喵星人做完手術後好多時都要戴「喇叭」防止佢哋舔到傷口，日本呢位人氣插畫家「もやぴっぴ」最近又有新作，佢隻黑喵前腳受咗傷，為防佢舔傷口，主人幫佢戴咗伊利莎伯式頸圈，仲畫埋插畫好可愛，不過實際上隻喵個樣似乎有啲無奈‥‥‥之後好多貓奴放佢哋隻喵戴頸圈咕臣嘅相，入嚟有回帶。

日本時裝購物網Zozotown嘅宣傳一向唔錯，之前聯乘Pokemon推出過懷舊8bit產品，又試過送緊身衣幫客人量度呎吋，最近佢哋嘅創辦人兼CEO前澤友作趁新年喺Twitter搞咗個派利是活動，由於新年期間銷售額突破100億円，佢親自拎每人100萬円出嚟派俾100個網民。參加方法就係轉發佢個帖同埋follow佢帳戶，由1月5日開始為期兩日，直至今日已經有超過560萬個轉發，打破咗全球Twitter最高轉發次數！而佢嘅帳戶followers亦由50萬左右跳升到超過600萬，好誇張！

你睇隻貓個樣幾驚？要監視住屋企隻喵星人嘅健康狀況，可以由廁所入手。最近日本SHARP公佈呢個貓廁所，可以紀錄貓嘅尿量、次數、逗留時間、體重等等資料，仲有溫度調節，最多可以對應3隻喵(會有頸圈俾貓帶住識別)。如果發現佢尿量多咗、逗留時間長咗，主人就要帶佢去睇醫生嘞。對應手機App，體積380×576×188mm，售價24800円，7月30日推出，可惜無拍片功能，其實我好鍾意睇佢哋去廁所好認真個樣。

早前東京落大雪，仲係近4年最大風雪嘅一次，無去到嘅都好想睇吓究竟大雪成點？日本攝影師横田裕市最近分享咗輯相，佢喺嗰幾日冒住大雪去咗幾個東京著名景點，包括淺草寺雷門、新宿、渋谷等地方，大雪之下每個人都搭住把遮，成條街白茫茫一片，好靚，仲同平時嘅東京好唔同，入嚟有得睇。

日本京都仲保留好多舊嘅特式小店，雜誌《Kyoto Journal》創立人John Einarsen喺一年前開始，每朝踩單車途中用佢部iPhone影低當地嘅小店，而家儲埋超過200張好有紀念價值嘅相，當中有髮型屋、小食店、賣和菓子嘅店舖，全部都好有特式，令人好懷念香港都曾經有過嘅小店。

好驚！既驚佢條頸斷，又驚佢下爬甩，更驚佢牙骹散。大佬，話晒都係一度厚實木門，就算出術中間係空心嘅，就有番咁上下重量吖，單單用下爬托住真係好牙煙。呢啲紀錄真係唔破好過破，根本就係玩命，先唔講下爬有幾實淨，承唔承受到咁重一度門，如果一個唔好彩度門一跣，之後又再唔好彩一Chok，分分鐘會Chok斷條頸、撞斷鎖骨、扯甩牙骹，仲要頂成分鐘咁耐，惟有寫個服字畀佢喇。

唔好講話鬥快破紀錄，淨係叫你自己除綁到實一實嘅約束衣都難，何況仲要邊玩呼拉圈邊除？片中人係勁，無手用吖嘛，開波咪先用頸玩呼拉圈囉，之後為遷就除衫動作，不停用腰、用胸、又用番頸，有幾下仲疑似用埋籮柚添，總之去到尾個呼拉圈都無跌過落地，係抵佢個樣咁招積嘅。