fbpx

Tag: 漫本

《山海逆戰》App版快過實體書 港漫迷條氣唔順

《山海逆戰》App版快過實體書 港漫迷條氣唔順

漫畫App「漫本」有免費《山海逆戰》睇唔係新聞,但今期第八期實體書未見街,App居然已經開始連載,雖然唔係完整一期內容齊晒,但對於先App版後實體書呢個做法,唔少港漫迷條氣都好唔順,紛紛留言──Daniel Dan Long:「咁唔使買啦…」、桑比:「做壞市先驅~不知所謂。完全冇尊重及重視過本地讀者。我支持龍少,但對此做法非常反感。」Chi Man Chan:「如果佢一早講明,網上版優先,比錢既遲小小都仲好,好過而家咁吾聲聲咁出,肉酸有餘。其望佢再跌書,等佢分清楚,網上版,銷售版邊樣對佢重要啲,如果跌到5000書都仲可以出到既,咁就網上版先行,我都非常樂意,但就吾好話跌書而加價,呢啲係抵死。」、唐龍:「我覺得網上舊錢應該很大,否則已書銷量應該圍唔到皮?」我呢,老實,雖然都係龍少死忠,雖然都會照買書,但對於App版快過實體書出籠,都有少少不是味兒。其實點解要咁做呢?龍少,真心Mode,咁做,對於我等期期真金白銀科水嘅港漫迷,真係有啲……氣餒。

Read more ›

《山海逆戰》「漫本App」同步連載 始終唔及實體書

《山海逆戰》「漫本App」同步連載 始終唔及實體書

有買《山海逆戰》創刊號嘅讀者,都應該知道此書會喺「漫本」App同步連載,我估或者邱福龍計過度過,反正明知敵不過侵權盜版,所以索性擺上網任人免費睇,好歹可以收番網站一筆。會唔會影響實體書銷路,出多十期八期自有定論,而我呢,就實在頂唔上篤住個Mon睇港漫。個人意見,不喜勿插,一,唔明點解要同步連載,唔驚流失班真金白銀畀錢買實體書嘅讀者?遲三五七期先開始連載會唔會好啲?二,用手機直屏睇,圖畫顯得太細,要篤來篤去放大縮小,用橫屏睇咩,好多大圖又出唔晒,好唔方便;三,為咗遷就屏幕大小,旁白字大粒咗,格數密嘅頁數,就予人感覺字多過畫;四,旁白字大粒咗,又無可免地要移位,好破壞每一格圖畫嘅原來美感;五,最攞命嘅係,真心Mode唔鍾意殘體字,都完全唔係港漫Feel。As a conclusion,實體書先係我杯茶,廿蚊,我會照畀,上網睇?No way。

Read more ›
牛佬《金蒙空》終於面世 網站「漫本」篤住睇

牛佬《金蒙空》終於面世 網站「漫本」篤住睇

唉,唔知好消息定壞消息,剛剛先有時間睇今期第1969期《古惑仔》,牛佬喺「古惑仔俱樂部」留言曰:「我哋和平又一新作《金蒙空》,亦將會喺『漫本』推出!呢套嘢,係講泰拳擂台嘅勵志故事,有興趣嘅朋友,亦不妨上去『漫本』網站睇睇!不過未係而家,過多兩個禮拜左右啦!套稿,幾正架!」喜嘅係講咗N年嘅《金蒙空》終於面世有期,悲嘅係又要篤住個Mon聞住機睇,無得實甩甩拎上手左揭右揭,感覺真係唔多好。跪求牛佬,下次出新作,可唔可以出番實體書呀?我知風險好大,但事在人為,斷估實有計嘅啫。

Read more ›
悲!《Bloody Girl》改編成電影!唔出實體書!

悲!《Bloody Girl》改編成電影!唔出實體書!

大家有無睇喺漫畫app「漫本」連載嘅《Bloody Girl》?依家已經連載到第四十六回,我有追開,習慣臨訓攤喺床睇番半粒鐘,一次過連睇幾回,感覺好正。得知《Bloody Girl》會改編成電影,咁出唔出實體書呢?好可惜,牛佬喺第1968期《古惑仔》嘅「Cowman Msg」畀咗答案:「嗯…..可以肯定講句:『唔會!』因為香港嘅實體出版市場,已經返魂無術。主要問題係──租金不斷上漲,試問邊有報攤同書屋呢?所以,自己定咗──就算第日有乜新嘢推出,都會喺網站嗰邊想法子。」聽到呢個消息,我都幾欷歔吓,其實我真係想當面問牛佬,唔出薄裝周刊,咁出類似依家嘅復刻珍藏本得唔得?印少啲,賣貴番些少,包裝精美啲又好收藏,真係無得諗?至於散貨問題,誇啲講句,如果有心捧場嘅,直接上「和平」攞書都仲得,順便見埋牛佬攞埋簽名再影埋相,到時仲開心喇。喂,牛佬,諗諗佢吖。

