fbpx

Tag: 鄺志德

《王小龍傳貳》好多Bug 連「下期預告」都出錯

《王小龍傳貳》好多Bug 連「下期預告」都出錯

作為一個死忠港漫迷,我甚少投訴,但今期第28期《王小龍傳貳》實在有點不敢恭維。唔知係咪年紀大咗眼水無咁多,硬係覺得成期書都濛查查,線條好唔實淨,分色又偏暗啞,每格畫面都有啲凌亂污穢感。人物面相亦唔掂,有幾格玉兒同王小龍一孖眼珠好似唔係望住同一方向,有一格阿谷次郎直頭畫到高低大細眼添。今期Bug都有唔少,東野庸子同王苦海情侶互動無疑幾有趣,但第7頁尾二嗰格出事,「夠喇,咪痴住晒。」出自王苦海把口無錯,但頭髮分錯色,變成好似東野庸子講緊嘢咁;第9頁旁白寫「……小龍的一席話,教王苦海不禁熱淚盈眶。」但阿王苦海就畫到兩隻眼碌到大一大,一副驚愕表情,眼淚都唔見多滴,何來熱淚盈眶?第27頁都出事,旁白係咁寫:「神秘人右腳一屈一舒,如雷吞吐……」但畫面所見,阿神秘人係用左腳踢王小龍的;最最最最離譜係書末「下期預告」有這麼的兩句──「救世主彌賽亞終極夢想展現,拯救世人同時製造滅世巨」,滅世巨「乜」呢?無句號嘅?唔係嘛,居然寫寫吓斷咗,好明顯係就圖擺位走唔晒啲字,喂呀,內文構圖就話一個不小心容易走漏眼啫,要幾千多億個不小心,先可以令簡單如齋text都可以咁錯法?唉,雖然暫時我仲未有棄書念頭,但說實在,係睇到有啲無奈、氣餒、無癮。

Read more ›

網圖分享:二創《新著中華英雄》宣傳圖

網圖分享:二創《新著中華英雄》宣傳圖

唔知大家係咪同我一樣,都好期待即將推出嘅《新著中華英雄》呢?有面書朋友仔二創宣傳圖,變身著色版同潮水版華英雄,So funny喇喂。另,真心想同鄺志德講一聲加油,一定要畀心機做本好漫畫畀大家睇呀,支持你呀。

Read more ›
《新著中華英雄》宣傳圖二 捽走赤劍Key入華英雄

《新著中華英雄》宣傳圖二 捽走赤劍Key入華英雄

喺今期第1117期《新著龍虎門》書末,鄺志德出咗第二幅《新著中華英雄》宣傳圖了,比起第一幅齋得把赤劍,今次有大大個華英雄現身,仲打出無量神掌一招「大海無量」,氣勢當堂唔同晒,我就覺得著實唔錯嘞。不過呢,明眼人一睇就睇得出,兩幅宣傳圖個大海背景同岩石係一模一樣嘅,即係Key圖囉,略嫌慳水慳力咗啲囉。

Read more ›
《新著中華英雄》10月出版 宣傳圖得把赤劍?

《新著中華英雄》10月出版 宣傳圖得把赤劍?

好了,落實了,今期第1116期《新著龍虎門》出咗正式宣傳圖了,鄺志德亦喺專欄「主編話」透露書名:「團隊新作品《新著中華英雄》,已經開始得如火如荼,工作會議暫時非常順利,暫定10月出版,敬請各位讀友們繼續支持!」我會支持,真心希望可以畫一本出色作品畀大家睇吓喇,要加油呀。另,就呢幅宣傳圖,我朋友咁話:「係咪點都要畫吓華英雄呀?就咁畫把赤劍算數?好求其囉。」我不苟同,下下畫主角邊有癮,赤劍亦屬《中華英雄》Icon,畫赤劍無問題,問題係圖係黑白圖,啲線又多又亂,根本突出唔到把劍,赤劍加番紅色會唔會搶眼啲? 再另,就住上期《新著龍虎門》封面將「火雲七式:火蛇吐信」誤植字為「雷電神腿:火蛇吐信」一事,今期書末重新刊登一次修正圖,不過得罪講句,有啲多餘喎,用文字交代Say個Sorry咪得囉,事關修正圖足足霸咗珍貴的一大頁,留番嚟出多一頁內文好過喇。

Read more ›
離晒譜! 點解《新著龍虎門》出現《山海逆戰》稿件?

