Nike巨型鞋盒變鞋櫃 Instagram熱爆個個爭住訂

成日買波鞋,一屋都係鞋盒又唔捨得掉,如果有呢個巨型Nike鞋盒嘅鞋櫃裝住又唔同講法。表面睇好似鞋盒,打開原來係木製鞋櫃,底層仲可以拉開,最多可以裝16對鞋,好襟駛。呢個鞋盒由英國設計師Woodlist設計,暫時見過有紅色Nike盒同埋Jordan III黑色盒,自從將佢呢個自製鞋盒放上Instagram之後,吸引好多人留言話想訂造,佢話價錢方面一個300英磅(港幣$3500左右)未計運費,不過想訂都要慢慢排隊,因為佢鞋有幾十對,但手就只得一對,所以有排等……但有讀者啱啱提醒咗我哋,話呢款鞋櫃其實早於半年前淘寶已經有得賣,仲要賣400蚊左右,咁到底係邊個抄邊個?賺多10倍咁狼?

Read more ›