相信大家小學雞時代，都試過手多多塗鴉教科書，將入面嘅人像公仔改頭換面。呢位仁兄一樣手多多，不過就唔係畫花課本，而係畫花一張十蚊美金紙幣，將印喺上面嘅美國開國元勳Alexander Hamilton，變成《The Dark Knight》裡面飾演小丑嘅Heath Ledger，頭髮似，紅色大嘴似，塊面白過紙尤其似，埋尾寫上「Why so serious」……係囉，唔使咁認真喎，玩吓之嘛。

主持當街捕獲靚女，撩佢哋揭高衫露Bra，如果肯露即獲一百美金獎賞，如果連Bra都肯揭高，獎賞加倍。靚女們如何反應？有人斷然Say no，有人猶豫咗一陣最後Say yes，有人擺明Just for fun背對鏡頭行幾步轉身再露，有人大大方方一副露咪露嘅心態，有人敵不過金錢誘惑連Bra都揭高，最過癮係有個銀髮族婆婆，二話不說就揭高件衫，嗰種霸氣，簡直隔住個Mon都Feel得到。不過好戲盡在後頭，搞完一輪大龍鳳，靚女們先發覺手中紙幣係假嘢，有人嬲到爆粗調頭走，有人無乜所謂作狀兜巴聲主持一下，有人係咁意打咗主持人一槌笑笑口再合照……好玩！真真好玩！不過呢啲真人騷，唔使旨意喺香港玩得成。

好正！3D畫睇唔少，不過喺銀紙上面畫3D畫都係第一次見，而且效果超立體！製作人係鬼佬Donovan Clark，佢慳慳哋揀咗美金1蚊嚟畫，畫功幾正，題材仲好廣泛吓，Star Wars、The Simpsons、異形以至變形俠醫都有份，佢仲話間中會用嚟去餐廳食嘢比貼士用，夠霸氣！不過侍應會唔會拒收？

住Penthouse定住夏愨道1號？高官梗係揀前者，月入萬四蚊以下嘅，有屋住已經偷笑。美國Manhattan有個叫價美金9500萬嘅Penthouse頂層公寓，位處全美國最熱鬧嘅地段，大廈名叫432 Park Avenue，係美國第3高嘅大廈，仲高過帝國大廈或者世貿一號樓。住喺入面，可以喺1396英尺高浸住浴望住帝國大廈、中央公園，成個美國踩喺腳底，浮誇到呢。

品牌The House of Solid Gold專出貴到爆燈嘅奢侈品，最近又有新產品面世。呢架號稱全球最貴嘅爬山單車，開價接近港幣780萬！貴在所有金屬部份都係用純24K金製造，土豪金喎，梗係貴啦！車身仲有個品牌logo，用咗足足600粒黑鑽同埋大量藍寶石鑲成，連水樽位都係鑲滿鑽石寶石，貴氣到呢。至於坐嘅位都唔失禮，係用鱷魚皮舖成，全球限量13架，踩出街直情係身份嘅象徵，不過點泊呢？

藝術無價，外國藝術家Mark Wagner好明白呢個道理，仲好豪氣咁用一大堆美金整成一系列collage拼貼作品，不過佢唔係大花筒，作品入面用嘅都係美金一蚊，整成嘅作品由林肯至新任總統奧巴馬都有份，睇真啲，會見倒佢幾乎用盡每一張銀紙嘅每一個角落，而且製成品樣貌幾可亂真，淨係剪同貼已經難過登天，真心佩服，難怪佢喺美國藝術界地位超凡，入嚟開吓眼界啦。

一蚊美金用嚟食飯比貼士啱啱好，不過如果比呢張畫花晒嘅瑪利奧銀紙，唔知侍應肯唔肯收呢？銀紙中間嘅華盛頓後生咗，變咗瑪利奧大哥，仲成張油晒顏色色彩繽紛，仲正都係啲金幣飛嚟飛去，令人好想衝埋去食金幣。不過瑪利奧應該係日本人專利，幾時先有瑪利奧版円紙？

細過我都試過畫花張銀紙，不過只限加個 “0”字喺10蚊紙後面，如果畫到下面正義聯盟咁花，我驚樓下士多唔收呀！外國有藝術家Aslan Malik，將6款唔同面額嘅美國紙幣畫成正義聯盟，華盛頓、林肯全部變晒超人，有齊蝙蝠俠、綠燈俠、Superman、Wonder Woman同埋閃電俠，最慘都係第七任總統Andrew Jackson，無啦啦要扮女人做Wonder Woman。