執筆當下，魔童王維基已經公開表明唔會買亞視股份，成壇嘢，我唔明亞視新聞部搞乜，唔通真係趁愚人節同大家開玩笑？苟如是，嗰唔該將呢個咁不知所謂、咁唔負責任嘅電視台釘牌，公器呀，可以攞嚟咁玩法嘅咩？不過好彩魔童對亞視無興趣，否則大有可能好似DDED呢條片咁，又俾六八九跣一劑，到時真係誠其所言，天神都救你唔到咯。

美國網絡熱爆嘅淋冰水活動ALS Ice Bucket Challenge呢幾日正式殺到香港，仲改咗個本地名「冰淋城下」，紅得起除咗因為做善事，仲因為各大明星、網絡紅人爭住玩。香港方面暫時已經有容祖兒、大埔Lulu、司徒夾帶、蔡一智、蘇施黃、俞琤、陳淑莊等等找咗數，拍晒一桶冰水照頭淋嘅短片完成挑戰。嚟緊仲有王維基、林祖舜、夏千福、盛智文、Wyman、張家輝、陳奕迅、鄭伊健等被挑機，作為網民梗係食住花生等睇找數。外國方面，最有心機都係Bill Gate，搭晒棚畫晒圖先玩水，不過都唔夠Iron Man咁夠人氣，仲有靚仔球星C朗，可惜條片超低清，入嚟有回帶慢慢重溫，最重要係睇埋成件事嘅背後理念，大家玩還玩，記住撐埋背後理念。

呢條唔係News，但我覺得有必要提醒大家聽晚記得熄電視，由網民呼籲嘅「萬千熄機賀台慶」，唔係得啖笑咁簡單，笑完仲要真真正正做，你準備熄機未？

希特拉乜乜，希特拉物物又嚟嘞，今次片名叫《希特拉得知HKTV不獲發牌》，改對白改得非常之好，因為完全中晒廣大市民心聲，睇完呢條片，我有少少衝動去遊行。

王維基攞唔到免費電視牌照，我心情已經唔多好，仲要見到羅鈞滿喺面書留言落井下石，啲火就直情燒到上耳尖，學《無間道》黃Sir話齋：「世界唔應該咁架。」