好靚呀！日本有網民自製咗套UFO書籤，仲用咗有色玻璃紙風格嘅效果，佢仲親身示範，如果將書籤放喺啲繪本內容上，仲會製造到新嘅效果，好期待佢量產！

今年書展，「創造館」會推出一本短篇故事繪本合集《鬥恐怖》。小說部份，由史兄、三聯幫牟中三、馬菲、陳四月、何晞賢、一樹同余兒負責，有真人真事、以訛傳訛、道聽塗說等靈異鬼故事，可以慢慢煲。插畫方面，由謝森龍異繪畫，佢手畫唔使多介紹喇，我必買Item。

奈樂樂嘅繪本作品，畫風好重童話Feel，但內容卻屬諷刺邪惡世道嘅暗黑系，最新繪本有《跳下去的一秒》，每本$70。同名動畫剛奪「第六屆動畫支援計劃-初創企業動畫優異奬」，動畫唔長，6分鐘，我睇晒，故事講一個小朋友受同學霸凌、學業壓力同阿媽責罰，一時睇唔開跳樓，跳出去的瞬間卻後悔了，最後……都幾反高潮，唔劇透，自己睇。惟一可以講嘅係，結局係同繪本唔同嘅，有乜唔同？我都唔知，搞到我都心思思都想買番本繪本支持吓。

有無睇日本大人氣繪本《野貓軍團》(ノラネコぐんだん)？原來累積銷量已經達到100萬部，隻肥貓認真得嚟又好可愛，最近仲出埋扭蛋，大人細路都鍾意。扭蛋一式六款，有瞓覺、讀書等款式，超可愛，預計4月推出。

最近有日本網民分享咗幾張拉麵做主題嘅插圖，由於風格太突出，題材太新穎，喺Twitter吸引好多人討論。呢本其實係上年講談社推出嘅創作繪本『うどん対ラーメン』，講烏冬麵大戰拉麵，作者係田中六大。原來唔少網民都睇過，有人仲建議應該要將佢動畫化。入嚟有埋佢嘅影片睇，瘋狂得嚟都幾精彩！

擺明賣廣告，都係嗰句，真心Mode希望雪晴隻繪本Figure早日沽清，詳細資料如下──預訂分兩款套裝，一，袋裝包17cm Figure、袋仔、抽獎Postcard各一，售$528；二，木盒套裝，包括17cm Figure、木盒、雙面水晶畫板、鎖匙扣各一、抽獎Postcard兩張，售$728，中獎者會得到一份「超珍藏禮物」禮物。講明限量，即係要搶，所以落訂要快呀，完。

繼鎖匙扣後，雪晴首個繪本Figure真身終於曝光，可能因為條孖辮仔，又可能因為粉紅色，定因為個Pose呢？定因為手捧住隻貓仔太可愛呢？唔係吹水，我男人老狗都覺得個Figure好Kawaii，畀到人一種好嗢馨嘅感覺。賣幾錢，唔知，淨係知周五喺九龍灣國際展貿中心舉行嘅Toysoul 2016有辦睇。Like嘅，即場落埋訂都仲得，真心Mode同雪晴打氣，希望呢隻公仔可以大賣。

兩個月前，本網站報導過雪晴將會推出首個繪本Figure，依家聞到樓梯響喇，雖然未有Figure實物睇，更遑論價錢，但套裝附件鎖匙扣已經做好，雪晴仲拿臨臨掟上面書公諸同好添。大家即管望望，啱唔啱心水？

Coming soon！講緊嘅係雪晴首個繪本Figure，咁Soon到幾時？2017年咁話喎，雖則十畫未有一撇，難得邱福龍已經仗義喺今期《鐵將縱橫》幫雪晴賣廣告，港漫人咁團結，可喜可賀也。為乜無端端出Figure呢？雪晴喺面書留言曰：「話說早2個月的茅一天，一位好友突然問雪晴：『有無興趣做figure？』大概想了5秒，我就回覆佢：『好丫@@』」Good吖，爽快吖，做人做事最緊要隨心，鍾意咪鍾意，想點咪點囉。好，依家隆重宣報，雪晴Figure不日橫空面世，拭目以待呀。

乜嘢叫畫風細膩，我諗Pen So本《香港災難》可以做範本，啲線條又多又密，密得嚟又唔會無晒焦點，呢啲咁震撼嘅構圖，真係無番咁上下功力都畫唔到。《香港災難》係第七屆漫畫新星大賽繪本冠本作品，Pen So喺面書咁樣簡介：「香港首本混合插畫+筆記形式出版，讓讀者和作者一起經歷香港災難發生的經過，結尾發人深省，沿途配上小配件，親歷奇境。」喂？我就係留意到呢七隻字，究竟乜嘢叫「沿途配上小配件」？唔通有得玩又有得睇？書展有售，拭目以待。

未睇過《猛龍過江》唔好話自己係李小龍迷，畫壇大師崔成安即將推出《猛龍過江》電影繪本，將成套電影逐格逐格畫番出嚟，直頭可以當漫畫版電影咁睇，都咪話唔強。繪本分三個版本，一，《電影繪本普及版》每本$78；二，《DVD Boxset特別版》，附《猛龍過江》電影DVD、特大Size印刷繪本、黑白稿及彩稿及特製繪本封面，每本$250；三，《DVD Boxset特製豪華硬皮專貴會員套装》，附《猛龍過江》電影DVD、特大Size印刷繪本、黑白稿及彩稿、特製繪本封面、獨立編號證書、貼紙套裝及吊飾各一，每本$480。頭兩個版本特約書屋有售，最貴版本只限會員訂購。幾時開訂暫時未定，估計大把人搶，密切留意本網站報導。

大家鍾唔鍾意繪本插畫師文地貓嘅作品，佢面書有如此自我簡介：「自小愛畫，愛觀察生活無聊事，愛簡單線條寫畫感受。」啱呀，越能夠用簡單線條表達訊息，越係高手，個人都幾Like佢畫風。文地妹最新2015年月曆已經開賣，睇相，真係簡單幾筆咋，你睇幅驚蟄畫得幾Funny？支持本地創作，買番個月曆撐吓佢場喇。

009好點子呀，將主角「009」三個數目字調轉，就創作出新角色「600」，並以新角色創作網上繪本《600的旅行記載》，一周一畫，逢周四更新，值得大家捧場。

有無發覺，好多人求其畫幅得自己明嘅畫再添多句連標點符號都用錯嘅句子，就話自己係插畫師？真正插畫師應該係點？我諗，至少都應該有本正正經經拎得上手嘅畫集見吓人啩。

75萬円，即係港幣5萬7千蚊左右，你會選擇同屋企人去轉日本過聖誕，抑或買呢本豪華版畫集？呢本專為大人而設計嘅『サーカスぞうのライリー』豪華版繪本，賣75萬円，故事講一隻生活喺馬戲團嘅象仔Riley嘅勵志故事，專比每日面對好多生活壓力嘅日本成人睇。之所以賣咁貴，因為隨書附送一隻人手製作嘅象仔寶石，由珠寶品牌Princess jem出品，。除咗豪華版(750,000円)，仲有特別版(39,000円)同埋普通版($2800円)，豐儉由人，呢幾日去開大阪不妨去RIHGA Royal Hotel Osaka見識吓。不過其實你比75萬円我我會即時好勵志。