呢隻叫Albert嘅曼基康貓（Munchkin）最近喺Instagram好紅，足足有45萬個followers！佢嘅特別之處係鼻位有個三角形黑色印記，感覺就好似戴咗面罩咁，好有型。加埋圓碌碌嘅臉形同神秘嘅藍眼，難怪吸到一班痴心貓奴粉絲。明星即係明星，臨近聖誕，佢又有新造型相嘞，你睇個樣幾chok！

作為一個專業貓奴，日本攝影師Ryo Yamazaki嘅IG一定要follow。佢最鍾意就係用梳出嚟嘅貓毛，織成唔同嘅帽送返俾喵星人戴，貓毛出自貓身上，效果好好笑。最近佢就玩咗特朗普嘅經典髮型，前排又有萬聖節主題。屋企三隻喵都俾佢玩勻，不過睇啲喵嘅表情，似乎唔係幾欣賞佢嘅傑作喎。BTW，最近轉天氣，係時候趁星期六日幫佢哋梳吓毛嘞！

呢隻黑色嘅殭屍喵Monkey超可愛，兩隻又尖又長嘅牙仔，加埋烏黑嘅毛色，十足殭屍一樣。佢之前喺街流浪，好彩俾而家嘅主人Nicole Rienzie收養咗，當時嘅佢啲牙都無咁長，點知之後越生越長，搞到主人忍唔住帶佢去睇獸醫，好彩獸醫話雖然比較罕見，但係正常嘅唔駛特別處理。而家每次主人放相上網，都會有人懷疑張圖P過，其實佢對牙係貨真價實o架！

喵星人見得多，不過條脷咁長嘅真係好少見。呢隻叫Thorin嘅喵星人最近喺IG好紅，佢嘅特點係擁有一條勁長嘅脷，同埋一對好靚嘅藍眼，睇相見佢伸長條脷真係超可愛。BTW，條脷咁長，舔毛是咪可以慳返少少時間？食嘢又食得快啲，諗落都幾多好處喎！

日本藝人堀北真希而家安胎等緊生BB，不過日本網絡就熱傳疑似係佢妹妹嘅相集。其實之前都試過有兩張佢妹妹嘅相流出，但係今次網民搵到佢嘅IG (@nanami023)，仲有大量相片。原來呢個女仔而家做緊美睫師，間中都有幫雜誌做model。網民都大讚佢好靚女，仲話佢同堀北真希勁似樣。不過兩位當事人暫時仲未有公開回應，但已經令呢位「妹妹」嘅IG即時多咗大量follower。

如果要揀一個地方去旅行，近排好多人會揀呢個擁有粉紅色潟湖嘅Las Coloradas。全粉紅色嘅湖面，配埋粉藍色嘅天空，簡直係人間天堂，靚到好似FF出嚟咁，睇相都心曠神怡。呢個潟湖位於墨西哥東岸嘅一個小漁村Las Coloradas，上IG會見到好多人post相。同埋呢個湖嘅顏色堅係粉紅色，因為入面住咗好多紅色浮游生物同豐年蝦，佢哋會釋放顏色，不過全部純天然，希望其他地方唔會有樣學樣，整個人工粉紅湖出嚟啦。

呢對喵星人孖妹好靚呀！佢哋叫Iriss同Abyss，最近喺IG好紅，佢哋不約而同都有對唔同顏色嘅眼珠，一邊黃一邊藍，好似寶石一樣，配埋全白嘅毛色，靚到好似公主一樣。其實唔少喵星人都有雙色瞳，兩隻眼唔同色，醫學上叫呢種做「雙眼虹膜異色症」(Binocular Heterochromia)，亦有貓係一隻眼有兩隻色，不過唔駛擔心，專家話如果喵星人天生兩隻眼唔同色嘅話，視力係唔會受影響嘅。不過如果佢哋本來係普通顏色，之後開始變色嘅話，就要帶佢哋去睇醫生嘞。

