繼上次超長嘅《薔薇少女 ローゼンメイデン(Rozen Maiden)》豪華痛車之後，今次又有宣傳新招。為咗宣傳《進擊之巨人》Blu-ray同DVD第1卷喺今日發售，秋葉原又出現一架巨人痛車，呢架痛車就勁咯！係法拉利458 Italia，幾球嘢一架嘅458呀！車頭係兵長加艾倫，車身就Cute版調查兵團，巨人原來咁有錢！

咩都進擊，不過今次真係勉強咗啲。呢間秋葉原有嘅「マンモスカレー」食咖哩都算出名，最新推出就係呢碟「進撃のカレー」，點進擊法呢？用白飯圍成城牆，外面就係咖哩汁，60米巨人就係半截香腸，細粒啲企起「城牆」上面嘅就係艾倫……如果投入啲再加啲幻想，你就可以將隻60米巨人放入口喇……呢碟咖哩即日開始至8月尾供應。

其實雖然狂被惡搞，我真心覺得〈紅蓮之弓矢〉係好激昂好熱血嘅。咁今日星期日，追開《進擊之巨人》嘅都知咩事，新OP同ED配埋片嚟喇，OP都係Linked Horizon主唱嘅〈自由之翼〉，ED就係cinema staff嘅〈great escape〉，未聽未睇嘅入嚟聽吓，有歌詞嘅中文字幕，我都係鍾意舊嘅多啲。

有時有啲嘢，叫人在造天在看，你抄人嘢，實有人知，唔認都冇用。大陸湖南衛視有個綜藝節目叫《進擊的美男》，個名就當係二次創作啦，但係你用埋人哋首主題曲〈紅蓮の弓矢〉前奏，用埋人哋啲設計風格就唔妥當囉。日本就有網站報導呢件事，報導出咗之後，日本網民嘅留言梗係鬧爆啦，唉……堂堂一個大電視台，可唔可以唔好再做啲咁失禮人嘅嘢？

咩都係進擊，搞到都有少少悶，但呢個有驚喜！噚日喺網上見到呢幾張圖，係大陸上海「CCG Expo」嘅高達模型迷作品。裏頭有城牆有煙，一睇場景都認得係嚟自《進擊之巨人》，但係60米巨人雖然都係紅色，但好似唔同咗樣，原來係《Gundam Unicorn》嘅新安州！至於嗰隻有立體機動裝置嘅訓練兵係咩機體，我睇咗好耐都認唔出，有冇人指教吓？

近月成日都喺啲活動見到有人Cos 60米巨人，不過之前洛杉磯Anime Expo呢隻就再特別啲，佢除咗識得跟番原著噴煙外，仲有佢嘅肢體動作已經去到極度奇妙嘅境界……通場走嘅佢唔只撩其他訓練兵Coser開拖，仲彈吓彈吓扭動身體，睇完呢條片，我相信大家都感受到艾倫對巨人嗰份憎恨。

我噚日打籃球，喺籃球場上面班波友，竟然喺度談論最新劇情，其實你哋知唔知有人會未睇？《進擊之巨人》紅到平時冇睇動畫嘅人都會走去睇，玩具產品應該陸續有嚟，我係超期待Medicom幫佢出Figure，係就正咯！不過幻想緊嘅時候，都有啲平玩扭蛋可以考慮，Takara Tomy會喺10月推出Cute版扭蛋，除艾倫等主角外，仲有60米巨人都萌化咗。扭一劑200円，都係買一套啦。

無聊，但好笑。想Cosplay《進擊之巨人》60米巨人，何需千里尋良方？只需要打開雪櫃拎包蟹柳出嚟，再撕開佢一片片，將一片片橙紅色加白色嘅蟹柳舖上塊臉度就可以喇。呢個MINIMegwintv頻度就拍咗條片示範，最抵死係砌完之後仲吹啲煙出嚟，好有意境！你話佢浪費食物？你睇到最尾就知……這一天，人類終於吃掉60米巨人了……

