等咗咁耐，第七季嘅《Game of Thrones》終於開播嘞，未睇嘅唔駛驚我哋唔會劇透，今次想介紹嘅係ThinkGeek推出嘅龍蛋調味罐，有齊3粒龍蛋，兩粒蛋放調味料，一粒用嚟放牙籤，賣美金$24.99，放喺屋企好霸氣。除咗調味料，ThinkGeek仲出咗個龍媽背囊(!)同埋龍蛋餅乾罐(!)，入嚟有得開吓眼界。

電影《Star Wars: The Force Awakens》新角色BB-8由於身形限制，要出產品都唔易，所以諗到出呢個茶壺嘅人都幾聰明。身形啱啱好都係又肥又矮，而且連個名都食埋字，叫Tea-B-8。一套茶壺連茶杯，全陶瓷製，ThinkGeek網站有得買，開價美金$24.99，即係港幣200蚊左右，有無BB-8迷想訂？

外國網ThinkGeek又有新嘢出，呢盞LED枱燈造型似足RPG遊戲入面嘅藥水，開著佢仲可以自動變紅、藍、黃，綠4種色，好有魔幻感。不過唔駛驚佢會不停轉色睇到眼都花，因為仲有一個功能可以調校至停定一種顏色。盞燈而家網上有得買，開價美金$39.99，即係港幣300蚊左右，唔算貴，RPG迷買咗佢夜晚開住打機，氣氛一流。

電影《回到未來》入面，除咗對識自動縛鞋帶嘅Nike波鞋之外，塊懸浮滑板都令人很想要，踩住佢凌空浮起喎，勁型！之前有公司Hendo Hoverboard喺Kickstarter成功集資，製作真嘅懸浮滑板，可惜要美金1萬蚊1塊，那有錢？好彩仲有Think Geek網站呢個買得起嘅迷你版，一樣都係玩磁浮，不過唔踩得只可以擺喺枱面做裝飾。塊滑板會不停前後飄浮移動，最重要係只賣美金$39.99，《回到未來》fans點都要買返個傍身啦。

打得PC Game嘅一定識Steam啦，今次真係名乎其實嘅Steam，呢部識噴蒸氣嘅電腦，配埋隻專用手掣，用嚟打機真係型，雖然玩食字係有啲老土。唔止噴蒸氣，下面有個位可以起火，仲有個窗口位比你睇吓啲玩燒得幾旺盛。可以行Linus或者其他OS，買得佢嘅都係想打機啦，佢配備Intel Core 4400處理器、NVIDIA GTX 960 GPU，最啱冬天喺室內打《BioShock》，氣氛夾到呢。ThinkGeek賣緊$399.99，咁平？睇真啲原來只限4月1日，噢，多謝喎。

一見到呢間「百獸王」機械人貓屋，雙眼即時發光。貓奴都會發現，市面上幾層高嘅貓屋選擇唔多，今次仲要有8條隧道，有排玩！呢隻「百獸王」記性好嘅日本動漫迷應該記得，呢，5隻獅子合體變機械人，之後仲紅到過美國叫咗做Voltron嗰隻呀！1984年由日本東映製作，眨吓眼又30年。不過估唔到一世英雄而家變成喵星人嘅玩具‥‥‥ThinkGeek有得賣，美金$189.99，不過成6呎高，放喺屋似乎勁得滯。

日本人叫Rockman，洋人叫Mega Man，中國人嗌佢洛克人，無論叫乜都好，fans見倒呢隻1:1炮彈手應該會很想要。有音效仲識著燈，套喺隻手上無實際用途，型囉！之前6月喺Think Geek都有介紹過，而家就直情可以訂，最勁係得到Capcom官方認可推出，價錢方面賣美金$79.99，6百零蚊港紙買比自己做聖誕禮物，唔貴喎！

