原來今年Sony PlayStation嘅E3發佈會發生咗段小插曲，話說介紹遊戲《Ghost of Tsushima》時，Sony搵咗人吹奏類似笛嘅樂器「尺八」，不過就引起網民Dani Jo喺Twitter嘅指控，話唔明點解Sony唔搵返日本人著返傳統日本服去演繹，而要搵外國人？件事仲牽連到種族問題，之後好多人留言鬧爆Sony，不過呢個時候有個日本人留言回覆，話其實演奏者Cornelius Boots係現存其中一個識呢種樂器嘅大師。留言之後，Dani Jo開始封鎖留言，之後仲刪埋個Twitter戶口。呢個故事教訓大家唔好跟車太貼，同埋鬧人前記住Google吓先。

aibo！記唔記得？99年推出，06年停產，早幾年唔幫你整，宣佈R.I.P.。原來係為咗新一代aibo(ERS-1000)。今日由平井一夫社長正式公佈，198,000円一隻仲要綑綁式上網3年，月費2,980円，暫時未有計劃賣海外。64位元四核，全身22個活動關節配，兩組6軸感應，180×305×293mm，重2.2kg，充一次電3小時，可以活動2小時。仲有好多嘢嘅，包括兩隻眼係OLED，又鏡頭又收音又盛，仲可以上網用雲端記嘢儲嘢學嘢，頭同背部仲有感應，即係你摸佢會有反應……但點高科技都好，個身硬嘅，冇毛嘅，冇生命嘅，同真正小動物相處嗰份愛，同佢應該建立唔到，所以其實我諗唔明，點解到呢個年代仲會出電子機械狗，出人吖嘛。又如果，真係好鍾意狗又唔養得嘅話，我建議捐咗嗰萬幾蚊出嚟，救貓狗小動物會仲有意義過養假狗。

呢條片主題係「New story with…」，AIBO呢隻SONY機械狗，1999年發售，2006年停產，o依家壞咗都冇得整喇……不過唔緊要，因為睇完呢條片，你就會知好大機會係新一代AIBO，11月1日公佈。不過凍冰冰，其實我唔係好明有咩好，不如去領養隻真o架啦！

今次冇收錢，唔係廣告，係真心佩服Sony拍呢條父親節宣傳影片。早排警訊有條片紅咗，做老竇嘅堅哥同阿女Toby加埋尖頭仔大家都記得，到底尖頭仔整親個頭之後有冇事？佢同堅哥個女嘅情路點行落去？又到底父親節流流，堅哥個老婆去咗邊？

呢個世界乜都有可能，地心吸力都可以係商機，砌石頭都可以賺大錢。日本石頭藝術師Kokei Mikuni心夠靜、手夠穩、有創意、有美感，擅長拿捏平衡點，用大大小小唔同形狀嘅石頭，砌出一個個直達藝術品級數嘅石陣。石陣有大有小，有圓有扁，靚到得到Sony青睞，搵佢拍廣告推銷MDR-1000X消聲耳筒，都合理嘅，耳筒成功消聲，人先可以無懼車聲人聲地盤聲，個心先可以靜落嚟，個心唔夠靜，人又點能夠集中？對手又點會穩呢？條片都拍得好型架，做晒實驗咁，最後Kokei Mikuni用石頭砌出「SONY」字樣，禮成。

原來噚日(7日)係SONY嘅70歲生日！喺1946年嘅5月7日，「井深大」同「盛田昭夫」已經創立SONY嘅前身，名為「東京通信工業株式會社」，之後去到1958年1月1日先改名為SONY。而呢個名嘅由來，睇番資料，係佢哋以「SONUS」，即係Latin字嘅「SONIC」，加埋「SONNY」而組合成，本來係「SONNY」嘅，但因為呢個字嘅發音同「輸錢」嘅日文同音，所以就刪咗個「N」字，變成SONY。話時話，SONY嘅產品，由Walkman、Discman、MD，同o依家嘅PlayStation都陪住我哋成長，不過，我就比較懷念佢中文名叫「新力」嘅年代，好聽過「索尼」。

近年好多品牌出盡力研發AR式眼罩，Sony個Project Morpheus一直未知幾時出，另一方面，有個品牌叫ZEISS最近就公佈咗另一個AR擴增實景眼罩VR ONE，重點係支援手機，睇片見倒可以將部4.7吋至5.2吋嘅手機裝上部機度，最新嘅iPhone 6或者Samsung S5都對應，而且價錢唔買，而家預訂做緊美金$99，有興趣可以睇片研究吓。

