呢款扭蛋好啱中二病嘅朋友，而且平平哋玩吓都無妨，總共一式六款嘅機械手臂袖套，實用啲嚟講可以防曬，踩單車或者行山都用得，其實仲可以cosplay。EPOCH公司推出，預計5月發售，去開日本可以留意吓。

之前都有初音版，睇完段片好想講：「每日開電腦見到呢個場面其實都幾開心！」有日本網民最近喺Stream買咗款新嘅動態wallpaper，係3個虛擬YouTuber絆愛「人工智障」一齊出現，不過更瘋狂嘅係嗰首歌，配合埋佢哋嘅表情，難怪喺Twitter超多人RT，入嚟有片睇，仲有link可以買。

Bandai嘅「魂ウェブ」系列之前都出過Star Wars武士版figure，當年有黑武士、白兵同埋Boba Fett，等咗幾年，終於等到呢隻最夾嘅C-3PO出場嘞！著起全身武士裝嘅C-3PO感覺零違和，武士盔甲下睇到佢平時嘅機械服，全身都可動，連眼同嘴都郁得。配件方面，腰部有個紅色葫蘆掛住，仲有把紙扇可以玩，連背部都造得都勁靚勁細緻，賣9504円，入嚟有link。

超級英雄都要放假，唔駛開工嘅時間仲要佔大多數，佢哋平時會做啲咩？外國動畫特效設計師David Cubero本身都係玩具迷，仲好鍾意攝影，自2009年開始就拍攝超級英雄嘅業餘生活，儲儲埋埋大量相片，仲會加入特效，有時又會有其他日本動漫角色例如悟空、小雲等亂入，入嚟有得回帶，鍾意嘅可以follow埋佢IG。

BANDAI SPIRITS嘅一番くじ最新有孖車《Mario Kart》做主題，今日開始有得參加嘞。今次嘅產品最搶眼唔係Mario佢哋幾位主角，反而係一班配角！例如香蕉皮變成嘅拖鞋，烏龜坐喺雲上面吊住嘅鬧鐘，仲有好具殺氣嘅灰石像杯「嘅ドッスン湯呑み」，由今日開始喺日本7-11同イトーヨーカド有得抽，每次620円，去開日本記住試吓運氣嘞！入嚟有得睇晒所有獎品，包括咕臣、碗等等。

日本嘅設計一向好有心思，最近有網民喺Twitter分享咗呢套杯碟，耳柄係係貓嘅長尾，拎起隻杯，原來有隻老鼠收埋咗，超精緻。由品牌Thousand Leaves出品，入嚟有網址。之後有網民分享，原來除咗貓版之外，仲有雀仔同松鼠，入嚟有回帶。

有無人玩過第一代遊戲Pokémon Red and Blue？專賣時裝嘅日本網站Zozotown最近同Pokémon合作，雖然目的係慶祝新game推出，不過聯乘系列就用咗懷舊嘅8bit比卡超做主題，hoodie、T恤、帽，全部低調得嚟又表達到對Pokémon嘅愛。不過我最想買其實係特別版Nanoblock，合共3隻，堅正！留意返而家開始預訂，下年2月底到貨，不過唔接受海外訂購，想買就要搵日本朋友嘞。

想幫屋企個書櫃加啲裝飾？日本設計師monde呢個「窄巷書擋」最近喺Twitter好多人討論，用咗日本嘅街道窄巷做創作概念，喺書與書中間好似可以窺探到街上嘅風景，上面仲裝咗燈，靚到似一件藝術品，難怪喺Twitter好多人留言話想買，入嚟有多啲圖睇，堅靚。

好鍾意日本呢個「貓妖怪」嘅扭蛋系列，由日本品牌奇譚出品，之前出過第一彈，由於反應好 ，11月底會推出第二彈，一共7款貓妖怪造型，全部都唔恐怖好可愛，特別係將條脷伸到好長嗰隻，好想帶佢返屋企！鍾意嘅記住留意返嘞，入嚟有得回帶睇埋第一彈。

日本經常都有呢類連身睡衣賣，今次呢件真心覺得正，由Bibi Lab.出品，搵咗日本知名Coser宮本彩希做示範，件睡衣超多details位，例如拉盡拉鍊後可以當埋口罩，頂帽旁邊有兩個窿可以挑啲頭髮出嚟，手掌可以收埋晒，又可以淨係突隻手指公或者全部手指放出嚟，最正都係去廁所，腰身有拉鍊位，夠快捷方便。amazon賣6,800円，入嚟有link，買嚟做聖誕禮物都唔錯，男女通用。

日本海洋堂今次推出嘅呢款貓襟章幾吸引。有齊5個貓頭，白貓黑貓以至三色貓都有份，全部都係大大個頭嘅立體襟章，扣喺tote bag或者頂帽上面都好睇，貓奴要買。

又有好嘢介紹，有日本網民推介呢間叫「STEAK おおつか」嘅和牛店，位於嵯峨嵐山，樓主形容為超好味，睇相都流晒口水呀！各位去開京都附近旅行嘅記住去試吓。留意返佢每日嘅開業時間係早上11點至下午2點半，晏咗去就無得食嘞，另外逢星期四同日都休息，至於平均消費大概係4千円一個人左右。

日本岡山被譽為「日本首屈一指的牡蠣生產地」，佢嘅魚市場「五味の市」可以食新鮮生蠔、炸蠔，真係睇見都流口水，而最近仲有一個好特別嘅產品推出，就係炸蠔雪糕嘞！雪糕兩邊各自插住一隻炸蠔，一邊食蠔一邊點旁邊嘅雪糕嚟食，一冷一熱，有日本媒體親身試咗，話味道超好，去開嘅朋友記住試吓，而且一杯只賣300円，超抵！不過記住早啲去，間店賣完就會提早關門。

以電話殼嚟講，呢個款式真係好實用好正。日本Twitter最近熱傳呢個iPhone殼，喺390円店「Thank You Mart」有得買，模仿IG介面，貼自己鍾意嘅相或者畫面入去就會變成IG動態，好想要返個！

無諗過鋼琴可以咁有未來感！日本Twitter熱傳呢幾張圖，圖中品牌Roland嘅數碼鋼琴超靚，似藝術品多過似鋼琴。其實佢哋係嚟自Roland之前一個設計比賽嘅作品，設計師嚟自世界各地，由韓國到美國到意大利都有，入嚟有得慢慢睇。