Post Tagged with: "玉皇朝"

鄺志德再報料 2018書展玉皇朝出《玉郎傳》
by / on 21/06/2018 at 9:35 pm

鄺志德再報料 2018書展玉皇朝出《玉郎傳》

書展將至,玉皇朝開始出招喇,鄺志德繼續喺面書報料,話今年玉皇朝打算推出《玉郎傳》,雖然封面未有得睇,但洋洋灑灑三幾百字有埋內容簡介。由60年代初涉畫壇開始,一路講到2018年動畫《神兵小將2》載譽重臨、玉郎巨星文化創意園正式動工等等,但好可惜,「有關多姿多彩的感情生活,原來是一個美麗的誤會。」噢!我最想睇嗰Part無影添。Anyway,黃玉郎一生咁多姿多彩,呢本文字書寫得越長越好,我期待嘅係一本厚厚磚頭書,無乜插圖都無所謂,最緊要多料爆。

Read more ›

鄺志德報料 玉皇朝出《龍神》完全版
by / on 20/06/2018 at 9:34 pm

鄺志德報料 玉皇朝出《龍神》完全版

鄺志德剛剛喺面書報料,玉皇朝將會喺2018動漫節推出邱福龍名作《龍神》完全版,上下兩冊,封面、內文、人設全輯錄,硬皮封面有埋皮盒收藏,每套附獨立編號,限500套。佢喺面書登咗幾幅內文稿相,依家隔住個Mon睇番,真係一啲都唔覺得Out,依舊靚到啪啪聲,如果唔太貴的話,絕對值得入手。

Read more ›
玉皇朝動漫節紀念簽名版啱Feel Tee圖案太大著上身會變形?
by / on 11/06/2018 at 9:45 pm

玉皇朝動漫節紀念簽名版啱Feel Tee圖案太大著上身會變形?

書展未到,2018動漫節已經有聲氣,講嘅係玉皇朝,剛剛喺面書Post咗精品相片出嚟。六款紀念簽名版各限量100塊,每塊$100,儲晒都不過$600,感覺幾抵玩,死忠Fans應該會乖乖科水;至於Tee咯喎,有兩款,唔係話龍神同火雲邪神個構圖唔靚,但使唔使咁大個呀,著上身,個構圖斷估應該會變晒形,著出街,又會唔會太過招搖隔九條街都望到呢?希望呢個只不過係參考圖,實物可以靚番多少喇。

Read more ›
《新著龍虎門》2200期特別版 一書六板$740
by / on 14/12/2017 at 9:30 pm

《新著龍虎門》2200期特別版 一書六板$740

一本公仔書可以出到2200期,確實係一個里程碑,之所以《新著龍虎門》2200期出紀念版,亦屬順理成章。價錢$740,包6幅降龍神腿水晶簽名板第二彈同第2200期漫畫,計死數,減番公仔書本身$20,每幅簽名板均除$120,我就覺得價錢尚算合理。玉皇朝除咗喺今期《新著龍虎門》闢一頁賣廣告外,鄺志德亦都喺私人面書幫手宣傳,仲畀多幅草圖封面畀大家添,我估儲開第一彈嘅,今鋪都應該唔會走雞。

Read more ›
香港版《鋼之煉金術師》完全版開訂 $1288送八張明信片
by / on 28/11/2017 at 11:00 pm

香港版《鋼之煉金術師》完全版開訂 $1288送八張明信片

嗯,我記得,《鋼之煉金術師》係我黐隔籬位同事睇嘅,後尾同事辭職,無人供書搞到我都無追落去,所以唔知結局如何,亦所以玉皇朝話出《鋼之鍊金術師》Boxset,我係有啲心郁郁想入手嘅。全18期完全版,送八張明信片,「至Goal Club」預訂價$1288,買唔買好呢?

Read more ›
玉皇朝加價 《新著龍虎門》+《皇朝君臨》下期$20
by / on 29/04/2017 at 9:30 am

玉皇朝加價 《新著龍虎門》+《皇朝君臨》下期$20

黃玉郎喺今期第884期《新著龍虎門》「玉郎信箱」透露:「經詳細分析、慎重考慮後,敲定玉皇朝旗下的《新著龍虎門》及《皇朝君臨》,由下星期開始作溫和調整,象徵式加一元,每本售價二十元正。」都覺得意外架,唔係意外佢加價,而係意外佢居然忍到呢一刻,先同其他港漫睇齊加一個大洋。你問我成壇嘢點睇?繼續睇囉。係,我認我好唔長進,我認我好不滿《新著龍虎門》劇情,唉……蚩尤由戰神變傻仔、石黑龍同王小虎變大茄、王風雷繼續行行企企唔知做乜、出埋晒啲獵神者遲早變《龍珠》、陳傲雲又狗唔搭八出場……但,我實在過唔到無《新著龍虎門》睇嘅禮拜五,呢一蚊,我實豪畀佢。

