之前報導過許景琛將聯乘Arduboy推出《超級霸王》格鬥Game，最新消息係凡預訂者即送迷你Q版畫集，名信片咁上下Size。另，佢仲話會睇面書專頁關於呢隻Game嘅所有Post，從中選取最佳留言，得獎者會有驚喜禮物咁話喎。

許景琛佈2020年有大企劃，推出《超級霸王》超微型格鬥遊戲，用Arduboy可以玩到。佢話賣點除咗遊戲有佢筆下經典人物角色外，仲可以全球獨家加入玩家名字，機背兼有Q版超霸角色雷射刻印，講明限量咁話。唔知到時賣幾錢呢？Ok期待吓。

吓？乜原來已經出到第四期咩？死火，睇嚟我買漏咗第三期嘞，要去漫畫店補書。講緊嘅係《漫畫少年4》，許景琛喺面書透露將會喺12月推出，大家記得捧場。

許景琛親筆手繪原畫，很想要吧？想要，唔難，盛惠$2000。兩千蚊包兩幅畫，一，全新複製A或B款原畫二選一；二，真實版公仔原畫手繪，都係二選一，有霸意Ken同殺意龍選擇。正呀喂，有興趣請PM佢本尊。

很想要吧？許景琛手繪原畫真跡，我很想要，尤其只此一家嘅超靚Q版。想要，唔難，只要有錢，事緣佢開咗個專賣店，正式登陸Yahoo拍賣網，暫時所見有7幅原畫，Size由24x27cm標準畫板同A4任擇，價錢由$3500至$4000不等。睇啱的話，落價喇。

局勢雖然好亂，但漫畫點都要睇嘅，日日睇住啲不公義流血畫面，唔抽離吓只怕人都癲。好喇，入正題，許景琛《漫畫少年3》10月5日出版，普通版$68。老例出埋特別版，分沙金同沙銀綠兩個唔同封面版本，各送8張貼紙、1張獨立編號證書，各售$280。「至Goal Club有售」，請大家多多捧場。

唔知有幾多存貨，唔知係咪先到先得，淨係知許景琛喺面書咁話：「《CyberQ》畫集這些圖已被收藏，若讀者有興趣的話，可PM我。」很想要吧？PM佢喇。

收主筆親筆畫固然開心，觀主筆畫親筆畫亦係一種享受，許景琛為應付畫板手繪版畫集《CyberQ》，呢期密密手畫畫板，由起稿、勾線到著色，拍晒片畀你睇，真係好正。除咗喺面書分享殺意龍x機械載體、老宗祖x機械載體兩幅畫板嘅創作過程，佢仲開咗個新YouTube頻道「Sir許景」分享短片，大家記得Subscribe。

許景琛將推出第五本畫集《Cyber Q》，詳細資料如下──全書100頁，Size為19cm x 27.5cm，主題係「機械載體」，普通版售$138。另有畫板手繪版，售$1000，包24cm x 27cm畫板同鐳射幻彩大貼紙各一，畫板可自選一個漫畫人物，許景琛會幫你畫埋機體，機體造型由許景琛決定，咁斷估都可以畀吓意見嘅，Fans請多多支持呀喂。

久違了的許景琛，喺面書話將會推出第二本Q版畫集《Cyber Q》，主題係「機械載體」，同時登咗一幅圖畀大家止止咳。佢手Q版畫有幾勁，我諗唔使多介紹，拭目以待。

Edward Loi再次啟動無相神功，臨摹許景琛畫風嘅《街頭霸王》角色已經齊人，恭喜恭喜。翻查日子，佢係今年3月9日出第一幅畫作赤龍嘅，畫到依家11月尾終於完成，少啲心機都堅持都唔掂，結果亦不負眾望。為此，佢仲製作咗一本獨一無二嘅《King Hui Style街霸Sketchbook》，拍埋片畀大家睇睇，又係要拍掌鼓勵。支持！唔好停！Edward Loi兄千其唔好停，畫多啲呀喂。

是日介紹Edward Loi兄畫作，佢講到明臨摹許景琛《街頭霸王》，暫時畫咗赤龍、Ken、軍佬、青怪同印度佬，全部都有板有眼，面相似、用色似、姿勢似，驟眼睇真係以為出自許景琛手筆。值得鼓勵，望佢可以快快畫埋E.Honda、沙加、春麗、拳王、司令等角色，儲齊一套就Very Good。

拿，本網站真係跟到好足架，家陣話畀大家知許景琛《特殊印刷作品咭》第三彈嘅詳細資料，一盒包閃爍金卡、銀彩卡、銀彩絹紋卡、彩幻卡、新萊尼卡同數碼白卡各一張，各A5呎吋，即21cm x 15cm，附公文袋包裝，隨機附送親筆星戰人物迷你手繪畫板一張，每盒$380，限量38盒，12月24日出版，大家可以打去指定漫畫店落訂，報告完畢。

添食再添食，好嘢應份添食，許景琛作品卡準備出第三彈嘞，價錢尚未公佈，估計會比頭兩彈貴少少，因為今次卡Size大咗，A5尺寸，比頭兩彈足足大一倍，另外，食番《Star Wars》熱，第三彈會隨機附送《Star Wars》人物角色迷你手繪畫版，Size係10x15cm，家陣登幾幅正畫畀大家睇睇，唔知能唔能夠勾起你購買慾？

或者有人會話：「學吓畫公仔啫，唔使講到傳承港漫咁誇張呀？」係，係誇張咗，但我真係好理想主義嘅，因為一，際此港漫生死存亡之秋，肯開班嗰個係資深香港漫畫家許景琛，我好理想主義地希望佢可以成功教到下一代接力；二，教室分初中高班，年紀最細小三已經可以參加，興趣好應該從小培養，成年人多嘢做要兼顧，學畫之心無咁Pure，小朋友反而仲大機會會立志從事漫畫學業。唔講理想講番啲實際嘢，學費$1,000四堂，我唔知貴定平，但如果學生作品優異，有可能會結集印刷成書，有興趣就許景琛面書Look Look喇。