好耐無去日本，原來便利店Lawson啲食物換咗包裝，不過評價就非常差嘞。有網民影咗相放上網，話新包裝遮住晒啲食物，一啲都吸引唔到人，另外最多人鬧嘅係納豆，包裝寫住Natto，好多人都唔知係咩，樓主仲串佢係咪扮緊「北大西洋公約組織」(NATO)，連Lawson店員都留言鬧埋一份，話納豆同啤酒都因為新包裝而賣得好差。之後有網民仲改埋圖，入嚟有回帶。

唔講唔知，7月9日原來係日本嘅納豆之日，人氣搞笑動畫《秘密結社鷹之爪》嘅Twitter專頁「吉田@鷹の爪団(本物)」最近就分享咗佢嘅新創作。由於近月珍珠奶茶喺日本好紅，佢諗到將佢改良成日本納豆版，一粒粒嘅珍珠變晒做納豆，奶茶就變成味噌汁，中間仲有豆腐飄浮，當然要有粗飲管用嚟啜納豆，想唔想試先？我就麻麻哋嘞。

又健康，同埋其實個人覺得幾好味……如果你都鍾意食納豆，又鍾意撈埋醬油伴飯食，咁呢個裝置就話可以攪出獨特風味。2018年11月推出，呢個「究極のNTO」唔只可以攪，今次仲可以落埋醬油，3000円，食家囉。

食物嘅賣相好重要，擺靚啲碟邊加啲圖案，又可以賣貴幾十蚊。日本有網明買咗包納豆，為咗整個靚賣相嘅納豆飯料理，佢諗到個簡單而隆重嘅方法。將納豆放喺膠碗底，上面加啲飯，最後反轉佢，灑啲紫菜碎加幾滴芥末醬，即係好有法式料理嘅感覺，其實唔難。

納豆呢樣嘢，鍾意嘅就用嚟送飯都得，唔鍾意嘅就點都唔會食。日本呢啲納豆，打開之後面頭有張紙，呢位日本網民就示範用筷子嚟整走佢，好方便。之後又再有網民出片留言，其實用手都得，不過要有啲技巧……最後，仲有回帶，囡囡狂隊納豆大碗飯。

年尾又係抽獎(清貨)嘅時候，日本有個男仔最近參加咗「納豆男子」搞嘅年尾納豆抽獎活動，禮物係1年份量嘅納豆，即係總共365日，爽吖。又咁好彩居然比佢抽中，佢仲諗：「唉，早知咁好運走去買彩票好過。」點知當佢收到365日嘅納豆時仲驚喜，因為每盒納豆盒面寫住嘅賞味期限，竟然係2016年1月1日！即係嚟緊幾日佢要清晒365日嘅納豆！呢間納豆公司呢個清倉方法的確好絕。

日本人好鐘意食納豆，不過我試過一次就知自己無福消受。如果你都係納豆愛好者，可以考慮買呢個TAKARA TOMY A.R.T.S出品嘅「魯山人納豆鉢」，自己喺屋企整納豆。之所以同魯山人有關，係因為佢發明咗整納豆嘅終極方法，而呢個納豆器就係根據佢嘅教法而設計：先加納豆再用筷子攪拌305圈，加醬油後再攪拌119圈，最後加入蔥同埋芥末，呢個納豆器可以幫你數埋圈數，攪夠就會自動彈起個蓋提你加料，幾方便。想做納豆專家就2月6日準備定2310円買佢返屋企啦。