愛媛縣盛產蜜柑，日本有網民就喺當地買到呢個‥‥‥筆座。好像真，同事見到肯定俾你呃到，唔似樣似，樓主話摸落佢質感都似，每個1500円，入嚟有Link有地址，下次可以去買返個。

係就係有少少不雅，不過放喺書枱望吓佢又幾開心。日本Amuse呢個不良筆座，支筆可以直插趷蘿人仔嘅屁股度；另一款係拱橋版，比較含蓄少少，只係將支筆支插入肚，有紅、黃、藍三隻色，一式六款，每個200円。儲齊一套擺晒喺枱面都幾震憾，如果你枱面仲有位嘅話。

唉，貓奴又要破費嘞！啱啱喺日本網見到呢套貓筆座，喵星人半反肚幫你攬住支筆，就好似同你講：「唔好做嘢啦，陪我玩啦！」貓奴實心軟，就算已經好耐無拎起支筆都想買返屋企齋擺。啲宣傳相仲要專登close up啲貓肉球，好過份！一式六款，每個賣900円，每個月推出一個，引足你6個月。每款嘅喵星人都唔同色，唔放筆仲可以放戒指，啱晒女仔。不過放喺枱面要小心屋企隻喵星人一嘢掃晒落地！