離晒譜! 點解《新著龍虎門》出現《山海逆戰》稿件?

嘩,離晒譜,咁都可以犯錯?有無搞錯!究竟我睇緊《新著龍虎門》定《山海逆戰》?呢個錯出現喺今期第1106期書末「創作解說」裡面,去到「摩羅圖謀」嗰Part,文字無錯,但配圖卻係《山海逆戰》其中一頁黑白稿件。兩本公仔書份屬兩間漫畫公司,理應河水不犯井水,各有各做,因乜可能出現呢個咁另類嘅Crossover呢?龍少公司有鄺志德嘅人?希望下期書可以畀到讀者一個合理解釋,千其唔好當無咗件事就算。

Read more ›
《王小龍傳貳》3月31日創刊 四版本任擇

《王小龍傳貳》3月31日創刊 四版本任擇

終於推出正式廣告了,喺今期第1090期《新著龍虎門》書末有個跨版《王小龍傳貳》廣告,創刊日為3月31日,有四個版本,一,原作紫龍版$23;二,特別金龍版$23;三,創刊紀念精裝收藏本$48;四,黑白原稿尺寸版$180。乜版本都好,真心Mode希望呢本書可以做得精彩啲,少啲Bug,千萬不要如《王風雷傳奇》般狂派膠兼犯駁。作為一個無港漫睇會蘿蘿攣嘅死忠,不得不支持,鄺志德,加油呀。

Read more ›

疑似釋出! 《王小龍傳貳》創號刊封面!

疑似釋出! 《王小龍傳貳》創號刊封面!

瀏覽鄺志德面書,見到佢疑似釋出《王小龍傳貳》創號刊封面,無論構圖、氣氛、人體比例、肢體動作都係上佳質素,連條龍擺位都好講究,書名字體亦有型有款,係有啲睇唔慣王小龍著功鞋啫。於我,呢個封面絕對收貨,畀心機呀,加油。

Read more ›
Rodman靚圖為《王風雷傳奇》作結 《王小龍傳貳》不日推出

Rodman靚圖為《王風雷傳奇》作結 《王小龍傳貳》不日推出

12期了,足足12期,每次睇完《王風雷傳奇》,我都會問自己:「究竟我睇咗啲乜?」好了,家陣完結了,冚埋本書,扯啖煙,我長長吁出一口氣,呼出來的煙霧終於冒出了輕鬆。穿越來穿越去,最後竟然係返去1945年二次大戰掟三神器,用原子彈消滅八岐大蛇,搞來搞去嘅結論係:「就且讓這一趟穿越,如鏡花水月,不去干擾大家心裡,龍虎門的歷史吧。」唉,Nothing to say,果真鏡花水月,去到結局我都仲係無一期睇得明嘅,唯一能夠逗我一笑嘅係專欄「講漫兄弟幫」有幅〈奔走未來的風雷〉,出自經常帶畀網民無窮歡樂嘅面書朋友仔Rodman之手,佢畫風之獨特自成一派,每次睇到佢嘅作品,我都好開心。點都好喇,鄺志德、袁家寶加鍾英偉之後會推出嘅《新著龍虎門》外傳之《王小龍傳貳》,我係會繼續捧場嘅,希望到時會有一本正正常常嘅公仔書睇吓喇,係,無錯,唔使搞咁多花臣,真係正正常常得架喇。

Read more ›
《王風雷傳奇》又變番週刊?第八期變番本周五出版咁兒戲?

《王風雷傳奇》又變番週刊?第八期變番本周五出版咁兒戲?

喂?乜咁Funny,上個禮拜先話轉雙週刊,家陣又維持番「正常週刊出版」,咁搞法好混亂喎。講緊嘅係《王風雷傳奇》,鄺志德剛喺面書開Post話:「原定王風雷傳奇第八期轉為雙週刊,但上週助理團隊非常神勇,星期五已經發齊稿到分色,既然稿已齊全,當然趕及本週五正常週刊出版了。」咁,是咪意味住《王風雷傳奇》變成不定期刊?我覺得呢個安排唔多妥,一,唔應該Assume人人都有睇呢個Post,上期書末廣告既出,讀者只會大安旨意下週五先撲第八期書,呢個禮拜買漏咗點算?二,再下週五會唔會又變番雙週刊呢,Sure唔Sure出到第九期書呢?如出到,無買第八期書嘅讀者只會見到第九期書,肯定嬲嬲;如出唔到,買咗第八期書嘅讀者見唔到第九期書,一樣會嬲嬲。何苦咁兒戲呢?

