上星期台灣出現咗一位網絡爆紅正妹，名為小希。人氣突然爆發，全因為佢拍咗一輯超性感嘅《變態超人(瘋狂假面)》Cosplay，將T Back底褲笠喺頭，胸前只用吊帶遮住重點，呢份勇氣，即時贏得動漫迷支持，連台灣蘋果日報都搵佢做訪問！香港方面，GameoverHK上星期報導之後，反應都好熱烈，我哋即時facebook搵佢做個專訪，幾日後就得到佢親自回覆，答咗好多問題兼俾咗幾張生活照我哋出，佢話佢阿爸都話佢好變態，但係朋友就讚佢好勇敢咁話！快睇！

對唔住，又係佢，而我又再一次冒住負上深夜放J圖嘅罪名，都要再post新圖。咪住，聽我解釋先，其實，係因為噚晚個post反應幾好，加上佢噚晚預告今晚就放新圖，再加上呢輯圖整埋背景更加完整，再再加上狂賀《變態超人(瘋狂假面)》終於公佈香港喺7月上映，今晚又星期四啦……算啦，我預咗你唔會睇呢段字，老實講，呢個小希身材都唔係話好好，腳短因為得150cm高(仲要得37kg！？)但人哋有heart食住個勢賺人氣，加埋疏爽大方嘅作風……咦？我寫到邊？

雖然遲，但遲到好過冇；又雖然，7月25日上映時，日本都已經出咗碟，但點都唔夠喺大熒幕睇「腐皮壽司」咁震撼！台灣5月3日開始上緊，票房熱爆嘅《變態超人》終於由驕陽電影宣佈會喺香港上映，啱啱出咗港預告，改篇只90年喺《少年Jump》連載、安土慶周原作嘅漫畫，變態就是正義！制裁！

今次真係好羡慕台灣，因為呢套今個月喺日本上映嘅《變態超人》真人版，5月3日就會喺台灣上，但香港睇嚟就冇份……唯有等出碟啦！不過台灣啱啱有呢條預告就大家都有得睇！呢條片睇到男主角華麗嘅變身過程，谷一谷胸肌同股肌，抽起兩邊底褲邊，一扭一彈！呢啲咪就係氣勢囉！

日本4月，台灣5月，咁香港呢？未有消息……唉，又再再勾起我嘅傷心福音戰士。算啦，人應該向前看，呢套由《勇者義彥與魔王之城》嘅福田雄一負責劇本同監督，應該好多笑料，仲有漫畫fans小栗旬協力編劇，男主角狂介由鈴木亮平演。都好，台灣上咗，就算香港唔上，都起碼有中文碟買吖嘛！制裁！