Post Tagged with: "NES"

有片    木製手提遊戲機   連8″芒即開即打
by / on 04/07/2014 at 7:16 am

有片 木製手提遊戲機 連8″芒即開即打

手提遊戲機除咗3DS同埋PS Vita外,仲有呢個選擇。呢部叫R-Kaid-R嘅木製遊戲箱,打開之後有個8″嘅800 X 600芒,叉一次電可以玩足8小時,入面插住張16GB嘅SD咭,有佢自製嘅OS同介面,可以透過模擬器玩Neo Geo、PS1、Atari 2600、Gameboy、NES同埋SNES嘅遊戲,不過賣得好貴,要美金$3400,夠買7部PS4或者Xbox One喎。

Read more ›

LEGO神人新作   Apple II電腦網上預訂
by / on 13/05/2014 at 7:05 am

LEGO神人新作 Apple II電腦網上預訂

LEGO神人Chris McVeigh乜都識砌,最鐘意砌懷舊電子產品,好似之前砌嘅NES有得入帶好過癮。不過佢最鐘意都係砌蘋果系列電腦,最近佢又有新作,砌咗呢部超懷舊嘅Apple II電腦,蘋果迷應該好想擁有。畫面上嘅半圓柱畫面用CustomBricks造,機背仲有個扮電線嘅細緻位,好有心思。想買返台可以上Chris嘅網站預訂,開價美金$89.5。而我最欣賞係佢嘅網站教埋大家點樣用自己嘅LEGO砌佢嘅作品,極詳細真係可以step by step跟住砌,好明顯佢係為興趣唔係單純為錢,Like!

Read more ›
LEGO神人新作    任天堂NES可以入帶
by / on 21/02/2014 at 7:14 am

LEGO神人新作 任天堂NES可以入帶

LEGO神人Chris McVeigh之前用LEGO砌過懷舊Mac機同埋C64個人電腦,靚到震!之後仲撈過界,砌埋LEGO版嘅遊戲機,而且係古董級嘅Atari 2600,入嚟有回帶。最近佢又有新作,就係好受歡迎嘅任天堂NES,隨機仲跟多兩隻手掣同埋兩盒遊戲帶,兩盒帶仲可以入埋落機,好detail。入去佢嘅個人網站有得預訂,賣480蚊港幣左右,唔算貴,預計3月3日出貨,呢兩日佢仲會上載埋砌機嘅步驟,想DIY齋學嘢都可以入去切磋吓。

Read more ›
忍者龜NES灰機    ebay賣港幣一萬蚊
by / on 27/12/2013 at 11:53 am

忍者龜NES灰機 ebay賣港幣一萬蚊

好叻搵錢嘅懷舊機迷Ryan Fitzpatrick,繼之前重製嘅Mega Man 2任天堂灰機之後,最近又整咗部忍者龜NES灰機放上網賣,ebay而家bid緊美金$1275,接近一萬蚊港紙,好貴。除咗機面有四格不同角色嘅忍者龜,四隻手掣都係不同角色做主題,加埋啡色嘅插蘇,擺明出盡力希望賺忍者龜迷銀包入面嘅錢。入嚟有得回帶睇返Mega Man 2任天堂灰機,仲有Castlevania、孖寶兄弟主題嘅灰機,梗有一款開正你嘅童年回憶。

Read more ›
機迷專用聖誕樹掛飾       懷舊手掣贈興
by / on 10/11/2013 at 12:50 pm

機迷專用聖誕樹掛飾 懷舊手掣贈興

仲有個幾月先到聖誕,偏偏啲商場全部亮晒燈擺晒聖誕燈飾,提你買聖誕禮物嘛! 我呢,就習慣喺屋企擺棵聖誕樹等場面無咁冷清,啱啱喺外國網見倒呢套一式四件嘅懷舊遊戲手掣賣,有齊PS1、NES、Atari同埋世嘉,係無我最想要嘅聖誕禮物 — XBox One同埋PS4。全部細細件,專門設計比你掛上聖誕樹,啱晒聖誕節一個人喺屋企打機嘅機迷‥‥‥妖,講呢啲。