間唔中都有呢啲土豪產品推出，今次到LEGO bricks，唔再係紅藍黃綠紅之類嘅彩色LEGO brick，取而代之變咗個24K金嘅LEGO，少少浮誇。呢套金色LEGO brick喺網站ThinkGeek有得賣，一包8件賣美金$24.99，兌返大約港幤$200左右。錢多得濟身痕想買真嘢？之前介紹過有真金LEGO賣，港幣10萬左右一嚿，仲有絨盒裝，夠唔夠豪？

日日氣溫超過30度，出親街都熱到溶，有乜好得過喺屋企嘆罐冰凍汽水？扭計骰大家都玩過啦，呢個扭計骰迷你雪櫃又點睇？唔扭得不過勝在夠顏色鮮豔，可以放到9罐汽水，開價美金$150，ThinkGeek網有得買。

好玩唔玩，又玩蟲！外國科技網ThinkGeek最近出咗幾款核突蟲罐頭，味道仲好豐富吓。例如有煙肉芝士草蜢、Wasabi蟋蟀、BBQ炸竹蟲、海草蝎子尾、鹽味黃猄蟻后，睇片見大家試食得好開心，脆卜卜好似唔錯，睇實物無圖片咁恐怖，反而試食嗰幾位個樣仲驚嚇‥‥‥一盒五罐禮盒裝賣美金$19.99，買嚟送比朋友睇波送酒一流。

一個星期之中，最難捱就係最期二。星期六日充完氣嘅身體最多頂倒一日，嚟到星期二，開始勁眼瞓狂打喊露，諗起仲有星期三、四、五，灰爆！呢個時候，好想趴喺枱面瞓返覺乜都唔理，最好有本晝枕一枕，好似呢本枕頭書咁就無敵喇。佢總共有三個款，包括《愛麗斯夢遊仙境》、《福爾摩斯》同埋《金銀島》，有書面書脊，揭開仲有內文，睇落軟綿綿幾好枕，最正係打開見到入面全部英文，睇見都眼瞓，好實用。網站ThinkGeek有得賣，美金$18起。

母親節就到，諗好送乜嘢比母親大人未？見佢晚晚追睇肥媽嘅《食平DD》，買廚俱實無衰啩？Star Wars又出嚟搵銀，今次對象係家庭主婦，呢套官方授權產品「R2D2量杯組合」高6.5吋，隻R2D2可以分成5個量杯3個量匙，開價美金$19.99，通過食品檢測保證安全，不過唔可以放入微波爐或者洗碗機。我哋覺得幾靚，不過媽咪鐘唔鐘意就好難講‥‥‥

唔好誤會，佢唔係Game Boy，係Travel Boy，如果唔係咪要比版權費？呢個擺明抄襲Game Boy嘅行李喼，懷舊機迷一望就勁有親切感，可惜佢無得轉game，唔可以玩俄羅斯方塊同孖寶醫生。個喼網上有得賣，仲要賣美金$70，一啲都唔貴。最重要係佢嘅呎吋只得22.5″高，14″濶，你可以hand carry帶埋部Game Boy上機玩，吖唔係，Travel Boy先真。

有無試過唔覺意赤腳踩咗上嚿Lego度？嗰隻痛到入心入肺嘅感覺真係痛到想打人！不過呢對喺外國網ThinkGeek見倒嘅Lego拖鞋，我就唔介意踩多兩踩。有齊紅、藍兩色，雖然唔係經典嘅2×4 Lego，而且相當大嚿，但係睇落好舒服喎。港幣200蚊唔駛，不過未包運費，另外有短片示範，係，我都唔明點解一對拖鞋都有短片，不過短片入面示範者個Lego頭我反而好想買，開個價嚟得嘛？

蜘蛛俠嘅Spider sense可以令佢對危險作出超快速反應，平時反應緩慢嘅我哋，都可以考慮買呢件蜘蛛俠電子T恤，件T恤本身無乜特別，全靠後面一個感應器，將佢夾喺頸後位置，當有人埋身就會震震吓提醒你，敵人行得越近仲會震得越快，嘩，咁行一轉旺角應該會震到頸都斷。ThinkGeek有得賣，開價港幣$300左右，十月返貨。