繞線器見得多，不過今次呢個真心想要！有日本網民喺Twitter分享咗之後好多人RT。模仿平時成日見到嘅線圈，不過就變成迷你版，用嚟收藏成枱都係嘅電線就啱晒嘞！日本好多網民都買咗，仲分享埋佢哋嘅相，入嚟有得睇。去開日本可以扭之餘，香港部份舖頭據聞都有得買嘞，想買嘅快啲出去搵吓！

大家仲有無寫日記嘅習慣？相片打印機之前都出過好多，最近有日本有網民推介呢款canon inspic，喺Twitter好多人RT。首先呎吋好似手機咁細，內置電池，跟機嘅印刷紙好似貼紙咁，另外可以揀將幾張相print埋一齊，之後剪完貼落本簿就得，啱晒用嚟做旅行遊記或者寫日記。價錢方面，amazon賣緊14776円，大概1千蚊港紙左右，相紙方面，20張一盒賣880円，50張嘅賣2100円，有興趣可以入嚟睇吓。

用迷你人仔加埋日常生活場景，製作成迷你世界嘅作品，之前唔少藝術家都試過。今次呢個係Péter Csákvári嘅作品「Tiny Wasteland」，大部份場景都同食物有關，其中打籃球同埋網球嗰兩張都好正，仲經常有裸女出現，入嚟有多啲佢嘅作品回帶，全部都好正，鍾意嘅記住follow埋佢IG，入嚟有link。

日本EPOCH出嘅扭蛋一向都好受歡迎，呢個「たい焼き本舗」嘅鯛魚燒機夠晒迷你，最正嘅地方係佢唔係膠製而係金屬製！下次見到可以買返個，而用途方面，樓主就示範咗用嚟做玩具嘅迷你道具，好可愛！

有無試過想幫隻figure加返副眼鏡？日本專出扭蛋嘅EPOCH最近推出呢款迷你眼鏡扭蛋「EYEWEAR COLLCTION Basic」，一式九款，全部手工都超細緻，眼鏡柄仲可以摺合，而且有埋眼鏡盒，超正！諗好邊個變眼鏡娘未？

日本成日會見到痛車，不過呢架有啲唔同，由日本網民分享，全架車都放滿不同嘅模型公仔，全部呎吋都係超迷你，網民形容為「痛車の上級版」。不過應該唔可以喺街上行走，應該會一路行一路跌‥‥‥

喵星人嘅行為好難明白，好似日本網民呢隻喵仔，唔知點解選擇咗個奇怪嘅瞓覺位置，瞓正喺兩張軟執中間嘅隙位，仲要頭仔向下，超搞笑。唔通嬲緊主人仲未餵佢食嘢？入嚟有多啲呢隻喵仔嘅正面相睇，超細隻超可愛！

四腳蛇喺爬蟲類動物嚟講都幾得意嘅，日本扭蛋公司EPOCH之前都有出過呢個指上嘅小玩具系列「指の系列」，有倉鼠、海豚、松鼠等，全部呎吋都係超迷你，而今次呢個爬蟲類係第二次出，除咗四腳蛇之外仲有鬃獅蜥，顏色仲好鮮豔，啱晒春夏天呀！

就嚟過年，牛佬好識做，喺今期第2103期《古惑仔》隨書附送Q版迷你揮春兩大張，分別係Q版梁家仁嘅「家宅平安」同Q版李志高嘅「吉星高招」，仲講到明嚟緊幾期會繼續送添。雖屬小小禮物，但都開心嘅，好意頭吖嘛。最重要係，《古惑仔》係唯一初一嗰個禮拜依然會出書嘅港漫，你知喇，成個禮拜無公仔書睇，好籮籮攣架嘛。

網購最重要係「冷靜」，落單前要諗清楚，千祈唔好俾價錢迷惑。日本呢位網民最近就中伏嘞，佢睇中咗張藍色櫈，賣1111円，點知送到嚟‥‥‥原來係迷你版！網民仲發現疑似樓主喺產品下面留言，大概係話：「張櫈比預期細小，好硬，坐落去想喊，多謝晒。」大家當然留言笑爆，明嘅，係好難忍嘅。

日本「熊貓之穴」系列扭蛋一向高質，啱啱又公佈有呢款狙擊手系列Miniature Sniper，5款狙擊手匿埋喺蕃茄、花生、香口膠、奶精同埋糖入面瞄準目標，超可愛又搞笑，睇完好想儲齊一套！今個月有得買，每扭一次200円，記住留意吓！

似成咁會唔會太過份？日本好多粘土神人，整嘅迷你食物、玩具無論細緻度同像真度都達到神級。最近呢位日本粘土專家製作咗幾樽超迷你「梅酒」，張相喺Twitter熱傳。唔講絕對會以為係真酒，講咗係粘土都有啲難以置信。如果真係有咁細支梅酒，一啖一支都幾爽。樓主話要搵個咁細嘅樽都唔容易，好多日本網民都留言大讚可愛。樓主之後仲用呢個樽浸蔬菜粘土‥‥‥真嘅一樣，好勁！入嚟仲有其他作品睇，麵豉湯、拉麵、魚生飯，全部像真度都接近100%！

日清杯麵嘅日本Twitter成日都有正嘢睇，唔駛等愚人節都大把古怪產品。最新有呢款杯麵模型，官方仲問要砌好佢需唔需要3分鐘時間？睇返個模型，個杯分拆成兩半，再加麵餅一個，仲有支叉仔。最正係啲配料，有蔥、蝦、肉同最頹嘅雞蛋，都預咗佢唔會量產，但見到都好想買。網民仲貼埋多啦A夢嘅圖做回應。BTW，日清最近出咗個名為「Hungry Days」嘅新CM，好正，另外亦有最近嘅整蠱圖回帶，入嚟有得睇。

又係呢隻可愛到癲咗嘅喵星人，噚日介紹佢攬住條水喉想出浴，今日又有新片，主人發現佢自己同自己玩緊一個謎之遊戲，就係不停圍住個咕臣靠邊行，睇佢爬得好開心，睇嘅人都覺得好開心！玩完攰攰哋又瞓返個覺，入嚟仲有多啲呢隻貓仔嘅回帶相睇，可愛到暈！

迷你版嘅嘢從來都係最難整，外國設計師Gregory Grozos利用一對巧手，造出一件件極細緻嘅首飾，包括小王子喺星球上行走嘅經典畫面，但呎吋係細到極嘅鍊墜；又例如Iron Man加Tony Stark嘅陀錶首飾，全部都超靚，佢話每件都要花幾日甚至幾星期製作，所有首飾喺佢嘅Etsy網店有得買，價錢由港幣500蚊至3千蚊不等，買佢嘅手工都抵。