Post Tagged with: "牛佬"

牛佬完結《古惑仔》 陳浩南立花正仁死其一
by / on 19/12/2019 at 9:32 pm

牛佬完結《古惑仔》 陳浩南立花正仁死其一

年尾流流,做乜搵啲咁嘅嘢搞呀?完全唔明牛佬點解要下個咁嘅決定,讓我等《古惑仔》死忠Fans傷透心。佢喺今期第2297期透露最快三四個月、最遲六七個月後完結《古惑仔》,事先張揚以陳浩南對立花正仁一戰作最後戲碼,講到明其中一個一定要死,嗚……就算完結,都唔使整死佢哋是但一個呀?唉,一諗起以後逢星期一同四,落街第一件事買煙買《古惑仔》嘅日子就快消失,我就好擔心,我驚會好唔慣,我真係有啲唔知點算好。各位C-Hing,不如我哋一齊集氣,跪求牛佬收回成命好唔好?

Read more ›

牛佬《古惑仔》評價年輕人 立花正仁吹到啤一聲
by / on 11/12/2019 at 8:44 pm

牛佬《古惑仔》評價年輕人 立花正仁吹到啤一聲

今期第2294期《古惑仔》,牛佬透過立花正仁應承久野一郎擔當「暗黑之門」教練一幕,對時下年輕人作出評價,總結為「不太理會別人,只會埋首手機;不懂與人溝通,根本,連說話都不會;不會寫字;完全欠奉禮貌」。我認同牛佬睇法,實情我每日返工都見到一大班呢類廿零三十歲低頭族同事,佢哋唔算無禮貌,見面會點頭,但點完頭後會極速耷低頭閃開,寫字肉酸到震,唔多講嘢但講親嘢都一舊舊,無厘神氣淨係識Loop手機。面對佢哋,我覺得好應該學習吓立花正仁嘅思維:「世界既然變成這樣,我們就得適應,世界──是年輕人的嘛!」牛佬呢段寫文戲寫得好,好正面,無錯立花正仁俾班後輩吹到啤一聲,但世界確實係屬於年輕人,所以老屎忽們切忌敦起個食鹽多過你食米款,亦切忌阿芝阿佐將「呢一代好唔掂」、「一代不如一代」之類說話擺喺口邊,總之互相尊重就可以了。不過呢,有樣嘢我就真係一億個頂唔順,話說劇情提到尚未畢業嘅殺手重信同清隆,同檯食飯都要用WhatsApp溝通,好似啞咗咁。Sorry,你話我老土都係咁話,呢種所謂新一代溝通文化,我真係接受唔到。人都坐喺你側邊咯,都仲要篤篤篤溝通?把口不如用紅毛泥封咗佢喇。

Read more ›
《古惑仔》紅白酒系列 不日推出
by / on 26/11/2019 at 6:59 pm

《古惑仔》紅白酒系列 不日推出

牛佬喺面書專頁「古惑仔Teddyboy」報料,話將會推出百利達《古惑仔》紅白酒系列,暫時未知價錢。齋望酒標,無睇錯應該有陳浩南、山雞、包皮同大頭仔等四款。都係嗰句,我唔好酒,但鍾意個酒標,如果唔太貴的話,必定入手。

Read more ›
誇張!牛佬大煙癮每日五包煙!
by / on 25/11/2019 at 8:33 pm

誇張!牛佬大煙癮每日五包煙!

非劇透,純粹有感而發,有啲心底話想同牛佬講吓。話說連續兩期《古惑仔》,牛佬都喺專欄透露自己煙癮勁大,上期佢咁話:「近排牛佬食煙比平時多咗好多好多,平時一日四包左右,最近升咗級──五包!目的係想將啲煙味噴落稿度,等你哋感覺到!」今期佢又咁講:「自己定下,一年必需洗牙一次,主要是自己抽煙過多,一日四五包之數,可以想像牛佬的一棚牙是甚麼模樣,不洗,見不得人。」嘩,一日五包煙,以每包煙約$60計,咪每日齋食煙都食成三舊水?都好重皮喎。查實呢,為隊靚稿又好為儀容洗牙又好,都奉勸牛佬食少兩支喇,錢事小,危害健康事大嘛。As幾廿年煙民,知道叫牛佬戒煙就肯定無可能架嘞,但終極目標減半有得傾嘞啩?慢慢減量,逐日逐日食少啲,有心一定做得到嘅。真心Mode,祝牛佬身體健康。

