覺唔覺得呢隻嘢好噁心？唔知係鷹定孔雀，件衫仲要掛住幾百對人手，睇見都唔開胃。係囉，如果啲動物喺台上睇見你班時裝友，著晒成身fur行catwalk，感覺其實一樣。最近紐約時裝周開show，外國爭取動物權益嘅團體PETA，拍攝咗一條動物行catwalk嘅短片放上YouTube，今次動物變超模，著上身嘅時裝，就係人類嘅皮，夠大膽兼發人深省。片尾影住後台打緊冷震困喺籠入面嘅中國小女孩，點解係中國藉？PETA發言人話，中國係佢哋嘅頭號宣傳對象，因為當地缺乏虐待動物賠償方案。咁又係，龍虎鳯都有得食，你話嘞。

全世界都講，咁我哋點都要講兩句啦。今次真係要讚Google好醒，將最大缺點 ─ 醜樣嘅Google Glass，同時裝品牌Diane von Furstenberg合作，即刻將件事變潮咗。講緊係識影相、拍片、check日程表，但仲未推出嘅Google眼鏡。經紐約時裝周一班靚女model喺DvF時裝展上一人一副後，潮人同IT人都要行注目禮。為咗配合服飾，眼鏡仲有齊藍、白、灰等多種顏色，不過唔保證量產嘅。model天橋上用google glass拍攝嘅片星期四YouTube有得睇，不過我對靚女們嘅拍攝技巧興趣不大。