係幸福嘅香味呀！講緊嘅係日本有網民自製嘅呢款「KFC炸雞焗飯」，用電飯煲就煮到，加兩件炸雞喺飯入面，再加啲雞湯同埋豉油，煮熟飯後將兩件雞去骨再拆鬆啲肉，加少少鹽同胡椒粉攪勻就食得。睇落唔難，仲好似幾好味！

又係超邪惡嘅美食時間，有日本網民喺Twitter分享咗呢個食譜，將黃糖煮溶，再加大量棉花糖落去煮呀煮，最後加啲無榶嘅粟米片落去拌勻，完成品中毒性勁高，被譽為惡魔嘅美味，好想試，好肥！

一排meji朱古力可以點發揮？日本網民就諗到加塊酥皮再界開一條條包住佢，之後焗一焗，睇落唔難，完成品好邪惡，一排朱古力隊晒佢，食完應該好肥。

會唔會太像真？外國嘅Rochelle Javier最近放咗佢嘅作品上網，由紅莓批到漢堡包到炸雞都有，不過全部都係番梘嚟嘅！全部真嘅一樣，放喺屋企應該好危險。不如考慮同KFC合作出實物版炸雞浸浴番梘，感覺應該好正。

墨西哥夾餅Taco好多人鍾意食，佢嘅U字型設計方便徒手拎住食，其實同日本嘅手卷概念有啲似。最近美國店舖「NoriGami」就諗到將兩者結合，整成呢款「Sushi Taco」，之後仲大受歡迎！「Sushi Taco」喺炸咗嘅紫菜入面夾住唔同餡料，例如有天婦羅蝦或者豬腩肉，加埋惹味醬汁，真係睇見都肚餓。呢間店舖暫時以pop-up store形式喺唔同活動出現，嚟緊準備開舖嘞，而家喺網上集緊資，希望快啲喺美國LA開業，咁大家去開旅行就可以試倒嘞！

兩歲嘅時候我仲發緊夢，但呢個外國o靚仔已經成為當紅嘅美食家！佢個IG戶口名叫FoodBabyNY，只得兩歲嘅Matthew Chau同佢爸爸Milke Chau一齊去勻紐約嘅大細餐廳食好嘢，佢哋個IG而家已經有超過4萬個followers，阿爸Mike爸好鍾意帶埋阿仔周圍食好嘢，又發現每次食物相放埋阿仔就特別多人like。睇相見阿仔都無乜點肥，我好好奇阿爸即係Mike哥嘅身形係點，咁食法，應該肥得好快！

麥記啱啱新推嘅德國辣雞堡，又炸雞又雞扒好吸引，有無人試咗？另一邊廂，其實世界各地嘅麥當勞都有推出專為當地人而設嘅特別菜單，外國網站Huffington Post搜羅咗21款世界各地嘅特式麥記美食，好多都係第一次見，睇到我口水流到一地都係。日本嘅薯仔煙肉批好吸引、奧地利嘅咖喱雞粗麵McNoodles同埋俄羅斯嘅麥炸蝦我都好想試，至於比較特別嘅，例如土耳其羊肉包McTurco、西班牙凍蕃茄湯Gazpacho、馬來西亞雞粥等就無乜興趣試。其實我想加多一樣，無錯，就係香港嘅麥麥開飯，雖然我仲未試過。