唉，今日香港又唔知新增幾多個本地個案，武漢肺炎究竟幾時完呀？好煩呀。呻煩都無用，惟有奉袁家寶諭，繼續注意個人衛生，記得戴口罩。啱架，龍虎三皇And王風雷武功幾高強都唔係大晒，最怕係唔知自己中咗招又傳染畀人。咁大家記得乖乖戴口罩、勤洗手同多休息，少去啲多人嘅地方喇。

好很好彩，今年仲有動漫節，而Kaiju One屆時亦會推出三個《龍虎門》Figure，先有三皇之一嘅石黑龍，屬第三版遊龍版，背心心口條龍係型，手執雙節棍又係正啫；再來有天下無敵第二版，暫時睇相無面見人，但肯肯定會送多個經典返老還童頭部配件，咁即係祖老祖宗定小劍仙？Lastly，有火雲邪神西城勇第二版，紅頭髮好搶眼，件紫色上衣唔知係咪天蠶寶衣呢？很想要吧？我很想，想要晒三個。

Kaiju One呢期都好積極吓，繼華英雄後，再整多個金鐘罩版石黑龍Figure，每個$500，附雙節棍同雙臂配件。全身閃令令都好搶眼吓，咁閃，唔知金鐘罩練到第幾關呢？罩門又係咪喺腳板底呢……講吓笑啫。

數一數，希望無數錯，老妖、阿柴、白仇、石鐵、石黑龍、王小虎、大水牛、王小龍、王風雷、金牛……好厲害的無相神功！面書朋友仔Alex Lee呢幅龍虎群英圖，有最Iconic嘅Nike眉、大眼睛、起角衫花加嚿嚿肌肉，非常之古早味濃，I really like it。我貪心啲，如果有埋上色版，就更加好了。

有無買Kaiju One聯乘梁瑋豪推出嘅石黑龍Figure？我有，現放喺屋企飾櫃中，觀之甚好。又話說，Kaiju One剛剛出Post，話此石黑龍Figure會有金鐘罩版本特急現身，仲叫大家留意公布云云。仲買唔買？儲開儲全套，唔太貴的話，我應該會入手。

終於有詳細資料，Kaiju One推出嘅三個《龍虎門》搪膠角色──石黑龍、火雲邪神同老祖宗，全部都賣$580，動漫節2019有售。面書專頁好搞笑咁話：「絕對充滿老中青三代嘅矛盾及世代之爭，亦完全反映現今香港社會嘅狀況，後生仔vs富二代vs呀爺式家長」，哈哈，言重了，玩玩具嘛，玩玩具就係想逃避現實嘛，千其唔好講到「反映現今香港社會嘅狀況」咁嚴重。老實，未真正摸過上手，賣五舊幾水我唔識評平定貴，但《龍虎門》始終陪住我哋大，加上又係本地創作，希望大家支持吓。而於我，就當買番個七八十年代屋村仔睇公仔書嘅美好回憶，都抵。

忙到HiHi，搞到今日先有時間睇第993期《新著龍虎門》。睇書心情好跌宕，過程大致可分為四個階段，一，沉悶，繼續打打打打，勇哥繼續打極唔死，場交繼續打極唔完，聖上加鐵五郎加南傑加東奇勾心鬥角，勉強都叫做講得通喇，係劇情拖到有啲恰眼瞓啫；二，搞笑，睇到第五頁，聖上一連打出九個火球，係威係勢，以為又出九陽大霹靂喇，點知唔係，係「霹靂啪嘞」，斷估呢四粒字應該係等同平時「轟隆」、「砰」、「啪」之類嘅擬聲字，但用錯字款兼擺錯位，搞到好似招式名咁，笑咗；三，驚喜加安慰，埋尾喺地窿捐咗個忍者出嚟，救走勇哥兼自爆拒敵，我心底裡暗呼一聲：「好嘢！四大教主之戰應該完咯！」勇哥不死，俾人救走，收科，Good吖；四，失望，睇埋書末下期預告，寫住：「邪神命不該絕，最後關頭有人出手相護，而這個人……竟然是石黑龍」，頂，無端端又關石黑龍事，即係又要打番十期八期先可以離開呢個甚麼幽靈島？唔好咯啩？