Read more ›
《古惑仔》封面倪匡題字 下期謝森龍異出場
by / on 07/10/2019 at 6:19 pm

《古惑仔》封面倪匡題字 下期謝森龍異出場

真心Mode,正到核爆,真係要買。今期第2276期《古惑仔》封面高質到一個點,強烈建議牛佬印製成海報或Postcard公開售賣。由於太潦草,倪匡題嘅最尾三粒潦草字未必人人睇得明,而牛佬亦親自解畫──「江湖巨人陳浩南,百戰百勝非等閒」。另,下期封面呢,終於輪到我極Like嘅謝森龍異出場,佢畫嘅係大飛,件貼身衫圖案花呢碌,請用心睇,大家睇到乜?,係獅鳥呀喂!

Read more ›
有型馬遜操刀《古惑仔》封面
by / on 23/09/2019 at 11:00 pm

有型馬遜操刀《古惑仔》封面

牛佬人緣好,繼續邀得同行客串,今期第2272期《古惑仔》封面由馬遜操刀,出來效果唔錯,簡簡單單畫南哥叼住口煙怒睥,好有江湖大佬味,我好Like,如果之後可以印成海報送畀讀者就好咯。另,牛佬喺「Cowman Msg」話:「由佢炮製出嚟嘅陳浩南,係咪零舍有型呢?梗係,畫似主人形嘛!馬遜真人好型架!」為此,我專登瀏覽馬遜面書,好快就搵到呢張相,誠然,馬遜真係幾靚仔有型,最重要係,有股正氣。

Read more ›

撐雞蛋 撐《古惑仔》加價至$25
by / on 04/09/2019 at 1:44 pm

撐雞蛋 撐《古惑仔》加價至$25

牛佬喺今期第2266期《古惑仔》宣佈,下期第2267期開始會調整售價至$25,即係加$2。我選擇繼續撐,希望大家都繼續撐,因為某程度上,撐《古惑仔》等於撐雞蛋,明就明,唔明就唔明,講完。

Read more ›
栢迪操刀《古惑仔》封面 下期新增專欄「和平連儂牆」
by / on 19/08/2019 at 9:30 pm

栢迪操刀《古惑仔》封面 下期新增專欄「和平連儂牆」

牛佬繼續邀請港漫主筆幫手畫《古惑仔》封面,今期第2262期輪到栢迪出手,感覺非常煥然一新,係好養眼嘅,絕讚。另,今期《古惑仔》預告小改革,下期開始推出新專欄「和平連儂牆」,牛佬講到明:「歡迎廣大不同意見包括中立、和理非、撐警、藍絲與黃絲等等人士,把心中所想盡情抒發,我們會將你的心聲刊登於『和平連儂牆』,讓大家一起分享。」Very good,大家有乜想爆想發洩,一於打幾隻字畀牛佬喇,不過記得唔好長篇大論,限50字OK?

Read more ›
謝牛佬發聲 《古惑仔》封面紀錄持槍人形物體
by / on 09/08/2019 at 7:54 pm

謝牛佬發聲 《古惑仔》封面紀錄持槍人形物體

今期第2259期《古惑仔》封面個光頭人形物體好熟口面呀呵?拎住支槍個Pose好有型呀呵?神態好威猛呀呵?真係呸呸呸呸呸!牛佬話:「講吓今期封面──今期封面,算係紀錄近期社會某啲令人印象難忘嘅畫面!第日睇番,就知道香港曾經發生啲咁嘅嘢!」多謝牛佬站喺雞蛋一邊,而呢個畫面,我諗所有香港人都一世難忘。

Read more ›
想哭!牛佬都諗唔到嘅《古惑仔》情節上演!
by / on 22/07/2019 at 8:30 pm

想哭!牛佬都諗唔到嘅《古惑仔》情節上演!

