Tag: 葉偉青

網圖分享:高水準鬼月賀圖晒冷 野士創工送《屍殺列車》記事簿

睇咗《屍殺列車》未,我未睇,朋友話好好睇,所以我都打算睇。為宣傳,電影公司搵嚟埋野士創工合作,先喺農曆七月十四鬼節開始出「鬼月賀圖」,之後再由8月24日起至今日,玩有獎競猜遊戲,每日頭十位估中賀圖畫緊乜,即送謝森龍異限量版《屍殺列車》翻頁動畫記事簿一大本。記事簿固然靚,我都好想據為己有,但查實賀圖本身都好有水準,值得大家慢慢欣賞。

Read more ›

離譜!《武道狂之詩》被抄圖!辣興葉偉青!

拿,呢次無得有甚麼致敬、二次創作、模仿、惡搞做藉口喇,根本擺明就係偷圖盜圖!又難怪葉偉青咁嬲,事關《武道狂之詩》港、台小說、漫畫版嘅漫畫圖稿都俾上述自稱「史詩式武俠Web遊戲、豈能錯過的經典神作」挪用。如此偷圖,簡直完全視知識產權為無物,仲夠膽死話自己「五年研發、破憶巨作」添。此偷圖一出,當然惹嚟八方聲討──Felix Ip咁話:「請問誰授權你使用這些圖!這些圖全是來自《武道狂之詩》港台版小説和漫畫,請馬上除下!」、Alan Chio咁話:「破億……精蟲呀?圖都要偷,做咩創作?DNLM!」、Jessie Tse又咁話:「原圖抄襲!小偷行為,很無恥!」、Steven Yip一句到尾:「垃圾遊戲!」對於我呢亭期期真金白銀畀錢買港漫、絕唔睇網上盜版嘅人嚟講,好開心見到呢啲留言,證明香港始終都係個文明社會。

Read more ›

暑假必入!《火鳳燎原》And《武道狂之詩》簽名板!

呢幾幅畫作啱唔啱睇呀?我就極之啱睇嘞,仲極之想據為己有添。唔覺廢話,想買 就唔該課金喇,詳細資料如下:一,《火鳳燎原》A2仿油畫海報共四款,分別為I 款趙雲樊夫人、J款高順張遼、K款關羽張飛同L款孫策太史慈,各$338;二,《火 鳳燎原》樊夫人簽名板,$68,一經訂購可出席陳某簽名會;三,《武道狂之詩》 虎青蘭簽名板,$68,同樣係一經訂購,即可出席喬靖夫、葉偉青簽名會。大鑊, 咁多畫要買,呢個暑期注定荷包大出血。

Read more ›

漫道書展2016 必買葉偉青《Robox Sketchbook》畫板

係奇怪架,明明係漫畫,雖則我明都係書,但點解唔留喺動漫節而要喺書展推出呢?Anyway,漫道出咗宣傳海報,大家可以照單執藥買邊本,排名不分先後──謝森龍異《不是人間》第一及二期、J-head《御守者》第一期、張立人《尋武者》第一期、梁瑋豪《爆裂戰隊》全一期同葉偉青《Robox Sketchbook》畫板等寺。咁呢,我就必買《Robox Sketchbook》畫板,因為只限書展附送《Robox Sketchbook機械設定畫集》,佢啲粗獷筆觸同線條,我一向好Like。(攤位1A-C19、1A-C21)

Read more ›

余兒《今晚打喪屍》前導宣傳圖 葉偉青筆下的張繼聰/白只

葉偉青手畫真係越睇越有味道,風格獨突一眼就認得出,線條好粗好Raw,得Raw得嚟又交代到構圖細緻位,顏色用好少好少,但焦點又永遠唔會搞錯。最新例子有余兒《今晚打喪屍》電影前導宣傳圖──白只扮公仔戙企、張繼聰揸電單車,造型一個型爆,一個搞笑,另外仲有三幅自製武器圖,真係好靚!好值得大家Save起佢,用嚟做Wallpaper一啲都唔削。

