Tag: 黃水斌

網圖分享:港漫人2017新年賀圖

網圖分享:港漫人2017新年賀圖

  睇港漫人新年賀圖啦喂!2016年有何不快不安不忿不足不甘心不情不願,唔該統統抹晒佢,踏入新一年,大家醒神呀。展望2017年,大家機繼續打劇繼續煲公仔書繼續開開心心睇,本網站祝大家新年進步,身體健康。

Read more ›

網圖分享:2016港漫人的聖誕賀圖

一年容易又聖誕,2016年話咁快又得番幾日,普世歡騰嘅日子,大家好應該過得得開開心心,之前有乜不快,唔該統統抹晒佢。港漫人出聖誕賀圖,排名不分先後──王澤、Eric Chow、何志文、杜比、Chan Ming、Cuson、孫威軍、馬遜、鄧本邦、廖光祖、Jim Lai、是但哥、黃國興、門小雷、林祥焜、丹青、黃水斌、邱福龍、崔成安、Tommy Lin──請慢慢欣賞,本網站仝人亦祝大家聖誕快樂,新年進步。

Read more ›

《今晚打喪屍》漫畫化 誰是主筆等余兒開估

拿,余兒呢個Post係11月3日出嘅,曰:「好耐無搞漫畫,今次有啲啲壓力,因為⋯⋯《今晚打喪屍》漫畫化決定!主筆犀利嘞,大家估下係邊個?」而我遲遲都唔報呢單News,係因為等開估,點知等到今日11月8日,余兒都仲未肯爆料邊個畫,有人估夏偉義,有人估牛佬,洪永仁、伍永新、白金龍、上官小明、葉偉青、胡紹權、甘小文、上官小寶、上官小威、黃水斌甚至連黃玉郎同馬榮成等等都有人估……余兒,究竟幾時開估?幾時出?乜形式推出?好期待。諗諗吓,一本純本土創作嘅小說先電影化再漫畫化,都咪話余兒唔叻仔,讚!

Read more ›

咁賤都得?冒充水斌親筆畫拎去賣?

瀏覽面書,忽見黃水斌出Post,附兩張畫作,一聶風一步驚雲,並留言曰:「在網上看到的,此君無相神功確有一手,可惜簽名就…………」嘩!有人模仿佢畫風兼冒充簽名,此舉有可動機?唔通誠如讀者Yuk Fai Yeung所講:「既然畫到咁,係咪又攞出去呃錢?」如果真有其事,咁就真係乖乖不得了,扮主筆親筆畫拎去賣,真係賤到無人有!不過我相信都幾難呃到人,一,誠如水斌所言,簽名唔似,筆跡呢家嘢,根本點「無相」都「無相」唔嚟;二,畫作徒具其形,無其神髓,步驚雲一幅都尚可,聶風一幅線條唔夠綿密,透視都有啲錯,個眼罩畫得古古怪怪咁,畫功同水斌起碼差兩班。等錢使呢家嘢我梗係明,親筆畫有市有價我都明,但真係唔該唔好渾水摸魚囉,尊重吓主筆們好唔好?

Read more ›

超Sexy美少女擺心口 Fruit Punch time第五彈開訂

越來越發覺黃水斌份人都幾有趣,Fruit Punch Tee第五彈推出之初,先喺面書登一張美少女全身圖,留言話:「主題係……明天公報!」好嘞,到咗明天嘞,佢又登兩張圖,大頭美少女圖與靚股配波鞋圖各一張,即係又要人估主題啦;Finally,終於有真身睇嘞,Wow,主題原來係「Just Do It」,圖案原來係全裸美少女肉體橫陳零舍銷魂,誠如佢咁話:「喜歡的便放膽試!」咁Sexy,你又有無膽著出街呢?照舊每件$280,照舊12件,有興趣快快PM水斌啦。

Read more ›

向Mark哥致敬 黃水斌Fruit Punch Tee第四彈登場

黃水斌Fruit Punch Tee去到第四彈,今次主題係「向喜愛的電影角色致敬」,即係邊個呢?即係發哥囉,咁即係發哥邊個角色呢?咁梗係《英雄本色》Mark哥啦。不過據水斌喺面書講,由於涉及肖像權問題,所以第四彈會註明「Not for sale」,即係唔會公開發售,新Tee會用眾籌形式推出,價錢同樣係$280,Tee係黑色Tee,隨Tee送多張原畫相片,有興趣嘅朋友可以直接PM水斌。

Read more ›

黃水斌Fruit Punch Tee第三彈開訂 馬賽克遮住圖案要你估估吓

廢話唔多講,直接報料,黃水斌Fruit Punch Tee第三彈正式開賣,一如以往超限量12件,隨書附送Postcard一大張。過癮在黃水斌喺面書發放消息,貼相嗰陣刻意用馬賽克遮蓋Tee圖案,留言話:「當收到產品時,格仔會被消失的。」估唔到佢份人都幾風趣!實情係早一日,佢登過兩幅作品,一幅畫長髮美少女大頭,一幅畫Pat Pat有紋身嘅長腳。比對兩幅作品同馬賽克,你大大大大大大有機會估到圖案係乜。執筆嗰陣,已經有五個讀者留言話「要」,一個讀者留言話「Need」,即係話已經賣出一半。想擁有?執輸行頭慘過敗家,唔該快快手落訂喇,每件$280。

