最近呢兩隻海鷗紅到去日本仲上埋電視。話說佢哋來自倫敦交通部嘅閉路電視，呢部電視裝咗喺東倫敦嘅繁忙街道用嚟視察路面情況，點知吸引咗兩隻海鷗嚟睇，仲企正喺鏡頭前超大頭搶鏡。交通部喺Twitter分享後好多人RT，官方仲幫佢哋改埋名叫Graeme同Steve。而日本新聞都有報導，有日本網民話呢個係佢每朝最想睇到嘅新聞，入嚟有多啲片睇。

日本嘅吉祥物經常帶到驚喜俾大家，最新有呢隻喺AEON活動上表演嘅紅色吉祥物，全程打鑼打鼓手腳並用，演奏X嘅《紅》，而且拍子好準，有人留言問入面嗰個係咪X JAPAN嘅Yoshiki！BTW，我鍾意呢隻吉祥物條八字眉，可愛得嚟有啲憤怒，正！

前幾日介紹過嘅O嘴貓到而家我都記得，超可愛。不過佢有勁敵嘞，就係呢隻古惑嘅伸脷狗Toast嘞。佢嘅品種係騎士查理斯王小獵犬，之所以經常性伸脷，原來因為主人收養佢之後發現佢滿口爛牙，為咗健康著想唯有幫佢剝晒全部牙，而家佢係一隻無牙狗，所以伸脷成為佢嘅招牌表情，仲吸引好多人成為佢嘅fans，Instagram閒閒哋都有超過10萬個followers。計我話，無牙唔緊要，最重要搵到個錫自己嘅主人嘛，你睇佢幾開心。

專門惡搞，鐘意喺杯邊攀爬嘅OL杯緣子(コップのフチ子)，喺日本紅到連《火影忍者》同埋《One Piece》都抄佢，至今出售超過600萬個扭蛋，成績驚人！最近玩無可玩，呢位OL決定唔玩杯邊玩杯底，變成被壓扁嘅杯緣子，效果超搞笑。總共有6個款式加1個隱藏款，預計8月出。壓扁咗嘅杯緣子肥肥哋好得意，一啲都唔失禮。

純粹目測，非正式統計，HTC One應該賣得幾好，無論食飯搭車都見倒人拎住佢，而且用家大部份都比正評。好喇，仲未出嘅，呢部紅色吸唔吸引倒你？可惜呢隻專用紅色只限英國電訊商Phone 4u嘅客人，仲要7月中先有貨，你可以等水貨，或者揀返黑色或者銀色，不過老實，其他新色應該陸續有嚟。

近排我俾一個冇打開機嘅朋友問：「喂我想買PS3呀，但聽講PS4 5月出喇喎。」5月出？5月公佈有PS4都只係傳聞咋，就算真係公佈，起碼一年半載後先出……不過想出機或換機嘅機迷就真係可以等一等，因為日本PS3就真係有新色公佈，就係2月28日推出紅、藍250GB機，最新薄版CECH-4000B型號，賣24,980円。香港呢？未有公佈，不過照經驗就算唔同步都唔會差好遠。