日本動漫迷最鍾意嘅《龍珠》，溝埋鬼佬最愛嘅DC同Marvel英雄會變成點？外國插畫師Pierre-Marie Lenoir就創作咗呢個叫「Fushion」嘅系列，仲學人用咗個漢字「融」嚟做主題，兩樣嘢溝埋一齊，估唔到又幾型幾搶眼喎。特別係蝙蝠俠著咗笛子魔童件變咗黑色嘅袍，睇落零違和感，仲有狼人變悟空，咦，紅色嗰位係咪蜘蛛俠？其實加啲想像力，蜘蛛俠都幾似變咗紅色嘅魔童。

好多人鍾意睇Marvel嘅超級英雄系列，不過只限電影版，無睇過漫畫原著，所以呢個由插畫家Kate Willaert創作嘅系列就又實用又好睇嘞。佢將古今嘅Marvel英雄合併做對比，可以睇返最早期漫畫原著嘅美國隊長、Iron Man、Ultron、變形俠醫、黑寡婦，原來同今日電影版真係差好遠。尤其是Iron Man，1963年嘅漫畫版唔講都唔認得係佢。

外國嘅設計師好鍾意用Marvel超級英雄做創作靈感，今次呢位美國插畫師Josh Lynch索性將超級英雄變晒狗狗，蜘蛛俠、蝙蝠俠、雷神、黑寡婦、Iron Man‥‥‥而我呢，最鍾意都係Hulk，零違和感，仲cute cute哋。

電影《侏羅紀世界》喺美國破埋《復仇者聯盟》嘅開畫票房紀錄，好威威。Marvel Studios唔介意之餘仲好大方，主腦Kevin Feige喺Twitter放咗張賀圖，一班《復仇者聯盟》嘅角色望實騎住恐龍T-Rex嘅男主角Chris Pratt，標題形容《Jurassic World》係「KING！」。睇真啲，隻恐龍手上面仲揸住咗雷神之鎚！張圖由Marvel嘅Andy Park設計，其實以往好多電影人都會識英雄重英雄，出賀稿賀對手套戲收得，入嚟有得回帶睇埋當年史提芬史匹堡賀《星球大戰》大賣嘅廣告稿，好正。

呢個概念其實可以好勁，而迪士尼同孩之寶呢條宣傳片都拍得好堅，只要著咗件「甲」上身，就可以變身Iron Man入虛擬世界救地球；又可以變成《Star Wars》絕地武士對戰黑暗原力……呢個新角色扮演玩具《Playmation》，就係俾你體感玩，可以利用「Avengers Gear」感應，配合app舉手射爆目標，仲會連接「Avengers Net」記錄成績，當然亦可以同朋友齊齊去空地玩遊戲……第1彈「The Playmation Marvel’s Avengers Starter Pack」有Iron Man裝備，Captain America等Figure，買埋其他Figure就可以投入更多虛擬世界。7月7日開始喺官網有得訂，10月發售，$119.99美元。唓！俾小朋友玩嘅！冇興趣玩都入嚟睇吓片，講多次，條片好正。

有錢真係好，可以有咁大間屋住，仲可以將間屋變成Marvel超級英雄豪華屋。呢間位於星加坡嘅屋，飯廳有大大張超級英雄poster，旁邊代表Avengers嘅「A」字係一個隱藏儲物櫃，至於客廳嘅電視就同神盾局S.H.I.E.L.D嘅標誌融合咗，睡房就以Iron Man做主題，最後廚房仲有變形俠醫破牆而出，成間屋根本就係Marvel嘅宣傳屋，住喺入面係就係有啲攰，不過招呼朋友晒命一流。

其實真係潛力無窮o架！《X-Men》可以變《XXX-Men》，Iron man都可以出到MarkXXX！仲有蜘蛛俠啲蜘蛛絲黐立立咁，難怪佢啱啱加入「Marvel Pornographic Universe」就可以同黑寡婦……最新仲有一套好好笑，抄《Guardians of the Galaxy》，Rocket Raccoon變咗雌性動物，而Groot就變咗木雕嘅巨鵰……放心入嚟睇，啲圖冇露點但有笑點。

可能我翻睇得太多，我覺得入面有幾個場面佢應該有參考《少年足球》嘅，不過真係拍得幾正。可能你都會諗過就係如果你有特殊能力會點運用，咁如果運用喺足球場上面呢？呢班嚟自Marvel嘅超級英雄，加埋街霸旋風腿阿Ken，仲有Harry Porter啲朋友、刺客教條、絕地武士全部集合喺球場，你用原力守龍們，我有蜘蛛俠飛踢，Iron Man高科技守龍，但係磁力王一出又冇計……最後，《魔戒》甘道夫一招：「You shall not pass！」唔pass咪好獨食？影片由「Ronnie Street Stunts」製作，一班Parkour、FreeRunning高手再加特技就係咁勁！

