過完暑假又係時候計劃吓去日本，因為機票會平返啲嘛。鍾意刺猬仔嘅，可以去埋東京六本木呢間刺猬仔cafe，舖仔細細不過住咗大量刺猬仔，可以餵食又可以抱上手，諗起都開心。去之前記住睇埋網站段介紹片，教大家同刺猬仔玩之前嘅注意事項，佢哋嘅facebook仲有大量新相，入嚟有得慢慢睇。

各位貓奴去開日本又多個住屋選擇嘞！日本福岡博多區呢間「Nekokura Hostel ねこ蔵‏」收養咗好多流浪貓，如果喺入面住宿就可以去埋佢哋嘅貓cafe。日間係貓cafe，夜晚就變sake bar。住喺入面嘅喵星人全部都好可愛，而且住宿喺呢度可以幫到呢間喵旅舍嘅營運，每晚住宿費大概3000円左右，但記住要預留。店主放咗上Twitter後好多人RT，仲有好多人留言話嚟緊會入去住！入嚟可以睇多啲貓相，睇完會心郁郁好想去探吓佢哋！