擒晚嬲到訓唔著,不斷Loop面書Loop到凌晨四點,越Loop越激心,我差啲想哭。訓醒,落街買公仔書,擺低$23畀書報攤老闆娘後,我喺心裡面講咗一聲:「多謝牛佬。」多謝牛佬站喺雞蛋一邊,不過我諗牛佬點叻諗橋都好,都諗唔到現實世界會發生暴徒入港鐵車廂無差別打市民、細路、大肚婆咁荒謬嘅情節。今期第2254期《古惑仔》封面,好明顯係回應緊上個禮拜新城市廣場困獸鬥,But今日周一書見街,呢個封面已經Out。Out得很快,因為情況變得更壞。書裡面九紋龍對狐狸一戰,講皇氣借故推撞記者,喺現實世界係真嘅;東英同洪興兩瓣古惑仔驚皇氣作鳥獸散,喺現實世界卻係假嘅,因為……不解釋,亦唔使解釋,大家有眼睇。天佑香港,香港人加油。

Read more ›
牛佬《百戰話當年》畫集 書展有售
by / on 17/07/2019 at 9:15 pm

牛佬《百戰話當年》畫集 書展有售

  今年年頭,牛佬將每期《古惑仔》單行本嘅「百戰話當年」海報輯錄成書,推出咗本《百戰話當年》畫集,如果大家當時無買依家又想買番的話,今年書展可以補購番(HALL 1B-A32攤位),照舊賣$380。

Read more ›

司徒劍僑操刀《古惑仔》封面 你估大梵定李成克瓜柴?
by / on 12/07/2019 at 7:34 pm

司徒劍僑操刀《古惑仔》封面 你估大梵定李成克瓜柴?

奉牛佬諭,今期第2251期《古惑仔》由司徒劍僑操刀封面,因為「好有動畫味道」關係,懇請大家買三本支持,之後影張相掟上網,就有機會攞到今期封面草圖。And,睇完今期,我個心有啲慌,因為最尾一頁寫明「兩個,只能活一個」,二死一,我估今次打柴嘅係大梵,原因有二,一,大梵呢個金蒙空已經寫到有啲老,無乜發揮機會,家陣出親場都係幫陳浩南打交,照計錢佢有,名佢有,勢力佢都有,無乜理由劑劑都肯做陳浩南陣前卒,睇嚟牛佬有少少似唔知點處理呢個角色咯;二,我的私心,我鍾意李成克多啲,計人物性格,佢有血有肉啲,角色立體啲,同埋,有佢,先有機會見到九尾狐出場,而我,係幾Like九尾狐呢個角色嘅,因為畫得好索。

Read more ›
何志文操刀《古惑仔》封面 多謝牛佬送彩圖
by / on 04/07/2019 at 8:51 pm

何志文操刀《古惑仔》封面 多謝牛佬送彩圖

今期第2249期《古惑仔》封面由何志文操刀,畫到陳浩南斯斯文文咁,我覺得好正,志文仲喺自己面書分享落色過程,大家有興趣嘅可以Click入去睇睇。咁老例喇,買三本今期《古惑仔》,影張相放上面書,就有機會得到呢期封面彩圖,多謝牛佬先。

Read more ›
Show三本《古惑仔》 Man僧超強A3伊健封面畫
by / on 21/06/2019 at 7:26 pm

Show三本《古惑仔》 Man僧超強A3伊健封面畫

今期第2245期《古惑仔》封面,係絕對靚到啪啪聲嘅,Man僧手畫真係無得頂,有網友話靚到直頭唔捨得拆包書膠袋。一如以往喇,買三本今期《古惑仔》,影張相,放上面書,即有機會得到呢個伊健A3封面畫。學牛佬話齋,搵個相框裱起佢,應該會好型,很想要吧?

Read more ›
繼續多謝牛佬!Show三本《古惑仔》送A3封面畫!
by / on 18/06/2019 at 9:15 pm

繼續多謝牛佬!Show三本《古惑仔》送A3封面畫!

今期第2244期《古惑仔》,請繼續買三本支持牛佬,因為同上次玩法一樣,只要喺面書展示三本2244期《古惑仔》嘅相片,就有機會得到今期封面伊健A3畫。順帶一提,下期輪到Man僧操刀封面,繼續畫伊健,繼續咁高質呀喂。

Read more ›