靚女、機師、靚景、瑜伽，4樣嘢加埋喺網上真係無得輸。呢位女機師Maria Pettersson最近喺網上爆紅，喺IG已經坐擁20萬followers。本身做機師嘅佢，著起制服好型，不過佢仲有另一樣強項 ─ 瑜伽！由於工作關係，佢經常去世界各地，喺無敵靚景前做瑜伽，配埋靚樣同完美嘅身裁，簡直就係人類夢寐以求嘅生活，堅離地，不過睇吓都開心。

想學日文最好梗係識個日本男女朋友，不過難度太高。易啲嘅可以follow呢個IG戶口@nihongo_flashcards。佢哋不斷有新圖教日本生字，除咗有日文字，仲有埋圖畫、拼音同英文解釋，暫時集中介紹日本食物。每日迫自己記一個生字，下次去日本嗌嘢食都易啲。

睇返資料，我哋3年前都介紹過呢位馬南西亞靚媽媽Samantha Lee，估唔到3年後，佢依然繼續整不同嘅靚菜式，而且越嚟越紅，而家IG已經有73萬followers。雖然無見好耐，但佢整嘅菜式依然好靚，靚到好似一幅幅立體畫咁。而且食材都繼續好健康，入嚟精選咗佢最近嘅作品，有比卡超、龍貓、賤熊、蝙蝠俠、Minions，全部都好正。

作為父母，見到自己個囡成日放性感自拍相上網，點算好？外國呢位爸爸Chris Martin好出位，佢話自己唔想無出言阻止呀女Cassie，但就決定模仿呀囡嘅衣著表情自拍再放上自己IG，但醜化程度達到十級！而且佢仲扮得好細緻，由紋身到髮型到表情，全部都好一絲不苟。唔記得咗講，呢位爸爸其實係美國華盛頓嘅喜劇演員，唔怪得之咁好戲。今次突然爆紅，唔知呀女會唔會嬲咗佢？BTW，佢個女都幾靚，難怪佢擔心嘅。

有無人同我一樣，覺得呢啲爆炸頭好型先？Benny Harlem係個好出色嘅歌手，髮型仲好有特色，而佢個女Jaxyn就盡得佢真傳，大家都好爆炸。佢哋經常一齊影造型照放上網，一大一細爆炸頭撞埋一齊，效果好正，難怪喺網上引起好大迴響。佢嘅IG有大量新相，全部都好似影時裝特輯咁，入去有得慢慢睇，仲有埋佢老婆嘅相，都幾似樣，但髮型唔似。

作為資深貓奴，呢個IG一定要follow呀！呢隻黑白喵星人叫公主Cheeto，佢嘅主人經常幫佢影靚相，仲會搞到佢一頭都係，例如成頭公仔麵啦、芝士條啦、蕉皮啦，總之就好唔得閒，但全部都係有得睇無得食，因為所有相為咗Cheeto嘅安全著想，全部都經過後期加工，即係全部都係假架，無得食架，真係陰功豬。BTW，入去佢IG戶口仲有大量靚相，好好睇。

呢個星戰迷好有生活品味，鍾意飲威士忌，仲改咗個名叫Scotch Trooper。正職係攝影師，得閒鍾意幫白兵公仔影相，仲要加埋佢至愛嘅威士忌，效果好特別，層次好高。另外佢仲有另一個副業，就係將舊威士忌樽改裝成枱燈，好靚，一盞賣美金$240，仲要好多款式已經售罄。

美國隊長Chris Evans單手吊起自己谷老鼠仔嗰段片有無睇？身邊好多女仔睇親都尖叫，證明大隻加靚仔堅有market。最近挪威靚仔軍官Lasse Matberg都喺網上爆紅，走相同路線，6呎6吋高，IG有超過31萬粉絲，不過相比起隊長，佢再大隻啲，頭髮又再長啲，而且好貪靚，啲鬚留到剛剛好仲修剪得好齊，不過表情真係chok咗少少，同埋肥咗少少。