最近香港人壓力好大，有時可以放鬆吓自己。喺日本Twitter見到呢個自製機關槍裝置，貼咗張Rambo史泰龍嘅劇照出嚟，加埋風扇嘅震動同埋聲效，效果好真實，無聊得嚟幾有創意。之後有網民分享埋另一個希特拉嘅風扇裝置，好正，入嚟有回帶。

首先要讚一讚設計者好有創意，諗到將兔仔嘅兩隻手變成風扇扇葉。有日本網民發現呢把風扇同《JOJO的奇妙冒險》華姆ワムウ嘅必殺技「神砂嵐」好相似，不過兔仔嘅笑容就慈祥好多。

搞笑呀喂，有日本網民P-MAN唔知因乜事，將日本能面女子面具覆蓋住座檯扇扇面，日頭見到的話，成個畫面好有喜感；不過都恐怖呀喂，夜媽媽無開燈見到的話，一張白臉360度自轉，仲要瞇實眼睛笑住轉，可以想像有幾詭異，你都咪話唔驚。

佢表面上係一把遮，但實際上佢內藏風扇，只要撳遮柄個掣，就可以有涼風吹送，而且唔只，只要喺遮柄插支水，仲可以撳掣噴水，戶外活動擋太陽擋雨之餘，仲可以好涼快！產品名為「ファンブレラ」，價錢5,980円，入4粒電池就可以連續開5小時，咁重唔重呀？約513g。

有番咁上下年齡，你屋企都應該用過呢啲風扇？嚟緊日本會有迷你版，由Takara Tomy推出嘅「昭和シリーズ」第2彈「昭和扇風機」，感受「昭和の風」！而且可以用USB攞電，3,758円，6月推出，W100×H170×D100mm。

日本呢隻雀仔好貪玩，走咗上風扇扇葉嘅位置，最可愛係佢仲識跳跳吓，由一塊扇葉跳到另一塊，好可愛！難怪唔夠兩日已經有2百萬瀏覽，入嚟有得睇。

呢幾日落雨先冇咁熱，早排喺太陽下行街，真係行幾步就出汗，如果有把風扇吹吓就爽啲啦，不過，唔型呢。如果有呢個風扇耳筒就唔同，掛喺條頸度人哋覺得你熱愛音樂啫，而且吹風位仲會向住你塊臉！呢隻「ヘッドフォンなクーラー」賣2,980円，用USB供電，堅實用。

真係好勁，夏天喺戶外自拍咁熱，連埋把風扇梗係爽，最爽係可以吹起埋你把頭髮，飄吓飄吓真係女神咁呀！呢支「扇風機付きの自撮り棒」嘅風力可以調校，手柄有拍攝掣，而且仲可以變成尿袋，雖然得2200mAh，都叫好過冇頂到一陣。價錢1,580円，你仲唔買？唔係要女神自己買吓嘛？

夏天返到公司成身汗，枱面真係要有把風扇先得。呢把《Star Wars》嘅BB-8坐枱USB風扇嚟緊6月會再推出，開著佢就好似BB-8係向前滾動咁，好有活力。用USB插頭，頭頂嘅半圓形仲可以左右扭，幫你睇吓附近有無腦細行近。唔等得可以上網搵，有少量現貨。

之前都見過颱風下出街吹到變晒臉嘅「風中勁狗」，今次終於輸到喵星人嘞！呢段片最近喺Twitter熱傳，片中嘅日本長毛喵星人俾風扇吹到面容扭曲，但佢依然好忘我，似乎好享受呢陣強風帶嚟嘅快感，仲舒服到瞇埋眼擘大口！

喵星人嘅佔有慾好強，基本上屋企所有嘢都係佢嘅，你只係訪客，只係佢大方「借」啲嘢比你用啫。今日天氣熱，最啱睇吓日本之前熱傳嘅呢隻喵星人嘅相。相中見佢霸實屋企個風扇，一隻手冚住風扇嘅控制台，想閂風扇？問過我先啦。再睇返佢啲相，原來佢好鍾意責住啲嘢瞓，全屋嘅嘢基本上都係佢名下嘅，霸氣。入嚟仲有佢其他霸氣相，好正。

父母嘅愛好偉大，今次日本網民嘅「勵志」故事喺Twitter好多人熱傳。話說呀仔收到爸爸喺鄉下寄嚟嘅一份禮物，原來係一把電風扇！天時暑熱真係感動到喊。不過爸爸話因為寄送嘅原因要拆件，所以叫呀仔收到後自行組裝。當呀仔流晒汗認真砌好晒所有配件後，竟然發然爸爸寄漏咗個扇葉俾佢‥‥‥咁‥‥‥唯有開住冷氣先啦。

其實唔知點解我會好認真睇晒段片，仲介紹埋俾大家，不過呢段片喺日本twitter都好多人熱傳。講返正題，天氣咁熱，唔理得係咪癈青，點都要帶部電動風扇吖，有網友就開咗把手提風扇仔，仲用USB插住充電器，可能充電器太輕，或者把風扇太強勁，帶動嚿充電器係咁轉呀轉，最後仲跣埋落地下。我都係鍾意芭蕉扇多啲。

咁大把風扇，莫講話用舌頭，放隻手指入去都驚驚喇。片中人唔知Short咗邊條筋，居然親吻扇葉，哄個頭埋去，用舌頭硬生生整停扇葉，又厲害喎，真係俾佢整得停喎，仲用咗8.94秒破紀錄咁話喎，莫非舌頭練咗金鐘罩十二關？溫馨提示，睇片記得帶埋Headphone，扇葉打落舌頭嘅滋滋聲，保證聽到你心都痕埋，起雞皮呀老友。

一睇個樣，我就覺得好似係近排好興用嚟玩航拍嗰啲遙控直昇機，但睇真啲，原來係四組PC用嘅冷卻風扇至真！當然，佢唔可以遙控，亦都未係飛得好好，但見到佢升起一刻，再好似血滴子咁飛埋嚟，都好驚嘆製作者嘅好奇心同膽量……搞到我都好想去電腦舖買幾把風扇嚟玩吓，如果16把會點？