日本便利店成日都會同唔同動漫畫作品合作，搞活動送精品。最新一輪就係Lawson同《進擊之巨人》，由7月23日至8月5日舉行，買嘢給印花送全4種嘅Cute版角色耳機插，另外仲有Wallpaper可以下載。最後就係HMV都會有限定嘅精品，包括月曆、立體機動裝置嘅掛飾等，10月發售，冇去開嘅就搵舖頭訂囉。

《進擊之巨人》勁紅，動漫迷睇得好投入，我唔知呢位台灣fans係咪講真，不過佢就真係喺Yahoo!知道欄目度開咗個問題，問題如下：「哪裡可以買到？進擊的巨人立體機動裝置，我想買來練練，因為我住台南，聽說巨人是從南方出現的，所以我很擔心！哪天突然出現，我還學不會這項技術，就被巨人吃掉了！請問要哪裡才有賣呢？」之後，一眾網友真心回覆，有人講：「等到你能服兵役的年紀時，記得報名志願役並且要求增設立體機動裝置特訓課程。」「不用怕，我聽說兵長和艾倫也是住台南的~」「我朋友有幫我買，我都跟他在他家頂樓練習，我練得很強了，跟兵長有得比!如果你不懂可以請教我，我最近也還在訓練如何削巨人後頸~」「所謂未雨綢繆，我們志同道合阿!!!!!」「放心 你咬你的拇指就好了啊!」合共有7頁回應，入嚟有Link慢慢笑。

自從Uniqlo成日出動漫Tee之後，動漫迷都打開咗心扉，好樂意著自己鍾意嘅動漫作品上身。不過今次唔係Uniqlo，而係日本嘅193t出品，有5款近月勁爆人氣嘅《進擊之巨人》Tee，而且唔係就咁印個標題咁行貨，啲設計都幾靚，當中呢件巨人同人類嘅身高比例圖案，唔係行家都唔知係動漫Tee！3,990円，網購啦。

呢張圖係假嘅，但呢個消息就係堅嘅。雖然係意料之內，不過有人出嚟爆料點都實在啲。《進擊之巨人》嘅擔當者責任編輯喺Twitter度爆料，話漫畫版會改篇家用機遊戲，不過開發公司同遊戲類型就未知，總之就唔會係社交遊戲。照咁睇，應該係動作類型多？不如出《Monster Hunter》類協力遊戲啦？再唔係無雙都唔錯……不過連開發廠商都未定，起碼下年……啩？

唔好意思，又係佢。《進擊之巨人》13集睇咗未？啱啱又見到條片，今次唔係做立體機動裝置，而係一個阿媽級嘅進擊fans，幫佢5個月大嘅BB整咗一件調查兵制服，一針一線自己搞掂！然後佢仲整咗個巨人口罩俾自己，仲有屋企嘅圍牆、自己用嘅尿片袋，通通都係巨人主題！細細個就要面對巨人嘅恐懼，不過又啱喎，喺呢個可愛BB面前，個個都係巨人嚟……

星期日，我又諗起《進擊之巨人》，自從人氣爆發後，好多Cosplayer都鍾意做調查兵，為國王獻出心臟，但都唔夠呢個日本人勁！佢製作咗一個立體機動裝置，唔只個樣似，仲有齊晒功能，包括發射兩個勾出去，仲示範發射插入幅牆，好似有啲危險；最勁之處係射出去嘅勾可以撳個掣索返番嚟！另外佢裝嗰兩罐gas真係gas嚟，後方仲可以噴煙！而兩把刀呢亦可以換刀片，呢條片有晒詳細製作過程，抵讚！

繼幫你砌貓貓文字、龍珠標誌文字之後，輪到近排最熱嘅《進擊之巨人》字體。你只要入呢個網站就可以輸入自己想要嘅文字，連下面細細行英文都可以自選！之後佢就會整出嚟仲俾埋條link你share，心得就係個「の」字係必要嘅，同埋雖然佢支援英文，但英文都係留番下面細細行會似啲！即玩啦！