fbpx

Tag: 王小龍

《王小龍傳貳》好多Bug 連「下期預告」都出錯

《王小龍傳貳》好多Bug 連「下期預告」都出錯

作為一個死忠港漫迷,我甚少投訴,但今期第28期《王小龍傳貳》實在有點不敢恭維。唔知係咪年紀大咗眼水無咁多,硬係覺得成期書都濛查查,線條好唔實淨,分色又偏暗啞,每格畫面都有啲凌亂污穢感。人物面相亦唔掂,有幾格玉兒同王小龍一孖眼珠好似唔係望住同一方向,有一格阿谷次郎直頭畫到高低大細眼添。今期Bug都有唔少,東野庸子同王苦海情侶互動無疑幾有趣,但第7頁尾二嗰格出事,「夠喇,咪痴住晒。」出自王苦海把口無錯,但頭髮分錯色,變成好似東野庸子講緊嘢咁;第9頁旁白寫「……小龍的一席話,教王苦海不禁熱淚盈眶。」但阿王苦海就畫到兩隻眼碌到大一大,一副驚愕表情,眼淚都唔見多滴,何來熱淚盈眶?第27頁都出事,旁白係咁寫:「神秘人右腳一屈一舒,如雷吞吐……」但畫面所見,阿神秘人係用左腳踢王小龍的;最最最最離譜係書末「下期預告」有這麼的兩句──「救世主彌賽亞終極夢想展現,拯救世人同時製造滅世巨」,滅世巨「乜」呢?無句號嘅?唔係嘛,居然寫寫吓斷咗,好明顯係就圖擺位走唔晒啲字,喂呀,內文構圖就話一個不小心容易走漏眼啫,要幾千多億個不小心,先可以令簡單如齋text都可以咁錯法?唉,雖然暫時我仲未有棄書念頭,但說實在,係睇到有啲無奈、氣餒、無癮。

Read more ›

影印道定出錯圖? 《王小龍傳貳》小Bug!

影印道定出錯圖? 《王小龍傳貳》小Bug!

勁忙,搞到今日先有時間睇番上周出版嘅港漫。睇今期第27期《王小龍傳貳》,我發現第28頁有個小Bug,第五格無厘頭畫咗隻手撳住玉兒頭殼頂,既無對白又無旁白,唔知想表達啲乜,再睇落去,發覺構圖明顯截圖自之後嘅第六格,頭依然係玉兒個頭,手始知係王小龍隻手。影印道定係出錯圖?斷估唔會專登畫成咁啩?乜都好喇,呢啲小Bug可免則免,希望製作團隊可以望多兩眼先出街喇。另,有個位真心頂唔順,阿西城聖畢竟係個BB,有乜可能「自行從玉兒的懷抱飄飛開去」?自行喎,即係自己識飛喎,你話佢老竇勇哥隔空取嬰都合理番少少吖,係咪咁講先?

Read more ›
《王小龍傳貳》玉兒扮媚娘安撫王伏虎?魔鬼黨佐治死咬王小龍把鬼咩!

《王小龍傳貳》玉兒扮媚娘安撫王伏虎?魔鬼黨佐治死咬王小龍把鬼咩!

不棄書,以包容之心真金白銀繼續撐《王小龍傳貳》,睇到今期第7期,我終於a little bit頂唔順劇情了。一,王伏虎俾藥王洗腦,繼而上演父子相殘一幕,解決方法唔係避開Or打殘Or綁起Or扑暈佢,而係靠玉兒「活用心理學及戲劇經驗,全力揣摩,再現一個幾可亂真的媚娘」嘅類似催眠式行為藝術,再加扮媚娘講嘢說出「伏虎,這不是你的錯……相信我,我有辦法幫到你的。」之類嘅老土深情對白,雙重夾擊試圖令王伏虎回復冷靜。先唔講玉兒原來咁得閒可以讀書進修兼咁有演戲細胞,家陣髮色唔似服飾唔似連粒假癦都無黐上面,如果咁都可以成功安撫到王伏虎的話,咁藥王啲洗腦藥咪流過劉華?二,魔鬼黨之所以介入杜拜一役,全因王小龍先前打傷保羅伯爵,間接連累保羅伯爵俾白蓮四魔虐待、俾大寶太監性侵,喂,話晒冤有頭倩有主喎,加上王小龍都親口解釋咗:「我不知道,保羅後來出了甚麼狀況……但當時我有手下留情。」講得如此清清楚楚,點解阿教父佐治係要死咬住王小龍唔放,而唔簡單直接地覆灼白蓮教呢?經編劇們精心鋪排,家陣魔鬼黨已經好比《古惑仔》社團洪興咁義氣行先,既然咁講義氣,點解唔第一時間班馬直踩韓國搵大寶報仇呢?呢個位我都睇唔明。

