眼利讀者應該睇到上期《新著龍虎門》有兩格出錯，一格講蚩尤打斷白仇條機械臂，旁白寫蚩尤係「獵神者」，失驚無神升咗Grade；另一格係埋尾嗰頁，小虎對住易天行講：「知道！」無頭無尾都唔知知道啲乜，自言自語傻仔咁款。為補鑊，今期第918期出番更正啟示，將「獵神者」改番「勁敵」，而易天行原來係有對白嘅，對白係：「可以開始修復你的經脈了，緊記，對我要絕對信任。」人誰無錯，肯補鑊，有錯就改，應該畀番隻手指公佢。另，今期新出場嘅甚麼鐵帽子王燕山河，一身造型似唔似聖鬥士？加埋顏色橙橙金金咁，仲要頭盔又有角，似唔似金牛座黃金聖衣？

  天馬流星拳、盧山昇龍霸、星雲鎖鏈、鳳凰幻魔拳……好心急！仲未有時間過銅鑼灣打卡！講緊嘅係時代廣場「聖鬥士星矢30周年展覽」，一比一12星座黃金聖衣列陣任Selfie，相至少都要影12幅，呀，唔係，加埋雅典娜女神，係至少影13幅至啱，今鋪真係要燃燒小宇宙，有排影。

柏青哥喺日本真係好大生意, 成日都可以同唔不同動漫人物做Crossover, 最近新搞作就係「パチンコ聖闘士星矢 星の運命」, 為咗宣傳, 仲癲到喺秋葉原搞咗個1:1黃金聖衣展覽, 係最人氣嘅人馬座同最神秘嘅雙子座; 你睇人哋日本人幾有品吖! 冇裝箱、冇圍欄杆要你離台10呎, 但人人都唔會話又摸又瀨, 最多都係踎底裝吓……話時話, 佢哋真係裝乜呢吓! 真係好希望佢柏青哥長出長有, 快快手出齊12宮黃金聖衣! 不過估計呢批1:1黃金聖衣嚟港機會非常低, 須知香港連柏青哥機都冇返, 你話係咪採你都傻先!?

  鍾唔鍾意聖戰士登霸先？如果你鍾意的話……你起碼有三張野！我記憶都好模糊，仲記得係由《漫週》睇起，當年機械人隻隻硬線條，突然０黎隻昆蟲機，的確搶眼！