出街食飯永遠相機食先，而且大家影食物相越嚟越講究，等起筷等到餸到凍埋。南非嘅網絡供應商MWEB仲踩多腳，推出名為#dinnercam ─ 全世界首部專為影食物相片而設嘅流動影樓，將佢放喺當地嘅餐廳El Burro。想影相將碟食物放上去呢個流動影樓，入面打晒燈又可以調校燈光效果，影完放上Instagram，餐廳仲會將你張相print出嚟比你留念。比著喺我，打死都唔會同另一半去呢間餐廳，咁搞法只會餓親自己。

打定底，唔係新嘢，但好正。意大利網絡供應商Fastweb為咗宣傳自己上網速度快過登天，之前搞咗個活動，居然將地鐵嘅Moscova站變成東京涉谷站！乘客一落車見倒月台變咗涉谷站，仲有著晒和服嘅女子、一班cosplayer等緊車，連貼喺車站嘅廣告都變晒日本海報，仲有月台報紙檔都賣緊日本報紙，乘客都嚇到呆咗。玩到咁大，堅係有創意，如果金鐘站一出就係涉谷，全部變晒日本型男OL，我轉車時會更加開心。