Read more ›
網圖分享:《王小龍傳貳》廣告二創 王小龍+玉兒九頭身

網圖分享:《王小龍傳貳》廣告二創 王小龍+玉兒九頭身

自《王小龍傳貳》廣告推出後,坊間迴響甚大,最多人討論者莫過於新廣告好有《賭神》Feel。面書朋友仔雷永順都來玩二創,先來一幅Key圖重現《賭俠》一幕,再來揶揄王小龍同玉兒畫到九頭身,由上至下Key頭頭頭頭頭頭頭頭頭,真係足九個頭喎,同《足球小將》有得Fight呀喂,確實人體比例又係誇張地修長咗嘅,我笑咗。

Read more ›
《王小龍傳貳》出廣告 王小龍賭神上身玉兒大露背

《王小龍傳貳》出廣告 王小龍賭神上身玉兒大露背

《王小龍傳貳》喺今期第1088期《新著龍虎門》正式出廣告了,唔錯吖,畀我感覺幾新鮮,鮮見王小龍一身高貴禮服出場,玉兒仲要高衩低胸大露背添,加埋啲籌碼同四條煙做襯托,非常有《賭神》Feel,切合到新書主題「贖罪籌碼,仇恨底牌」,希望到時搞得好好睇睇喇。另,今期嗰幾格Q版石黑龍,我係有少少睇到笑的,Fine喇,切合到佢樂天活潑性格,不過偶一為之好了,期期都Q版大頭盞睇到悶。仲有想講嘅係,今期交代偽真弓遊說石黑龍撐甲賀,呢Part無問題,但諗唔明嘅係,真弓明明都死咗咯,點解唔考慮出過另一個新角色呢?係要搞到疑似死人翻生咁為乜?成個甲賀派咁多人,求其安排另一個女忍者出場唔得咩?

Read more ›
《新著龍虎門》交代金鐘救地球 金羅漢齋坐樹底都中到毒?

《新著龍虎門》交代金鐘救地球 金羅漢齋坐樹底都中到毒?

好得很,今期第1082期《新著龍虎門》終於交代金鐘救地球了,不過也牽強得很。金羅漢以一身十二關金鐘罩功力迫出黃金之血,作為日後化解三毒嘅抗體有望拯救蒼生,我覺得都OK講得通;但走去印度參悟解毒之法一段,卻十萬個接受唔到,唔明嘅係點解坐喺兩棵樹中間都會無端端中毒,仲要中毒中到先流紅色血,之後詭異地再流金色血,再之後出一身黑汗淋漓,喂,齋坐喺度乜都無做喎,咁到可以開啟到異能天眼通兼中到毒?我知飛昇訣係屈機級的勁,但唔會勁到吸到本身都唔存在嘅三毒殘餘啩?如果有殘餘的話。And,中間一段我都唔係好睇得明,金羅漢明明話:「要終結三毒,王小龍必須死」,但隨住劇情講迫退金聖老同東方真龍後,居然又谷盡一身功力幫王小龍解毒,究竟佢係想殺定殺救?希望下期有個完美解釋喇。

Read more ›

《新著龍虎門》敢膽整死王伏虎? 保羅伯爵二十頭身?

《新著龍虎門》敢膽整死王伏虎? 保羅伯爵二十頭身?

真心,今期第1080期《新著龍虎門》係睇得幾舒服嘅,原因有三。一,將故事主線擺番喺王小龍身上,終於唔使再見到老祖宗了,成件事即時正常番晒,西城勇就好好休息一排吧。二,透過黑仔傑班救兵而帶出魔鬼黨,咁咪好囉,《龍虎門》世界根本大把角色同社團可以發揮,唔使下下圍住勇哥嚟玩嘅,期待之後至尊會同幽冥教都有機會做番出齣好戲。三,稍稍叫做有高潮位,最尾一頁王伏虎出場,為救王小龍同東方真龍決裂,唔通編劇真係夠膽死整死王伏虎?呢個位我幾期待吓。不過呢,第28頁魔鬼黨保羅伯爵出場嗰個Full page真係好攞命,對腳使唔使畫到咁長?個頭又使唔使畫得咁細?身體比例猶如《足球小將》戴志偉,十九幾二十頭身,會唔會離譜咗啲?

