《Toy Story》入面嘅綠兵好搶眼好得人鍾意，估唔到可以用嚟做聯乘波鞋概念。美國波鞋店BAIT最近同Reebok再合作，將會推出呢對「綠兵Instapump Fury OG」，仲模仿返玩具嘅特別包裝，個樣都唔容易carry，不過數量極有限，暫時只限之前抽中過「胡迪&巴斯版Instapump Fury OG」嘅用戶。而嚟緊日本BAIT都會有詳情公佈，有興趣嘅可以follow定佢哋IG (@BAITME.JP)。

有無人同我一樣，好鍾意呢啲綠色兵仔？海洋堂今個月推出呢款1/35可動式兵仔，一式六款，除咗有經典嘅綠色，仲有幾靚嘅海軍藍色，全部都係揸槍射擊動作，有企同埋瞓底嘅動作，由於可動式，可以將隻兵仔變成中槍姿勢，好正。官方仲有大量實物圖參考，入嚟有得睇。

綠兵一直係好多玩具廠商嘅惡搞對象，之前日本嘅「熊貓的穴」出過肥仔綠兵；外國藝術家Dan Abramson又設計過玩瑜伽嘅綠兵喺Kickstarter集資。最近日本嘅Run’a Town就設計咗呢套「K.Y. Soldiers」，成班綠兵做埋晒啲古怪動作，金雞獨立、拋槍、扮MJ、自縛拗腰，全部都極盡騎呢，好肯定戰鬥力Zero！

有頭髮邊個想做綠兵？日本TAKARA TOMY嘅「熊貓的穴(パンダの穴)」系列，之前出過肥仔綠兵，又出過綠兵動物版，最近公佈嚟緊4月仲會有第二彈嘅肥仔綠兵系列，一式6款，有雙槍雄式嘅綠兵；有坐喺彈克車上嘅綠兵；仲有食緊爆谷好high嘅綠兵，全部一睇就知零戰鬥力，不過夠好笑，每扭一次200円。

一直都好鐘意日本「熊貓的穴(パンダの穴)」出嘅無厘頭扭蛋玩具，玩創意唔會交行貨。之前有反肚動物同埋拱橋嘅自由女神，最新就玩《反斗奇兵》入面嘅綠兵，不過係動物版。新系列叫「Green Green Army」，一班動物包括猩猩、北極熊、烏龜等8種動物全部變晒綠色軍團，著晒軍服陀晒槍，連張海報都特別設計過，好正。預計8月底出貨，每扭一次盛惠200円。

我好鐘意《反斗奇兵》入面嗰班綠兵，齊心又動作一致，仲識跳降落傘好搞笑，啱啱見倒網上有得賣一套綠兵，仲要係擦膠！唔係《反斗奇兵》出品，但都一樣止倒癮。雖然我覺得用佢個頭嚟擦字好殘忍，分分鐘頭都刷甩，而且我都好耐無拎起鉛筆寫字‥‥‥一盒六隻綠兵，港幣$50左右，最正都係個名，叫「War on Error」，有意思。