Read more ›
撐「漫本」App  攞正牌上網睇港漫

撐「漫本」App 攞正牌上網睇港漫

上網睇盜版漫畫係唔啱嘅,要睇唔該睇「漫本」,攞正牌,睇得光明磊落。呢個打住「華人原創漫畫發行平台」嘅漫畫網站剛剛出埋App,我下載咗,感覺好有親切感,因為裡面有我哋熟識嘅港漫,牛佬《血崩女》、馬遜《蘇生戰銃》、司徒劍僑《再造空間》同雪晴《我和天師有個約會》都係必睇之選。介面方面,顏色望落舒服,操作簡單,都係分「排榜行」、「已完成」、「搞笑」、「奇幻」、「熱血」、「懸疑」、「格鬥」、「恐怖」、「魔幻」、「勵志」、「校園」、「愛情」、「日常」、「戰爭」等子項目,好易搵。唯一要挑剔係某啲漫畫用殘體字,同埋要縮放圖片睇漫畫,手指好疲,或者遲啲慣咗會好啲。

Read more ›
有片:牛佬/司徒劍僑/馬遜作品連載「漫本」網站 YouTube有片睇

有片:牛佬/司徒劍僑/馬遜作品連載「漫本」網站 YouTube有片睇

之前都有介紹過嘅漫畫網站「漫本」,有好多港漫作品連截,包括牛佬《血崩女》喇、馬遜《蘇生戰統》喇、司徒劍僑《再造空間》喇等等等等。我梗係知,我梗係明,無得實甩甩拎上手睇,感覺硬係差減啲,但呢幾套都係暫時無出實體書嘅高質港漫,絕對值得大家望望。而為宣傳,牛佬、馬遜同司徒劍僑都係YouTube放咗宣傳短片,用圖稿加文字略略簡介故事講乜,都係嗰句,支持港漫,Look Look無壞。

Read more ›

撐港漫人!馬遜《蘇生戰銃》網上免費睇!

撐港漫人!馬遜《蘇生戰銃》網上免費睇!

之前本網站介紹過嘅免費漫畫網站「漫本」,最新有馬遜《蘇生戰銃》連載,暫時只出咗兩章,尚在鋪緊伏線階段,公仔雖然日漫風咗啲,但睇慣港漫嘅死忠Fans一定接受得到,古仔鋪排得唔錯,雖然暫時只係出咗不知名紅眼主角、調銃師佳格師傅、坦克車積達頓同戇居居兩兄妹,但吸引到人睇落去,我自己就好想知何謂不停戰鬥嘅「蘇械」,第三章應該交代到來龍去脈,好有追看性。但都係嗰句,唯一要挑剔嘅係用殘體字,兼如果全部頁數都係彩色,咁就100分咯。

Read more ›
漫本網站 牛佬《Bloody Girl》、司徒劍僑《再造空間》、雪晴《我和天師有個約會》、馬遜《蘇生戰銃》免費睇

漫本網站 牛佬《Bloody Girl》、司徒劍僑《再造空間》、雪晴《我和天師有個約會》、馬遜《蘇生戰銃》免費睇

紙媒沒落,上網睇漫畫係大勢所趨,「漫本」呢個網站大家可以留意吓,因為有我哋熟識嘅香港漫畫家參與,牛佬《Bloody Girl》、司徒劍僑《再造空間》、雪晴《我和天師有個約會》、楊孝榮《玄蟬說》、楊懷濱《暗界追冥狩》已經可以「立即閱讀」,而馬遜《蘇生戰銃》、曉君《鍾馗森林》、黃俊維《百辰劍》同陳漢明《陰陽宅急便》就「等待中」,各附故事簡介。我Click過入去睇,好唔好睇就好個人口味,但解像度奇高睇得舒服絕對係事實,免費漫畫嚟講算真真不俗,硬要挑剔的話,用殘體字我有少少唔Like囉。總括嚟講,呢個網站值得加入「書籤」,期待有更多香港漫畫家加入。

Read more ›