Read more ›

黃水斌《時空少女》講明小眾嘢 讀者熱烈討論出版形式

之前報導過話黃水斌打算推出科幻漫畫《時空少女》,究竟以乜形式推出呢?唔使估估吓,黃水斌喺面書咁講:「(時空少女)這本漫畫會以類似欲望的精裝形式出版!不是主流的薄裝!又係小眾嘢!」小眾嘢?絕對唔Mind,相信好多讀者都同我一樣,幾Cult都接受得到,大家仲提出埋唔同意見添──Shin Yong咁話:「我要黑白版!!」、Dixon Chui又咁話:「黑白精裝,內頁加插幾張彩稿……正。」我同意!水斌畫風好多線條,其實出黑白稿仲好睇過彩色稿;Eric Chow咁話:「有書套,加埋内頁有少少特别紙,一期完越厚越好!要改一向出版模式至重要。」我都同意!有書套感覺始終貴格啲,賣貴啲都唔拘架。面對讀者留言,黃水斌話:「意見一定會聽。」咁唔爭在我都講埋一份──最好唔好用番《欲望之翼》個書度喇,係好靚,但實在太大本好難收藏,摺摷咗會肉赤架嘛。

Read more ›

大渡2016聚餐 漫畫價先開賣+飛鏢機試玩

啪啪啪啪!「大渡」肯再次搞聚餐同讀者拉近距進,絕對係好事,值得掌聲鼓勵!不過今次唔係一般食餐飯影吓相就算,仲可以掟埋飛鏢添,所以聚會場地唔係食肆,而係酒吧「Festa」。臨場除可以優先購買崔成安《猛龍過江》DVD Boxset同黃水斌《慾望之翼》第四期完結篇外,仲可以玩玩最新出籠嘅鳯凰電子飛鏢機,平時落開吧劈酒掟鏢嘅朋友一定啱玩。價錢未定,有興趣請致電漫畫店「至Goal Club」同「尋回‧漫畫檔」留位。

Read more ›

等到頸都長 第三期《欲望之翼》10月30日見街

出喇,出喇,大渡呢次應該唔會甩拖喇,講緊嘅係黃水斌本極極極極極極不定期刊《欲望之翼》第三期,鐵定10月30日見街喇。用到五個極,可想而知對上一期都唔知係幾耐之前嘅事咯,無計喇,鬼叫水斌手畫咁正咩,$78就$78喇,撐我就一定撐架喇,不過煩在要重溫番第一二期,先記得個古仔講乜咁解囉。

Read more ›

第三期《欲望之翼》十月中旬出版 有封面睇

《欲望之翼》究竟係乜嘢刊呢?月刊?季刊?都唔識講,姑且叫不定期刊喇,黃水斌慢工出細貨,預咗,但都唔好要廣大讀者等咁耐喇。好喇,大渡又出廣告話第三期《欲望之翼》將會喺十月中旬見街,仲登埋封面畀大家添。我留意到呀,封面註明「Vol.003 OCTOBER 2015」,照計呢鋪無走雞嘞啩。部份網友絕對講出我心聲,例子有小強小強:「終於聽到樓梯響……開心」、Kaho Cheng:「年刊《欲望之翼》。可以睇返頭2期,記返佢講咩喇。」點都好,希望呢次唔好撻Q呀,努力加油呀水斌!撐你呀!

Read more ›

大渡招收會員 會費一舊水勁多優惠

好事吖!大渡搞Fans Club 2015大招募,收得會員,證明呢間出版社仲有Heart搞好港漫,而首年會費只不過區區一舊水,就有N咁多個優惠。又A至F會員卡自選又送貼紙又送海報又免費參觀沙頭角農場又聚餐打折等等等等,詳細內容大渡面書張宣傳廣告已經List晒出嚟,自己可以慢慢琢磨,而當中我最Like嘅係,一旦成功成為頭50個會員,即送崔成安嘅猛龍過江+黃水斌龍爭虎鬥複製原畫稿A4卡一套10張,矜貴在講明非賣品,想買都買唔到呀老友,睇個勢,我呢條紅魚就無得慳架嘞,你呢?

Read more ›

一舊水唔貴 大渡水晶畫板開訂

大渡靈魂人物始終係司徒劍僑同黃水斌,所以新推出嘅「大渡漫畫2015精選水晶畫板系列」都以兩人畫作為中心。一套四款分別有司徒劍橋《108 Fighter》同《機甲猿神》、黃水斌《慾望之翼》男女主角各一款,每款限量100塊,附獨立編號,各售$100,暫定8月推出。一舊水,老實唔貴,絕對可以接受,有興趣入手者,請向「至Goal Club」預訂,報告完畢。

Read more ›

《戰譜》聽日創刊 第二期廿呎長內文晒冷

講咗N年嘅《戰譜》聽日終於創刊,大渡視《戰譜》為2015年重頭作,創刊號推出兩個版本屬意料中事,勁在事先張揚第二期會推出超長特別版,仲要老早預訂,第二期大鑼大鼓過創刊號,都算前無古人咯。

Read more ›

《欲望之翼》第二期出書屋特別版

好,因為「黃水斌」三個字,所以容許「慢工出細貨」,不過老實吖,唔翻睇番創刊號,我肯定唔記得《欲望之翼》個古仔講乜。望穿秋水,第二期鐵定2月14日見街,仲推出埋書屋特別版添,又係時候乖乖付款喇。

Read more ›