好強！呢場馬拉松電影自問Marvel電影迷都未必頂得順。復仇者聯盟2《AVENGERS: AGE OF ULTRON》4月30日上畫，美國戲院AMC同埋Regal Theaters就搞咗個「終極Marvel電影馬拉松」活動，由4月29日夜點6點起連續播放Marvel電影25小時，Iron Man、雷神、變形俠醫‥‥‥睇足11套戲一次過重溫，睇到最尾就係4月30日晚7點嘅《AVENGERS: AGE OF ULTRON》，夾啱晒時間！睇通宵仲要連睇25小時，有無人頂得順？不過完成咗之後會有個特別徽章送返，但係咁搞法，睇到最新嗰集復仇者恰眼瞓咪好唔抵？

記唔記得1個月前，美國隊長Chris Evans同星爵Chris Pratt嚟咗個美國超級碗賭局，話輸咗嘅就係著全副武裝去探訪兒童醫院？咁星爵就輸咗啦，佢亦都找咗數去「Boston children’s hospital」探訪。不過善事唔怕做得多，贏咗嘅美國隊長Chris Evans喺噚日(7日)都變裝去埋「Seattle Children’s Hospital」，而且仲送自己個盾俾啲病童等佢哋開心吓。咁講啦，《復仇者聯盟2》邊度駛靠呢啲宣傳吖，我諗佢哋真係有善心先會咁做，真英雄呀！

鍾意玩具攝影嘅，一定要認識吓呢位攝影師Edy Hardjo，佢最近好紅，好多外國網站都大篇幅報導佢嘅作品，影嘅絕大部份都係係Marvel嘅超級英雄，勁在每張相都配搭一個搞笑場景，例如成班一齊企埋牆邊屙尿、一齊追黑寡婦掟出嚟嘅bra、變形俠醫幫雷神剪頭髮等等，有幾款攝影師話淨係set甫士都用咗3個鐘。有啲相佢仲會做埋後期加工，例如變形俠醫露股嗰張，因為玩具本身Hulk除咗褲都有條黑底，所以就要靠後期P走條內褲，製作好認真，個股好圓潤。

外國經常見倒神級嘅特技化妝，好似《The Walking Dead》嘅喪屍妝我就好鍾意睇。呢位叫Lianne Moseley嘅靚女化妝師都好勁，強項係將真人化到好似美國漫畫嘅2D風格，效果好特別，佢最鍾意Marvel系列，Superman、Wonder Woman、綠箭俠、Jean Grey都畫過，有時佢連套衫都係畫出嚟，不過呢排天氣凍，Body painting似乎太凍，各位超級英雄都係笠返條衫以免凍親。

Marvel英雄《夜魔俠(Daredevil)》，陳年有套電影版，我都有入場睇過，不過印象唔太深，記得都唔算太爛。嚟緊4月10日又有美劇版本喺Netflix開播，官方發佈咗首條預告。男主角係Charlie Cox，佢演Daredevil，即係Matt Murdock，睇嚟第一季都係跟番原著，講佢由一位失明律師慢慢變成紐約「Hell’s Kitchen」嘅守護者！其他陣容仲有Deborah Anne Woll演Karen Page，Vincent D’Onofrio演Wilson Fisk/The Kingpin，Elden Henson演Foggy Nelson同埋Rosario Dawson演嘅The Night Nurse。

今朝美國Super Bowl，最後由New England Patriots勝出。咁呢啲大型體育比賽，梗係好多星級觀眾啦，《Guardians of the Galaxy》嘅Star-Lord，即係Chris Pratt同埋Captain America美國隊長Chris Evans就齊齊到場，而且仲同埋Anna Farris一齊添。仲有，原來係佢哋兩位之前已經公開咗對賭，Evans撐New England Patriots，Pratt就係Seattle Seahawks球迷，而賭注就係互相以Marvel英雄造型去探訪贏咗嗰位嘅地區慈善機構！以o依家咁嘅結果，即係Chris Pratt要以星爵造型去波士頓嘅「Christopher’s Haven」兒童之家探訪。有話題又咁有意義，唔怕賭啦！

唔好話Marvel vs. DC，要蜘蛛俠加盟復仇者聯盟嘅電影都仲傾緊。電影版《Marvel vs. DC》，我諗暫時都可以列作「有生之年」系列。呢位YouTuber Alex Luthor可能知道大家都好希望有生之年睇到，於是佢就將過去大量超級英雄片剪接埋一齊成為呢條預告。有啲位係剪得幾好嘅，不過可能你會發現超人、蝙蝠俠會成日轉人……