好靚，呢個雨傘陣位於日本嘅飯能市嘅主題樂園Metsä Village，整個叢林頂部佈滿雨傘，遮太陽擋雨之外仲好靚，對於香港人嚟仲有多一重意義，有機會去旅行可以留意吓呢度，入嚟有link。

落雨天拎把遮出街唔想同人撞款？日本呢位網民最近買咗把八爪魚遮，面層有八爪魚圖案，內層係大大隻八爪魚，再睇埋個手柄，係大大條嘅八爪魚腳呀！揸住把遮就好似捉咗隻八爪魚咁，超正超想買。入嚟有Link，賣3百零蚊左右。

有得預約嘞，日本呢把「免提雨傘」好實用，落雨天唔駛用手拎遮，好似頂帽咁戴住就得。騰空咗嘅手好多用途，官方提議例如shopping完可以用嚟拎重嘢，或者去釣魚、影相都好啱用，另外想喺街用兩隻手玩手機都得。而家網上有得預訂，每把1280円，即係港幣100蚊唔駛，都幾抵吖。

日本嘅設計就係靚，最近喺日本長島嘅Outlet有呢個雨傘佈置，一把把透明彩色雨傘掛喺天幕度，陽光照射之後，喺地面就會出現一把把彩色雨傘嘅倒影，超靚！網民忍唔住影咗相放上Twitter分享，吸引好多人RT。連Outlet呢啲shopping嘅位置都佈置得咁靚，肯定令人心情靚靚購物意欲大增。

日本治安雖然好好，不過依然經常出現雨傘失踪事件。為咗防範被偷或者誤取，最近興起喺遮柄度貼張警局嘅貼紙，成效似乎唔錯。不過呢位網民話扮警察唔係幾好，於是自製咗「內務省警保局保安課」同埋「首都圈治安警察機構警備部」嘅貼紙，前者喺好多年前已經解散咗嘅機構，後者就係來自2000年嘅動畫《人狼》(JIN-ROH)，網民都讚佢係天才，如果有得俾你發揮，你又會改咩名？

呢把日本嘅櫻花遮好靚，嚟緊落雨天啱晒。張相放上Twitter後好多人RT，樓主分享埋Amazon嘅連結，不過入到去得綠色同紫色，唔係櫻花嚟嘅。好彩有網民分享埋樂天網嘅連結，有粉紅、紫、綠同藍4隻顏色，賣1580円，即係港幣100蚊左右，嚟緊有排落兩，而家買定差唔多嘞。

據呢位出片嘅網民所講，第一位出場嘅係日本全國第2位嘅Baton(バトン)運動高手，冇Baton喺手，玩遮都一樣得。之後挑戰者就係一位初心者，不過講到娛樂性，兩位都一樣好高……

成日落雨真係好麻煩，噚日黑雨我仲冇帶遮，唉濕晒。不過有帶遮都煩o架，搭車搭地鐵時一隻手拎遮，一隻手又要扶住扶手，好呢hea。如果你都有呢個煩惱，日本呢個新產品「rumbrella」就帶嚟唔少方便喇，「r」手柄除咗可以俾你拎住，仲可以勾埋個袋喺度，慳力之餘，瀟洒囉。開遮嘅時候，手柄凸出嘅位又可以頂住隻手，大風都唔怕把遮脫手咁話喎。6,000円，6種顏色，6月1日喺「東急ハンズ新宿店」、「SMARt LIFE TOKYO」等地方同Amazon都有得買。

你係咪成日都留低雨遮？之後又要買過把新？如果把遮有藍芽咁連住你部電話，行開30呎就會通知你，咁就一定唔會留低啦。呢把藍芽雨傘喺Kickstarter集資緊，用上手表電池，可以用一至兩年，對應iPhone同Android電話，裝個叫「Davek Alert」嘅app就得喇。好喇，問題嚟喇，首先，如果我留低咗喺車，離開30呎之後，架車應該開走咗，真係得個知字咋喎；第二，賣80美元，夠買幾多把遮？同埋如果我冇唔見，但把遮爛咗藍芽又未壞咁點……咁咪算囉。

今日見到日本網摷番今年初推出把反骨遮出嚟介紹，講佢打風都唔驚反遮，即時令我哋諗番其實之前都介紹過好多唔同款式嘅遮，o依家呢啲資料可能好有用……嘩！原來雨遮危險成咁，香港唔知幾時要攞牌先可以拎遮出街？睇番我屋企個遮架，原來係個軍火庫！遮係武器都講得出？真係唔俾隻中指你都唔得啦天才！

梁志祥話雨遮喺黃飛鴻系列入面係武器，講嘅時候居然唔笑，佩服。為咗加強雨遮嘅威力，可以考慮吓呢款進化版嘅雨遮。名為Sa嘅雨遮參考日本嘅摺紙藝術，用嘅係超輕物料，只要扭一扭或者輕輕推個底部，就可以開或者閂遮，而家喺Kickstarter集緊資，顏色有藍、黃、紫、黑、灰、白，識揀嘅一定係揀黃色。

本來用嚟遮太陽擋雨嘅雨遮，嚟到香港變咗遮胡椒噴霧擋警察嘅防護罩，好可悲。最近有設計師發明咗一把遮，物料唔係用尼龍或者透明塑料，而係用轉風，利用風力，將周圍嘅雨點吹開，所以產品名叫「Air Umbrella」空氣遮，開著佢行喺街好似加咗個透明防護罩咁，如果夠風力嘅話，唔知可唔可以將胡椒噴霧反彈？定還是會吹到周圍嘅群眾全部中晒招？呢把古惑的遮而家喺Kickstarter集緊資，設計師喺嚟自北京大學同南京大學嘅兩位研究生。

又到潮濕嘅春天，出街都係帶定把遮穩陣。話時話，如果想好型咁揸住杯咖啡，同一時間又要擔遮，有時都幾輪盡，所以呢個叫Morella嘅發明幾好用，將個專用扣扣上遮柄，就可以喺上面放杯咖啡，剩返隻手可以專手篤手機。佢仲有個扣可以同時左右兩邊各放一杯咖啡，同BB出街最啱駛。最正係當你閂埋把遮，甚至將把遮倒轉時，杯飲品都可以繼續喺水平位置唔會瀉，Kickstarter集資中。

呢把香蕉縮骨遮令我諗起周星馳嘅《國產凌凌漆》，表面睇佢係一條蕉，放喺手袋無乜殺傷力，不過行行吓街突然落雨時，就可以拎條蕉出嚟拆開變成遮，型吖！條蕉仲有黃色同綠色揀，想熟啲定放耐多啲先食隨你鐘意，網上有得訂，二百蚊港紙唔駛，以蕉嚟計係貴咗啲。

英國長期落雨，如果鬧市有500把遮同時打開都幾震憾。最近英國手機網絡商O2搞咗個活動，喺鬧市用500把遮砌成一個拱門，除咗經過可以避吓雨，把遮嘅「幅蓋」範圍仲可以有免費WiFi提供，實用度唔算高，不過夠晒搶眼，行過都會忍唔住望兩望，影張相放上facebook。