Read more ›

孖寶裝《新著龍虎門》1月19日見街 送利是封每本$60
by / on 06/01/2017 at 9:45 am

孖寶裝《新著龍虎門》1月19日見街 送利是封每本$60

每年見到玉皇朝賣利是封廣告,即係代表農曆新年就快到嘞,今年孖寶裝《新著龍虎門》鐵定1月19日出版,特別版分「龍虎三皇戰無不勝」同「神威虎猛天下無雙」兩個專刊版本,各附送一套八個利是封,各售$60。兩套利是封有乜唔同?無唔同,都係龍虎三皇、王風雷、戒仔、石鐵、王小鷹加韋陀做主角,淨係底色一紅一黃有分別咁解啫。抵唔抵買?梗抵!計死數,孖寶裝即係一書兩期內容,《新著龍虎門》依家賣緊$19,兩期內容即係本身已經值$38,$60減$38即係$22,$22除8,即係每個利是封唔使$3,咁你話抵唔抵嘞?

Read more ›
鄺志德玉皇朝新作 鄺彬強+鍾英偉回歸
by / on 18/10/2016 at 11:30 pm

鄺志德玉皇朝新作 鄺彬強+鍾英偉回歸

真係引死人,就好似唧牙膏咁,逐啲逐啲唧出嚟,早三兩日前咪報導過鄺志德會搞新書嘅,家陣有啲多進一步消息,佢喺面書釋出疑似人設一張,兼留言曰:「新書每週例會,由6:00pm在玉皇朝公司再轉戰深水埗愛民生飯店,11:00pm五小時會議結束,腦震盪大豐收,鄺彬強同鍾英偉非常有火,敬請期待,壹壹壹捌!」Wow,有主筆鄺彬強,仲有編劇鍾英偉,呢個組合有料到呀喂。留言一出,八方呼應──Kai Yip Wong:「感動~~彬強番來,鍾Sir都返來了~~~1118好意頭,一定撐硬~~~」、Kin Kong:「天子群英會。」、Thomas Choi Yo:「阿偉都返嚟了!天子大集結喎,加油。」個人認為最啱聽都係Chan Howard呢句:「神兵F?乜書都好,一於整本勁作搞旺個市!」係囉,玉皇朝既為港漫龍頭,唔應該出咁少書嘅,有咁大搞咁大啦唔該。同埋,我想講,鄺志德識得幫襯民生飯店,識食也!

Read more ›
「壹壹壹捌」皇者再臨 玉皇朝出新著《天子傳奇》?
by / on 14/10/2016 at 8:30 pm

「壹壹壹捌」皇者再臨 玉皇朝出新著《天子傳奇》?

今期《新著龍虎門》背頁出咗個疑似廣告物體,疑似人設又疑似封面,仲有疑似故事簡介:「為了不讓這裡變成另一個朝歌!我決定要以先天乾坤功,把你轟進冥獄!」玉皇朝出新書就梗架嘞,但究竟係乜東東呢?睇角色相頭有啲似姬發,再加埋「皇者再臨」四隻大字,好難唔令人聯想到係《天子傳奇》系列;而「壹壹壹捌」四隻大字呢,唔通又暗示緊將會喺11月18日出版?BTW,疑似廣告物體一出,鄺志德面書即時好唔得閒,讀者紛紛留言詢問──郭晉瑋:「外表是姬發,其實是演新的角色吧?」、Chan Howard:「新著天子?!」、Cho Kin Joe Ng:「超期待。」究竟即係點啫?As一個港漫迷,我都好想知道答案呀。

Read more ›
玉皇朝《春秋猛士》率先跑出 三月正式出版
by / on 01/03/2016 at 4:00 pm

玉皇朝《春秋猛士》率先跑出 三月正式出版

大抵已經試啱水溫,之前玉皇朝推出每本$10嘅《春秋猛士》、《靈‧狐‧劍》同《乾坤奇俠》,最後由《春秋猛士》率先跑出,喺今期第320期《春秋戰雄》同第823期《新著龍虎門》,《春秋猛士》正式出咗廣告,可以獨立成書,決定三月出版。至於係出普通$17單行本,定好似《皇者之路》咁推出類似$20潮華本,咁就暫時未有定案。Good吖,家陣報攤實在太少公仔書喇,有多一本新公仔書睇始終係好事,加上估計故事同即將完結嘅《春秋戰雄》有一定關係,話唔定係甚麼外傳前傳,有個底,相信讀者唔難受落。