Read more ›
求婚新招    破解《魂斗羅》   爆機畫面冧女
by / on 26/07/2013 at 11:12 am

求婚新招 破解《魂斗羅》 爆機畫面冧女

動漫婚禮介紹過唔少,不過今次再有心思啲,外國玩家Quinn為咗同女朋友求婚,破解咗紅白機嘅《魂斗羅》,之後氹女朋友一齊打,一開機揀角色時兩個角色變咗真名Amy同埋Quinn,之後過關一直同平時無分別,直至過關後畫面突然彈出求婚字句,咁冧結果當然係Happy ending。佢仲分享埋製作過程,但大前題係你要有部仲郁得嘅紅白機先‥‥‥

Read more ›

我的80年代  任天堂R.O.B.機械人枱燈Etsy有得賣
by / on 03/07/2013 at 7:16 am

我的80年代 任天堂R.O.B.機械人枱燈Etsy有得賣

如果你認得呢隻任天堂80年代推出嘅R.O.B.機械人,你應該係一個好資深嘅機迷。呢隻當年隨FC豪華版推出嘅贈品,日本人稱呼佢為FC機械人,同步仲推出咗《Gyromite》同埋《Stack-Up》兩款對應遊戲,我懷疑彼思嘅Wall-E造型都係參考佢。最近有外國有玩家將R.O.B.改裝成枱燈,雙手可以擺左擺右,仲可以夾住支筆,好有童年回憶。枱燈喺外國網Etsy有得賣,港幣一千蚊唔駛,不過得一千零一隻,手快有手慢無。

Read more ›
《Halo》、《Call of Duty》變身8bit紅白機game帶
by / on 03/06/2013 at 6:59 am

《Halo》、《Call of Duty》變身8bit紅白機game帶

你無睇錯,呢幾隻《Halo》、《Call of Duty》、《Assassin’s Creed》真係變咗任天堂紅白機嘅game帶。講到打機,好多人最懷念都係紅白機時代,外國網站72 Pins將近年好hit嘅遊戲改成8bit Logo,再貼上你同我屋企都好難搵倒嘅紅白機game帶上面,再放上網賣,一隻賣成港幣100蚊,不過好多款式都已經賣清光。玩唔玩得?當然唔得啦,旨在懷舊吓開心吓啫。係就係幾無聊,不過有時做人為求開心,輕鬆吓無壞吖。

Read more ›
瑪利奥/公主變Punk友     任天堂親邀設計
by / on 11/02/2013 at 8:31 am

瑪利奥/公主變Punk友 任天堂親邀設計

Butcher Billy,巴西藝術家,機迷一名,由NES時代已經打起,喺佢眼中,打機同電影、小說、音樂一樣,都係佢嘅靈感源頭。呢輯Punk爆嘅Mario系列,係巴西任天堂官方雜誌《Nintendo World》親自邀請佢設計,Mario手執士巴拿、廁所泵,身上仲有好多孖寶細節位,堅係型。不過我嫌公主嗰樣太old school同埋身裁麻麻。入嚟睇,仲有大魔王Bowser雞冠punk頭露紋身造型,仲有呢件tee賣,啱嘅,藝術家都要搵食嘛。

Read more ›
任天堂部屋  放大版主機盒帶做傢俬
by / on 27/01/2013 at 2:05 pm

任天堂部屋 放大版主機盒帶做傢俬

呢間任天堂專用房認真厲害,由外國公司Pixel Art Studio設計,全部都係任天堂經典產品 ─ 放大版!包括大大張嘅NES主機咖啡枱、Mario Bros經典盒帶枱、兩張NES手掣杯墊,仲有掛喺牆上,用木造成嘅8-bit孖寶烏龜層架。部NES主機枱入面,仲設計咗位置比你放遊戲機同埋手掣。Etsy有得賣,全套開價美金$1350,嘩!過萬蚊港幣,唔怪得之仲有六套現貨,香港地啲屋豆潤咁細,我連部主機放喺邊都頭痕,全套傢俬?多謝嘞。

Read more ›