Read more ›

網圖分享:漫畫版《武道狂之詩》五周年 葉偉青收賀圖面書洗版

過去呢幾日,我估葉偉青應該好唔得閒,因為佢面書俾人狂洗版,好多港漫人都贈圖賀佢本漫畫版《武道狂之詩》五週年,連忙到死嘅邱福龍都畀面撩兩筆,可想而知葉偉青幾好人緣,嗯……應該咁講,幾有江湖地位!亦反映到港漫界其實好團結,一呼,真係有百應!葉偉青應該覆帖都覆到手軟!以下二十幅賀圖,排名不分先後,大家慢慢欣賞喇──

Read more ›

做善事搵偶像簽名 撐《有限人生無限愛》港漫特別場

先介紹慈善舞台劇《有限人生無限愛》,聽劇名都估到屬洗滌心靈一類嘅劇目,主旨係「傷健一家親」,希望喚醒香港人對殘疾人士多啲關懷、多啲愛心、多啲互助,令社會多啲正能量。舞台劇分三場,第二場屬「港漫特別場」,屆時邱福龍、馮志明、鄭健和、何志文、司徒劍僑、曹志豪、葉偉青、文嘉宏、梁偉家、廖光祖、戴慶賢同余均偉等港漫人會出席,斷估合照留念簽名無詐型。為此邱福龍、鄭健和同文嘉宏仲等登創作咗廣告海報宣傳,據聞現場仲會有精品發售,既可以一睹偶像風采,又可以積福做善事,不妨考慮捧吓場喎。

Read more ›

搵主筆影相 漫道Battle漫畫家簽名會

一年一度又書展,《漫道Battle》今年都有份參與,仲搞咗個漫畫家簽名會造勢添,好事吖,多啲同讀者互動,港漫先可以繼續生存落去吖嘛。記住日期時間,7月19日1:00pm至2:30pm,畫〈香港關機〉嘅曹志豪、畫〈叮噹〉嘅林祥焜、畫〈不是人間〉嘅謝森龍異同畫〈Robox Sketchbook〉嘅葉偉青會留守現場同讀者簽名,如果閣下係佢哋Fans,攞完簽名之後記得影番張靚相喇。

Read more ›

收工去開益 葉偉青辦《武道狂之詩》簽名會

唉,真係唔知點講好,《武道狂之詩》不論小說版定漫畫版,都硬係好似不定期出版咁嘅,要知道不定期刊係連載故事死症,隔N輪先出一期半期,上一期內容都唔記得,叫死忠港漫迷如我又點追番落去呢?點都好,《武道狂之詩》第14期漫畫版剛剛出版,今日下晝六點,葉偉青會喺銅鑼灣開益書店開簽名會,各位收工記得落去捧場,順便交帶葉偉青一聲:「畫快手啲好喎,老友!」

Read more ›

港漫人聚首 《漫道週刊》發佈會

《漫道週刊》係有Heart嘅,睇得出係有心為重振港漫而努力,而事實上,呢本綜合漫畫雜誌可以生存,亦足證有一定讀者同銷量,我當然希望佢長出長有。嚟緊,佢哋會舉辦「《漫道週刊》發佈會暨動漫名家星級分享會2014」,交代未來雜誌發展方向,屆時有大把港漫人出席,想集郵攞簽名,仲唔快啲報名?

Read more ›

網圖分享:《黃飛鴻之英雄有夢》漫畫版主角現身

大家有無睇《武道狂之詩》?原作者喬靖夫手字好正呀呵?漫畫版《武道狂之詩》主筆葉偉青手畫亦唔削啫,我就小說版同漫畫都買齊嘞,你呢?電影《黃飛鴻之英雄有夢》仲未正式上映,葉偉青嘅五大漫畫版主角造型照率先曝光,分別係彭于晏飾演嘅少年黃飛鴻、洪金寶飾演嘅雷公、Angelababy飾演嘅心蘭、張晉飾演嘅伍盛同井柏然飾演嘅赤火。我就覺得畫得好有霸氣嘞,尤其雷公一幅,一睇就知佢畫緊洪金寶,唔知大家又啱唔啱睇?

Read more ›