無論係平時著短裙，或者Cosplay著短褲時，又想好睇又唔想走光，可以買呢條「フリルミニペチコート」，7,020円，5月中出貨。見到呢幾張圖，其實我諗起Nier嘅2B。

究竟要有幾長嘅腳先可以著到呢條褲? 日本有網民用咗500円買咗條白長褲，係就係幾平，不過就算《ONE PIECE》嘅長腳族都未必啱著。佢仲試吓著上身，效果好似一個蛙人，連佢自己都話可以去潛水‥‥‥

咦？點解會噹噹聲嘅？係呀，你要唔要掂吓？不如合奏一曲啦？呢位日本音樂人kaoringMachine就整咗呢條「New Electric Sexy Drum Pants」只要輕敲褲檔就會發出噹噹聲，而且仲可以有唔同聲響，絕對係出入高尚社交場所必備嘅item。

嘻，一見到呢張相我已經好佩服，防蚊褲喎，仲唔係十大偉大發明？唔好誤會，今次唔係出自強國，而係西人發明，笠住佢就等於幫對腳加咗層保護罩，登山遠足毒蚊絕對吸唔倒你血。但係你要忍受比同行朋友恥笑嘅屈辱。咁有口痕友又問嘞，既然係咁，點解我唔著長褲呢？咁你咪騷唔倒長腿囉，若隱若現嘛蠢。