Read more ›
玉皇朝出三新書 創號刊序章$10試水溫
by / on 05/01/2016 at 8:45 pm

玉皇朝出三新書 創號刊序章$10試水溫

玉皇朝上周五無端端一口氣推出三本新書《春秋猛士》、《靈‧狐‧劍》同《乾坤奇俠》,屬細書仔,不過足30頁,每本賣$10。三書封面標明「創刊號‧第一期序章」,何解有如此奇怪舉動?個人推測純為試水溫,邊本好賣就做大邊本真正出番大書賣番$17。純個人意見,三本新書都幾好睇,《春秋猛士》會唔會係《春秋戰雄》外傳?拭目以待;《乾坤奇俠》就人物設定好睇過內文,不過古仔係幾緊張嘅;《靈‧狐‧劍》則屬我的最愛,我鍾意徐大寶手畫,佢畫女確係有一手架。作為一個死忠港漫迷,但凡有港漫新創刊,我必買,最多唔好睇第二期即斬纜嘅啫,而老實講呢三本新書都唔錯,絕對係水準之作……But,唔知點解,有網民硬係鍾意唱衰,係咁挑剔,為此,網民高美士有感而發,留言曰:「丹一評論,大拿拿攞成三十蚊出嚟,老虎都扮下漫畫專家評下書抽下水先!當我睇完圖中呢三本書仔,我個結論係:『咁X高要求就咪X睇公仔書啦,走去睇大英百科全書啦!』評X完,係咁先!」Exactly說中我心底話,查實睇公仔書啫,使唔使咁雞蛋挑骨頭?

Read more ›

再推空氣淨化器,剩餘物資賀《新著龍虎門》800期?
by / on 05/09/2015 at 7:00 pm

再推空氣淨化器,剩餘物資賀《新著龍虎門》800期?

都要利申多次,我都係《新著龍虎門》死忠Fans嚟嘅,但呢次有少少睇唔過眼。仲記唔記得喺剛剛過去嘅動漫節,玉皇朝推出咗部空氣淨化器?睇個勢,賣唔晒喎!如果唔係,點會搞壇《新著龍虎門》超限定紀念珍藏版,隨刊附奉「新著龍虎門800期紀念精巧空氣淨化器」?仲要分「俠氣型」同「義氣型」任君選擇,各售$220。剩餘物資重新包裝再推出?我唔想咁諗……不過望過宣傳廣告,個包裝都尚算型仔嘅,至於值唔值,就真係見仁見智嘞。

Read more ›
大手筆 玉皇朝送盈量級簽名板
by / on 29/08/2015 at 11:00 am

大手筆 玉皇朝送盈量級簽名板

黃玉郎呢次都算大手筆,旗下《春秋戰雄》、《新著龍虎門》、同《神掌》同《東方真龍》加價至$17,為答謝繼續支持,前三本漫畫會連續四期送盈量級簽名板,今個禮拜出咗第一彈,三張簽名板都好正斗,背面仲印埋2016年月曆,值得收藏。而《東方真龍》呢,就係咁意送番張拉頁海報,王小虎出招游龍戲水,都畫得幾有氣勢吓,收貨!

Read more ›
玉皇朝旗下漫畫 下期加價至$17
by / on 25/08/2015 at 9:00 am

玉皇朝旗下漫畫 下期加價至$17

好嘞,玉皇朝終於同全世界睇齊嘞,黃玉郎喺今期第796期《新著龍虎門》專欄「玉郎周記x玉郎Mail」公告天下,旗下《春秋戰雄》、《新著龍虎門》、《神掌》同《東方真龍》將於下期開始一律加價至$17。加兩蚊,改凍飲都唔止,我諗港漫迷唔會肉赤,咁阿黃生都好識做,話會送番幅盈量級簽名板畀讀者,物輕情意重嗰隻喇,至於點送法,詳情會喺下期公佈。對於呢個消息,樓下相熟報攤老闆娘舉腳贊成:「全部公仔書賣$17咪好囉,本本唔同價錢,記都記死我呀。」哈哈。

Read more ›
玉皇朝《神掌》 7月24日創刊
by / on 23/07/2015 at 9:30 am

玉皇朝《神掌》 7月24日創刊

《春秋戰雄》,唉,又神又魔又妖又怪,睇到我根本分唔清邊個打邊個;《東方真龍》,唉唉唉畀足三個唉添,又強者又虛無又死而復生,唔知仲以為睇緊《龍珠》,依家剩係得番《新著龍虎門》尚叫做有啲睇頭。之所以我對7月24日創刊嘅《神掌》好有期望,為宣傳,玉皇朝特登喺《新著龍虎門》刊登幾頁《神掌》創刊號內文畀讀者睇辦,第一個感覺係──唔,OK!尚算對辦!畫功絕對見得人,黃玉郎仲話喺畫面構圖方面會落足十二成功力,有實牙實齒嘅招式對拆,唔會一味畫到成格又罡氣又光刀又氣勁就當出招咁話喎。真心Mode,非常拭目以待,唔好令我失望呀。

Read more ›