Tag: Pen So

Pen So送聖誕Postcard 限量100張

Pen So手畫有幾掂,我諗唔使再多介紹,如果有買佢開嘅《本土回憶》Postcard第一、二彈的話,咁你應該好想儲埋呢張2016聖誕Postcard。今次有啲唔同,唔使科水買嘅,Pen So免費送畀你,限量100張,點先拎到唔該自己睇Post,總之就先到先得,手快有手慢無。

Read more ›

Pen So《本土回憶》Postcard第二彈 12月5日推出

即係好賣喇,唔好賣點會推出第二彈啫,Pen So《本土回憶》Postcard Set Series 2將會喺12月5日見街,今次一套七張,分別為〈新蒲崗〉、〈灣仔〉、〈銅鑼灣‧巨廈〉、〈觀塘‧月華街〉、〈灣仔洪聖廟〉、〈獅子山〉同〈美都餐室〉,幅幅都屬雕龍雕鳳之作,線條好密,像真度極高,心機之所在也。捧場買番套,之後依Postcard所示確實位置影番幅相,斷估都可以呃吓Like喎。

Read more ›

撐《Project 72》畫展 港漫人的老香港情懷

Good到無得再Good呀,可以聚集到咁多位港漫人,係絕對值得支持嘅香港畫壇盛事,講緊嘅係《Project 72》畫展,排名不分先後,有包括Cody Chow、Noel Mok、Pen So、Tony Yim、WaiMan Tsang、Wai On、白水、米奇、阿傑多、袁家寶、梁光明、梁偉家、梁瑋豪、畢亦樂、曹志豪、戇男、張君豪等人參與。畫作以七十二行為主題,盡顯老香港一面,好多位港漫人都率先各自喺面書登出畫作,好讓心急嘅你同我先睹為快。齋睇相都覺得靚到啪啪聲,唔到饒宗頤文化館睇真跡,絕對係你損失,我話嘅。

Read more ›

Pen So開迷你畫展 解構《香港災難》創作概念

都係要問番個老土問題,有無撐《香港災難》先?If有,又覺得好唔好睇先?If覺得好睇,又有無興趣聽吓作者Pen So嘅創作意念先?嚟緊11月12日,尖沙嘴圖書中心會舉辦「香港災難繪本解說會+絕命兩小時畫展」,Pen So會現身分享創作過程,有心捧場唔該拎定相機,皆因除可以同Pen So合照留念外,會場仲會展覽部部份原稿,而最最最最最重要嘅係,出席者即送《香港災難》追加配件包一大份,內有不作公開發售嘅全新信件同紙張。場地所限,報名從速,有畫睇有禮物拎,搵唔到藉口唔撐場囉。

Read more ›

香港原創同人誌即賣會 撐《Comic O》一書18個故事

擒日介紹過「香港原創同人誌即賣會」,今日介紹埋屆時現場可以買到嘅同人誌畀大家Look Look──《Comic O》,全書有白水《No Flying》、009《不可挽回》、Jackson Ng《幸運者》、周蔭龍《可有記起愛?》、Triple Oddity《23:59》、徐啟源《火山口》及Pen So、鄧俊棠、謝森龍異等18個漫畫家參與,喺面書望過部份稿件,水準都好高吓。雖然唔知賣幾多錢一本,但一書有18個故事,仲要個個故事都百分百原創,有排睇啦老友。唔阻大家時間望靚畫,望完,唔知有無增加大家嘅購買意欲?

Read more ›

網圖分享:高水準鬼月賀圖晒冷 野士創工送《屍殺列車》記事簿

睇咗《屍殺列車》未,我未睇,朋友話好好睇,所以我都打算睇。為宣傳,電影公司搵嚟埋野士創工合作,先喺農曆七月十四鬼節開始出「鬼月賀圖」,之後再由8月24日起至今日,玩有獎競猜遊戲,每日頭十位估中賀圖畫緊乜,即送謝森龍異限量版《屍殺列車》翻頁動畫記事簿一大本。記事簿固然靚,我都好想據為己有,但查實賀圖本身都好有水準,值得大家慢慢欣賞。

Read more ›

必搶Pen So x《九龍城寨》Postcard 一套七卡$60

使唔使畫到咁仔細?就係要!Pen So聯乘《九龍城寨》推出嘅Postcard,張張都可以用「精雕細琢」四個字嚟形容,一套七卡各有名堂,分別為兩張合併為一嘅「拆城」、「魔窟」、「冰室」、「天台」、「花籠」同「龍跡」,無錯,就係畫番《九龍城寨》漫畫版出現過嘅場景,限量150套,每套$60,書展必搶之選。另外,書展期間,幫襯余兒買番本《九龍城寨》小說第三期即送吉祥Postcard,買典藏版《九龍城寨》創刊號即送AV Postcard,送晒就無,都係嗰句,有買趁手。

Read more ›

插畫+筆記式繪本 Pen So《香港災難》畫風細緻

乜嘢叫畫風細膩,我諗Pen So本《香港災難》可以做範本,啲線條又多又密,密得嚟又唔會無晒焦點,呢啲咁震撼嘅構圖,真係無番咁上下功力都畫唔到。《香港災難》係第七屆漫畫新星大賽繪本冠本作品,Pen So喺面書咁樣簡介:「香港首本混合插畫+筆記形式出版,讓讀者和作者一起經歷香港災難發生的經過,結尾發人深省,沿途配上小配件,親歷奇境。」喂?我就係留意到呢七隻字,究竟乜嘢叫「沿途配上小配件」?唔通有得玩又有得睇?書展有售,拭目以待。

Read more ›