Read more ›
1060期《新著龍虎門》加推銀光版封面 石黑龍揸電單車

1060期《新著龍虎門》加推銀光版封面 石黑龍揸電單車

龍虎三皇吖嘛,有王小龍同王小虎,又點會少石黑龍一份。嚟緊《新著龍虎門》第1060期,照舊除普通版外,會加推銀光版第三彈封面特別版,構圖繼續係電單車。鄺志德剛喺面書釋出封面打稿,真係好正斗,睇個勢又要同一期買兩本書了。

Read more ›
《新著龍虎門》〈無名罪〉篇完結 《新著王風雷》暫時擱置

《新著龍虎門》〈無名罪〉篇完結 《新著王風雷》暫時擱置

今期第1057期《新著龍虎門》〈無名罪〉篇完結,大家點睇?我覺得OK喇,畀90分。玩世紀病毒呢條橋有新鮮感、非洲七兄弟幾搞笑、將火雲邪神降番Level就最醒目。咁Bug都唔係無嘅,蒼龍無端端弱化咗、王小虎兩頁練成天殘腿過份咗,呢啲小Bug我可以接受。不過無記錯的話,初初好似事先張揚話王風雷、金羅漢同東方無敵三死一,家陣三個都無穿無爛,何解?另,今期鄺志德喺專欄透露,鑑於「穿越故事未度好便推出,一定不會有好成績」,所以暫時擱置《新著王風雷》,仲話「請各位讀者密切注意《新著王風雷》創刊號出版日期,一定令大家有所驚喜。」吓?唔係啩?相信好多港漫死忠Including me都好想快啲有新書睇,千其唔好不了了之呀。鄺志德加油,支持你呀。

Read more ›

陳笑洛字畫雙絕 鄺志德買《未來戰士》水墨畫

陳笑洛字畫雙絕 鄺志德買《未來戰士》水墨畫

有麝自然香,好嘢自然多人欣賞,之前報導過坐鎮廟街嘅陳笑洛,字畫雙絕,鄺志德也甚欣賞,親臨檔口幫襯買番幅《未來戰士》水墨畫。另,佢又出Post話兩年前畫過一件港漫Tee,畫嘅係王小龍,無記錯靈感應該係來自《龍虎門》〈劫數難逃〉嗰期嘅封面,非常高質。很想要是常識吧,不過Sorry,無得買!因為佢話已經唔喺佢手,所以唔使問價,咁惟有睇咗當買咗囉。

Read more ›
《新著王風雷X新著龍虎門序章特刊》7月29日見街

《新著王風雷X新著龍虎門序章特刊》7月29日見街

Very fine,《新著王風雷》未出,先來一本《新著王風雷X新著龍虎門序章特刊》熱熱身。7月29日見街,售$23。內容都幾豐富吓,有《新著王風雷》人物設定圖、黑稿內文形式嘅穿越序章、《新著龍虎門》新一輯故事〈獵龍屠神〉預告、全新繪畫嘅〈龍虎相鬥〉海報,仲要玩埋光面精描黑線圖封面特別版添。我係拍爛手掌的,港漫要熱鬧啲,公仔書要出多啲,鄺志德加油,Yeah!

Read more ›
1053期《新著龍虎門》銀光版 王小虎揸電單車出場

1053期《新著龍虎門》銀光版 王小虎揸電單車出場

下期第1053期《新著龍虎門》,睇怕要買兩本了,因為除普通版外,仲有一個銀光特別版,將選取張萬有當年投稿嘅一幅「200分王小虎騎電單車殺出重圍圖」做封面。鄺志德剛剛喺面書登咗封面打稿,Wow,啲線條好密,王小虎又畫得幾英喎,頭髮填得好靚,仲有久違了的Nike眉,古早味出晒嚟,I like it。另,因書展同動漫節延期,鄺志德話原本準備好嘅精品唔知點處理好喎,幅王風雷畫板咁正,如果送畀我就好咯。

Read more ›
網圖分享:李健良畫狂王+王小龍+伯益

網圖分享:李健良畫狂王+王小龍+伯益

李健良人緣係好嘅,因為有《山海逆戰》邱福龍、《阿修羅》和仔大人同《新著龍虎門》鄺志德幫佢免費賣書展廣告。為此,良哥作畫一幅以表謝意,佢畫嘅狂王、王小龍同伯益,又係另一種味道。

Read more ›