Read more ›
Kaiju One x《龍虎門》懷舊風搪膠公仔 陣亡王小龍出場

Kaiju One x《龍虎門》懷舊風搪膠公仔 陣亡王小龍出場

資深港漫迷一定記得《龍虎門》王小龍點死,無錯,係畀激光射死的,嗰期書《陣亡》個封面,依家我都仲歷歷在目,想當年都不知幾震憾。都唔記得第幾彈了,Kaiju One推出嘅龍虎門經典懷舊風搪膠公仔系列輪到王小龍上場,呢個Figure就係以王小龍戰死一幕為藍本。留意番,除咗招牌遮眼髮型同一身打晒交叉嘅傷痕外,胸口、後腰背同小腿都跟番足原著有俾激光貫穿嘅傷口,滴晒血咁原著神髓出晒嚟。如無意外,我一定入手。

Read more ›
網圖分享:右貓的龍虎三皇I字平衡

網圖分享:右貓的龍虎三皇I字平衡

呢排Twitter唔知點解興起I字平衡,由初初Post真人相,到有網友用模型或Figure擺Pose代替之,到家陣輪到大量畫作洗版。插畫家右貓都跟跟風,畫咗幅龍虎三皇贈興,但見王小虎出一招朝天腳,跌晒膊咁都不知幾可愛,後面嘅石黑龍同王小龍就做緊熱身。佢仲好好心機地摷番《新著龍虎門前傳火雲邪神》第10期封面出嚟,封面裡面嘅勇哥都係做緊I字平衡,應該係出緊霸腿一式「一將功成萬古枯」。

Read more ›
網圖分享:積奇畫王小龍

網圖分享:積奇畫王小龍

是日分享面書朋友仔積奇畫作,今次佢畫嘅係呢期好紅嘅王小龍,肢體動作有氣勢,背景條龍好精細。點可以畫得咁靚?佢話:「通常我習慣用藍筆起好草稿後,再用黑筆勾線輪廓,之後……留意下回發展」,即係尚未畫完,期待定稿會著色喇。

Read more ›
《新著龍虎門》出黑線精描版 陳笑洛畫水墨王小龍

《新著龍虎門》出黑線精描版 陳笑洛畫水墨王小龍

對於鍾意儲特別版封面嘅Fans嚟講,嚟緊周四《新著龍虎門》又要買兩本喇。坐鎮廟街嘅陳笑洛會畫一個水墨版,同時亦會出個黑線精描版。構圖同樣係懺悔+內疚+抑鬱+滴汗王小龍大頭,兩個版本都咁靚,係值得入手嘅。

Read more ›

《新著龍虎門》銀光版封面 王小龍揸電單車

《新著龍虎門》銀光版封面 王小龍揸電單車

成日都有人話公仔書出特別版旨在呃讀者錢,呢個論點我係200%唔同意的,自由市場,鍾意就買唔鍾意就唔買,無人出刀篤住你心口,你情我願無話呃唔呃的,之所以嚟緊周四《新著龍虎門》會推出多個銀光版,我係300%支持的,多個選擇唔係好事咩?鄺志德剛喺面書釋出銀光版封面打稿,構圖係王小龍揸電單車,確實係靚,黑白線條好有Feel,相信好多C-Hing又要買兩本書了。

Read more ›
網圖分享:李健良畫狂王+王小龍+伯益

網圖分享:李健良畫狂王+王小龍+伯益

李健良人緣係好嘅,因為有《山海逆戰》邱福龍、《阿修羅》和仔大人同《新著龍虎門》鄺志德幫佢免費賣書展廣告。為此,良哥作畫一幅以表謝意,佢畫嘅狂王、王小龍同伯益,又係另一種味道。

Read more ›
網圖分享:奉袁家寶諭 龍虎群英Big 4提你戴口罩

網圖分享:奉袁家寶諭 龍虎群英Big 4提你戴口罩

唉,今日香港又唔知新增幾多個本地個案,武漢肺炎究竟幾時完呀?好煩呀。呻煩都無用,惟有奉袁家寶諭,繼續注意個人衛生,記得戴口罩。啱架,龍虎三皇And王風雷武功幾高強都唔係大晒,最怕係唔知自己中咗招又傳染畀人。咁大家記得乖乖戴口罩、勤洗手同多休息,少去啲多人嘅地方喇。

Read more ›
網圖分享:王小龍當男一

網圖分享:王小龍當男一

或者知道嚟緊《新著龍虎門》將會以王小龍做男一,所以面書朋友仔雷永順忍唔住畫番幅王小龍賀一賀佢。打狗捧、降龍十八掌、終極九陰歸元……我都等緊小龍哥做番場好戲呀,但最重要嘅係,千其唔係好似舊著咁整死佢。

Read more ›