李小龍80歲誕辰，龍迷可以留意吓呢隻G-Shock旗艦系列MRG-G2000BL，睇條鮮黃色表帶已經知向《死亡遊戲》致敬；睇埋錶背，有個經典「截拳道」太極圖標誌，外包「以無法為有法，以無限為有限」字句；錶面呢，則有黃色「龍」字點綴，襯埋1至12點黃色刻度同整體黑色主調色，係幾型嘅，限量300隻。不過我睇勻成個網頁，都唔覺有標明價錢，究竟賣幾錢呢？

《變形金剛》迷留意，G-Shock迷都要留意，有請兩者聯乘嘅柯柏文變形手錶套裝出場！睇盒，型到以為係模型，大大盒好搶眼；錶呢，6900系G-Shock；顏色呢，經典紅搭藍主調色走唔甩，錶面有「TRANSFORMERS」字樣，顯示屏有「博派」標誌發光燈；如何變形呢，自己睇相，不過今次唔係變貨櫃車，係變一個疑似太空船物體嘅錶座；售價呢，29000日圓。係型嘅，$2000貨仔，抵玩。

今年係G-SHOCK誕生35周年，亦都係漫畫《哥布拉(コブラ)》開始連載40周年，所以兩個又搞合作，出咗4款G-Shock，全部同價，22,500円未連稅。透明好靚，而且見到隻金，似唔似主角宿敵「クリスタルボーイ」？

之前隻RX-78 Gundam G-Shock返貨好難，要買好難唔捱炒，馬沙迷嚟緊又要搶喇。今次輪到馬沙專用型，相比2010年3月出嗰隻，型號唔同，不過今次都係全隻紅色，表背就唔只係得紅渣，仲有馬沙剪影！12月中開始預訂，下年2月至3月出貨。價錢未定，新貨款可以入嚟拼一拼。

G-SHOCK我近年都好少戴，不過今次搵咗日本動畫大師大友克洋畫宣傳海報，的確好搶眼。有軍事迷彩陸戰隊員、機械人、太空人、十足紋身拉麵師傅嘅救火員，再加多隻喪屍，每人不約而同都戴住隻黑色新款「RANGEMAN」G-SHOCK，賣點係強悍同埋耐用，所以搵嚟呢五個代表人物，喪屍都用，似乎真係好耐用。

到貨！《One Piece》同G-Shock合作推出、全球限量3,000隻嘅「Strawhat Crew」G-Shock有得賣，發光之後背景有骷髏頭，表帶有各主角同千陽號剪影，仲有個金屬盒先至靚得交關。之前冇訂到，o依家嚟後悔？仲有最後一個機會，寫呢篇稿時G Point仲有一隻現貨，賣$2,380，日本原價18,500円，但限量3,000隻，我諗o依家冇可能原價買到，所以，價啱就要手快。

年頭都出過，但o依家出新版喎。Casio G-Shock興極都仲興緊，大把人戴，易襯衫吖嘛，啱啱就公佈下年3月會同《One Piece》合作推出全球限量3,000隻嘅「Strawhat Crew」G-SHOCK，發光之後背景有骷髏就基本嘢，仲有條表帶有各主角同千陽號圖案，不過個人嚟講，覺得最正係個金屬盒，買返嚟唔裝表裝其他嘢都得。日本定價18,500円，葵涌廣場G Point開訂$2,200，收訂$1,000，額滿即止，有愛就唔好諗咁耐。