3字頭嘅好多都經歷過floppy碟年代，呢，一隻3.5″磁碟可以儲存1.44MB嘅資料，當年交功課都係靠佢。最近上網見倒呢部古董數碼相機，儲存裝置就係用floppy！呢部Sony Mavica MVC-FD88，99年出品，入嚟仲有片睇，原來Sony喺97年至2002年間總共出咗超過18個型號嘅floppy disk相機，眨吓眼咁就12年，而家CD-ROM淘汰緊(定已經淘汰咗)，唔知12年後嘅今日，仲有無DVD或者Blu-Ray呢？

大家留意! 今日下晝有一個記者會, 就係SONY Xperia Z3 Tablet Compact, 記者會今日時間2點幾開始, 最強當然係有得玩PS4 Remote Play, 據稱佢係第一部平板可以咁玩, 加埋佢個8”全高清顯示屏幕及搭載最新之hi-res音效科技, 都應該幾正, 一陣間我諗住過去碌碌, 得唔得之後話俾大家知。

有4K電視但一直冇乜4K片源, 真係人間慘事! 等如你明明打得十個, 但落到旺角班契弟走Q晒一樣! 日本SONY剛發佈有部4K播放器連USB HDD錄影機–FMP-X7會喺今個月18號推出, 佢嘅片源都幾多樣性, 好似有衞星放送嘅 4K試験放送Channel 4K、 スカパー！プレミアム, 用4K攝錄機拍攝嘅 4K XAVC S／MP4, 同埋4K動画配信（アクトビラ、12月11日スタート）, 據知連YouTube嘅4K片都睇到, 睇完資料, 就算香港有得賣都係半廢武功一樣!

香港Sony剛發佈, 防水Walkman播放器NWZ-W273S, 會推出全新限量版兩款新顏色, 分別係金屬黑同金屬紅! 容量非常大, 係4GB!!! 我記得十九幾年前我部MP3機只有16MB! 據知佢可以對應直拉FILE入去, 同埋Windows Media Player、iTunes嘅播放列表同步更新; 不過叉電係佢嘅強項, 1.5小時可以完全叉爆電, 並可作長達8小時音樂播放, 如果自認係心急人, 佢仲有一個3分鐘快叉, 叉完都可以玩到60分鐘。價錢OK平, 只要$750。

今年2月，Sony已經宣佈賣出咗手提電腦Vaio嘅業務，今日(2日)「Japan Industrial Partners」正式宣佈7月1日交易就會完成，而Sony到時只會有5%股份。講真，Vaio係貴少少，但啲機個樣係幾靚嘅，希望之後一樣會貫徹呢個風格啦。

  呢排SONY手機好似有啲起色! 冇計啦! SAMSUNG都真係用到悶悶哋! 以前買佢係乃念佢個二手價好……廢話講完入正題, 下星期二3月25號, SONY會喺香港開發佈會, 公佈 Xperia T2 Ultra推出, 暫時放出嘅官方資料, 話佢係一部6”大屏手機, 仲使用咗Sony最佳影像同顯示科技, 可帶來嶄新設計嘅高效能4G LTE Android智能手機, 並內置有趣的「實時美顏」等拍攝功能……不過最重要係新聞稿最後一句:「為用戶提供高性價比的智能手機選擇。 」高性價比喎! 係咪三四千蚊一部先!? 不過我覺得呢個界冇咁筍囉! 

GDC 2014，吉田修平同Richard Marks喺台上就介紹咗呢部「Project Morpheus」。簡單嚟講，係眼罩顯示器，不過同時可以感應到用家嘅動作，支援1080p顯示，視野達90度，聲音方面就支援3D聲效。除咗同PS4連動之外，仲可以同DualShock4、PS Camera連接，佢自己都話嚟緊遊戲嘅突破點應該就喺呢度喇。不過點都好，個樣係幾型，靚仔過Oculus Rift ，又係有條藍光o架！

下個星期真係好鬼忙, 又收到有記者會喇 ! 今次係Sony Xperia Z2同Xperia Z2 Tablet嘅香港發佈! 據知時間會係下周三! 相信到時一定會上報出機時間同價錢, 而且仲會喺好快推出市面嗰隻! 細佬我仲喺小道度收到風, 今明兩日, 日本嗰邊都會做正式發佈, 而且仲請咗唔少香港記者過去睇優先場添, 冇計啦 ! 呢兩部嘢, Sony都睇得幾重頭, 雖知佢嘅使命係同Samsung同LG特機王級機種硬碰硬, 再睇佢哋嘅配件, 專業收音咪、運動耳筒、NFC喇叭座枱架、藍芽遙控同Keyboard, 好明顯係想走多媒體多功能數線, 想擴闊手機同平板嘅功能界別, 呢個革命會唔會成功? 咁就要睇Sony功力喇!