by / on 08/11/2018 at 10:00 am

《火武耀揚》長樂孖仔對話有共鳴 做香港人真係好辛苦呀

今期第994期《火武耀揚》好密格足料,相信好多邱瑞新死忠讀者都同我一樣,覺得襟睇之餘亦睇到笑中有淚。笑者,長樂社孖仔出場,西人仔一貫九唔搭八作風激到火武紮紮跳,句句對白都好低B,喺地鐵我真係睇到架架聲笑咗出嚟。悲者,來自南京仔一大堆負面說話,好惹香港人共鳴──「兄弟……呢個年代邊有人同你講兄弟。」、「男人響香港地冇樓?同賤人廢柴冇分別;返工得雞碎咁多,仲要日日受氣,帶埋老母返工都唔掂。」、「女人要靚係唯一生存意義,買化妝品,買靚衫,狂做尖……嘥晒啲錢仲要人X港女。」結論呢,瑞新透過路人甲對白講咗出嚟:「哇!做香港人真係好辛苦呀!」雖殘酷,但確係事實。而最最最最最可悲係呢句──「真你鹵味!香港立撚咗例,唔俾講真話,講真話會俾人拉架。」簡直突破越位陷阱,一語中的,悲乎,刻下香港,敢講真話嘅仲有幾人?

Read more ›