打機可以嘟卡都唔係新嘢，不過今次就係宣傳可以嘟晒9種卡，包括「Kitaca」、「Suica」、「PASMO」、「TOICA」、「manaca（マナカ）」、「ICOCA」、「SUGOCA」、「nimoca」、「はやかけん」。咁有咩地方大多數人都有卡嘟呢？就係車站喇，呢兩日喺秋葉原車站就有呢間小型Taito Station，入面有夾公仔機玩，咁都排長龍？因為為咗宣傳，免費玩。

早兩日有日本Twitter用戶放咗呢張圖，就係話「近鉄桑名駅」嘅「改札機」咁樣設置，中間條路咁闊，一邊入一邊出嘅閘機就放一邊，唔通「入閘放題」？好多人RT之後，官方就出嚟解答喇，原來呢個係「近鉄」同「JR東海」共用嘅車站，而呢兩個「改札機」只係轉車用啫，而且仲有圖睇到其他車站都有類似嘅設置。其實，日本人咁自律，就算係咁，我諗佢哋都會守規矩嘟一嘟，當然，進擊的遊客另計。

喵星人最鍾意捐窿捐罅，之前有主人試過比隻喵捐入行李喼，去到外地先發現，今次呢位中川翔子家公認嘅貓Blogger「中川寢子」，佢去到車站打開手袋，先發現屋企隻喵星人居然鑽咗入袋。女貓奴話由於喵星人黑色一團，又得900克重，所以唔望真都發現唔倒，而隻喵星人仲咬住平時玩開嘅玩具，睇嚟諗住帶埋去玩，好曳。最後佢被迫折返屋企放低隻喵，搞到遲到。不過咁，都好過帶咗佢去到目的地先發現或者中途走失吖，下次小心啲呢隻咁黐身嘅喵星人喇！

日本人質素高，而且應急能力強，每次見到呢啲畫面都令人好感動，2013年7月都試過有月台乘客團結推車救人，我哋都報導過，入嚟有回帶。今日(1/8)凌晨時份日本東京出名繁忙嘅品川車站再發生意外，一位乘客跌咗落車廂同月台間嘅空隙，千鈞一髮間，所有人齊心合力一齊將架車向前推，最後夾喺中間嘅乘客被救出，事後好多人喺Twitter舖文，件事發生後亦令到唔少列車要延誤，現場就有好多趕住搭車去機場嘅旅客破口大罵‥‥‥民族質素高下立見。

上年日本橫濱都搞過比卡超大型活動，今年繼續有1000隻比卡超會出動喺街頭巡遊！而噚日喺Twitter就有網友率先分享咗櫻木町駅嘅車站牌已經換咗比卡超款，仲有4款咁多，比卡超迷親身去唔到，睇吓相都開心吖。今年活動由8月8日至16日舉行，官方仲公開咗條宣傳片，有男有女有比卡超，一齊喺草地上奔跑，好不可思議呀！

之前睇電影《柏靈頓》時不停諗，點解啲人喺車站見到隻熊反應會咁平靜呢？英國地鐵站最近突然出現咗隻巨型北極熊，啲途人嘅反應就合埋得多。有人即刻彈走，有人依依er er，有人嚇到呆晒，不過大部份人嘅本能反應都係拎部手機出嚟影吓相證實吓，又學倒嘢嘞！BTW，呢隻熊其實係由兩個成年人扮嘅，目嘅係宣傳即推出上畫嘅《Fortitude》，唔係之前嗰個環保活動。

電影《LEGO英雄傳》香港唔算好收得，不過喺外國就好勁，北美更加連續3個星期榜首，至今全球累積票房達到1億8千萬，而且宣傳亦浪接浪。意大利米蘭就整咗個3D嘅假車站喺Cordusio站口，似層層，飲大兩杯分分鐘走錯入口。

好感人！呢條短片放上網3日已經有接近5百萬點擊！影片中一個男仔喺挪威冰天雪地下著得好單薄喺車站等車，攝製隊喺遠處裝咗個camera，睇吓途人會唔會除件外套比佢著。有途人問佢點解唔著褸，男仔話因為比人偷咗，有人將條戴緊嘅頸巾除比佢、有人除手套，亦有男有女即場除外套比佢，寧願自己著住件短袖捱冷。片尾導演問：「見到需要幫助嘅人，你會伸出援手嗎？」原來係SOS Mayday呼籲大家幫助敘利亞捱緊凍嘅小朋友嘅廣告，有message拍得好，仲好觸動人心，有網友翻譯咗中文字幕版，必睇！

IKEA隻路姆西差唔多講到水尾，不過可以想像聖誕party抽禮物應該好大機會抽中。講返正題，法國IKEA又有新嘢玩，早兩日喺巴黎Gare de Lyon車站整咗間Popup store，今次將平時嘅示範房放大晒，當大家入去參觀時就變晒小矮人，有超大型梳化、枕頭、牙刷、水杯，大人細路都玩得好開心，呢招宣傳技倆都幾醒，起碼吸引倒好多人影相，賺晒。

雖然距離《哈利波特》第一集已經十年有多，不過呢條真人版哈利片的確幾好睇。外國網Improv Everywhere搵咗個o靚仔扮哈利仔，推住隻白色貓頭鷹走去紐約曼克頓車站，周圍問人9又3/4月台喺邊。難得車站職員同啲途人都好玩得，有人點條正路佢行，叫佢記住要用力衝向條柱，仲有途人自稱係Ron Weasley。想讚吓扮哈利仔嘅小演員好入戲，全程無笑，鍥而不捨問途人，唔通佢真心相信會搵倒入口？

打定底，呢單係舊聞新圖，一直好鐘意鬼太郎，除咗鍾意佢嘅故事古靈精怪，鬼太郎遮住半邊面嘅前衞造型我都好冧。啱啱上網見倒台灣部落格紅人奧麗薇去完台北車站嘅「鬼太郎商店」朝聖，仲寫咗篇好詳細嘅遊記同埋上載大量產品新圖，睇咗當去咗。呢間日本海外唯一一間嘅鬼太郎商店，位於台北車站，產品包羅萬有，水杯、相架、情景模型、蠟燭、棒棒糖、燒酒，仲有商店限定tote bag，不過最吸引我都係綠色嘅傘怪枱燈，睇完我都好想去探吓鬼太郎呀！

有去過日本搭過JR、地鐵嘅，都知道佢哋嘅路線圖有幾清楚，只要有恒心，一定可以喺當中搵到自己要去嘅地方……咁喺西人眼中呢？原來佢哋仲覺得日本鐵道站嘅地圖好得意，仲話好似RPG地圖，佢哋仲集合咗大量車站地圖，俾大家睇吓有幾打機feel。

對無拍拖嘅男女嚟講，噚日情人節係人生一個重大考驗，點樣扮無嘢去渡過呢一日？究竟更唔更新facebook好呢？諗起都頭痕。不過喺日本，有單身烈士作出一個大無畏行動，就係喺東京地鐵車站向途人(當然最好係單身女士)索取朱古力，為咗自身安全，佢哋戴咗黑超同埋口罩，而善良嘅日本人非常欣賞佢哋呢個英勇行為，不停喺twitter傳頌佢哋嘅事蹟。話時話，比在喺香港，你夠唔夠膽咁做？不過我諗會改為戴小丑神面具啩。