」系列畫作。個人最鍾意奇異博士一幅，側有題字「Vampire」，望多兩眼，Doctor Strange個造型又確係有幾分似西方吸血殭屍喎。

不嬲都鍾意面書專頁「Tik Ka from East」畫作，今次有「詠春」系列，疑似宇宙最強甄子丹惡戰異形、鐵血戰士、蝙蝠俠、狼人、Hulk、悟空、Ryu、哥斯拉、黑武士、佛地魔，當然唔少得李小龍，甚麼黐手、橋手、日字衝拳都用齊。畫風別樹一幟，有啲武俠秘笈圖譜Feel，係好正嘅。

真係無諗過可以將異形玩成咁，玉壐係中國嘢，異形係西方嘢，溝埋一齊直達瀨尿牛丸級數，如此零違和，係好正嘅。呢套異形玉壐由Tik Ka from East製作，一套四個分別為Alien Queen、Alien Warrior、Predator同Alien Egg造型，唔係得個殼，真係印得出字。$1,980，唔貴，當精品儲擺飾櫃好吸引，值得入手。

之前本網站都介紹過「Tik Ka from East」畫作，正呀呵？唔只畫，今年迪嘉為向香港電影致敬，聯同LIGO Design推出「港產映画」角色頭像系列，無睇錯的話，四個頭像，分別為《旺角卡門》烏蠅（張學友飾）、《食神》夢遺大師（劉以達飾）、《功夫》阿星（周星馳飾）同《少林足球》強雄（謝賢飾），Q版面相，一套四個$352。喺嚟緊動漫節，迪嘉仲會擺Booth，到時會有特別版供現場訂購添。支持本地創作唔係得個講字，唔該課金捧場。

點解我哋每年都記得4月1日呢個日子，唔係因為愚人節，係因為呢日係張國榮死忌。今年係2017年，時間過得好快，都14前年嘅事咯，家陣諗番起都仲係心有戚戚然，除咗哥哥，我仲好懷念14前嘅香港，懷念啲乜？不解釋……睇靚畫喇。

真心Like面書專頁「Tik Ka from East」嘅靚畫，畫風點形容好呢？寫實？肯定唔係；Q版？有少少係嘅，但又唔完全Q版得晒；水墨？又唔係喎，雖然睇得出有啲豪邁筆觸係用咗水墨；漫畫化？有啲係有啲唔係咁囉，側邊仲起埋題字……總之就唔識形容，炒埋一碟但又好賞心悅目喇。畫嘅計有《西遊記》角色、商品Icon人物等等，張張都好正，值得大家俾個Like。