面書朋友仔Yew Fei絕對係《龍虎門》Fans，自創劇情兼畫埋一份。喺佢筆下，王小龍係「好鳩撚鳩撚鳩撚鳩撚型」、勇哥係「好鳩撚鳩撚鳩撚鳩撚邪」。而另一幕龍虎群英戰邪神，王小虎、王小龍、老妖同飛妖完全幫唔到手，搞到石黑龍身體斷開兩截，連腸都咇埋出嚟，金鐘罩被破慘死邪神之手。嘩，好慘呀，好陰功呀，好恐怖呀，不過又睇得我好過癮呀。Yew Fei兄，唔好停，Keep住畫落去呀，加油呀。

Kaiju One聯乘梁瑋豪推出嘅龍虎門系列002石黑龍Figure，家陣喺「Toys Collector Market玩具收藏家販售展」有辦睇，柔道小魔童Fans萬勿錯過。同場加映，邱福龍百忙抽空撐場，對火雲邪神Figure愛不釋手。睇相同睇實物始終係兩碼子事，有興趣入手的話，不妨去MK走番轉，望望真身。

又係無聊瀏覽面書，無意中Click入「Legasi Manhua Malaysia @ Komik Hong Kong Fans」。此馬來西亞Cosplay組織，剛剛Post咗一輯Cos《龍虎門》角色嘅相片。睇得出呢班印度尼西亞Coser好認真，王小虎Cos得都OK喇、石黑龍就唔知點咁、王小龍有英氣我Buy、王小鷹一般過一般無乜驚喜、王風雷頭髮無豎起有啲失色、火雲邪神有面具就掂唔評論，至於玉兒……

好消息，梁瑋豪聯乘文化傳信、Kaiju，推出三個《龍虎門》角色Figure。邊三個角色？分別係「天下無敵九死邪功震乾坤」嘅老祖宗、「黑級浮屠無相神功火雲掌」嘅火雲邪神同埋「金鐘罩十字追魂棍刀疤仔」嘅石黑龍。至今尚在Coming soon階段，價錢如何未知，不過就透露咗會玩70年代港漫風格造型，真心Mode好期待。

今期第975期《新著龍虎門》，我係有少少睇到火滾嘅。火滾之處有二，一，第四頁半至六頁半內容全屬「上期回顧」性質，譜過啲新旁白說明，將上期劇情重新演繹一次，使唔使呀？其實上期已經有類似情況出現，當讀者咁無記性乎？二，龍虎群英無端端參與四大教主之戰，本身已經唔多合理，OK，Fine，就當石黑龍急於報父仇搵鐵五郎算帳，拖累埋王小虎、天嬌同飛妖參戰，叫做勉強講得通，但飛妖都唔使搏晒老命保住火雲邪神條命仔嘛，依家陣局勢發展，我完全睇唔出有何「唇亡齒寒」嘅道理在，唔夠打最多咪閃囉；仲有，飛妖唔係晨早改邪歸正嘅咩？救完邪神之後又做乜笠晒水跪低成隻狗咁？叛教都已經叛咗九百幾期喇，到依家先識驚？邪神執行家法嗰陣仲唔敢還拖，堂堂羅剎雙妖之一，又玄冰掌又好輕功，使唔使驚到打冷震？諗極唔明係乜玩法。

睇高手畫畫，從來都係賞心樂事，葉明發畫興大發，新鮮滾熱辣剛剛喺面書掟咗條實時作畫短片，畫嘅係《龍虎門》三皇之一嘅石黑龍，仲順便留言補多句「Happy New Year」。Fine，大家大可當2019新年賀圖咁睇，如果可以送呢幅畫板畀我就好咯。

雖則唔明面書朋友仔Milk DoNg點解咁話：「如無意外…應該係最後一次畫呢三隻嘢。」但佢口中嘅呢三隻嘢確實係破格之作，印象中未見過，甚至諗都未諗過原來可以咁玩法──將王小虎變成閻王、王小龍變成馬面、石黑龍變成牛頭──嗯……咁仲唔係地獄版龍虎三皇？

咁快手！抵讚！話說早三兩日前，面書朋友仔卓翹畫咗三幅女人化龍虎三皇，齋勾線未著色；到今日，上色版本極速出籠喇。齋黑白嗰陣，我覺得石黑龍最正，家陣上咗色，我覺得王小虎正啲喎，唔知大家點睇？不過點睇都好，總之就係好睇，畫多啲畫多啲，加油！