Tag: 洪興

《古惑仔》陳耀評洪興歷屆龍頭 陳浩南最佳?

《古惑仔》陳耀評洪興歷屆龍頭 陳浩南最佳?

就快完嘞,去到尾聲嘅尾聲嘞,今期第2332期《古惑仔》講到梁家仁正式成為洪興龍頭,喺登基大典上拉開布幕,背藏一張陳浩南大頭照,莫非遺照乎?唔通我其實係估啱,死嗰個係陳浩南,跌落海嘅立花正仁最後救得番?呢Part劇情要讚一讚牛佬,究竟邊個死?係好吊到讀者癮嘅,亦造就我同同事嘅一餐飯輸賭。But,陳耀評歷任洪興龍頭一幕,我卻不敢苟同,陳耀評蔣天生聰明但自私,合理;評韓賓淨係識得睇住盤數同發老脾,唔覺;評陳浩南咁多屆龍頭當中算係最好,十萬個不同意。係陳浩南黐埋Baby炒股兼揩粉,先搞到洪興沉淪,福田一役八壯士係俾佢直接累死嘅;聯同二代覆灼地中海,搞到伊文華盲眼;話保住二代,點知世飛俾金尊貴劈開兩半、李志高變跛仔;為咗個仔游子健安全,居然戇居居走去同韓賓爭龍頭,差啲令社團分裂;Last一劑就更加無厘頭,無端端傾盡社團之力挑戰江湖黑道一哥之位,又係害死唔少兄弟之舉,分分鐘搞到賽雅要守寡。如果咁都配稱好龍頭,無話可說。唔知大家又點睇?

Read more ›

想哭!牛佬都諗唔到嘅《古惑仔》情節上演!

想哭!牛佬都諗唔到嘅《古惑仔》情節上演!

擒晚嬲到訓唔著,不斷Loop面書Loop到凌晨四點,越Loop越激心,我差啲想哭。訓醒,落街買公仔書,擺低$23畀書報攤老闆娘後,我喺心裡面講咗一聲:「多謝牛佬。」多謝牛佬站喺雞蛋一邊,不過我諗牛佬點叻諗橋都好,都諗唔到現實世界會發生暴徒入港鐵車廂無差別打市民、細路、大肚婆咁荒謬嘅情節。今期第2254期《古惑仔》封面,好明顯係回應緊上個禮拜新城市廣場困獸鬥,But今日周一書見街,呢個封面已經Out。Out得很快,因為情況變得更壞。書裡面九紋龍對狐狸一戰,講皇氣借故推撞記者,喺現實世界係真嘅;東英同洪興兩瓣古惑仔驚皇氣作鳥獸散,喺現實世界卻係假嘅,因為……不解釋,亦唔使解釋,大家有眼睇。天佑香港,香港人加油。

Read more ›
牛佬《古惑仔》又抽水 估唔到十三妹投陳浩南一票

牛佬《古惑仔》又抽水 估唔到十三妹投陳浩南一票

畢竟係三日刊,係有啲拖橋架嘞,但牛佬係好嘢嘅,喺適當時候抽水,再加一個估你唔到嘅三百六十度扭上扭上扭橋,成本公仔書即刻生猛番晒,追看性大大提高。今期第2197期《古惑仔》,我幾鍾意「洪興」白紙扇陳耀戙出嚟主持公道一幕,佢認為投票選老頂應該嚴肅處理,程序要均真,話:「最起碼,唔應該學似我哋特區選特首咁樣亂咁嚟,係咪咁講呀?」直頭係咁講喇,唔知「好打得」同一班高官睇完有無感想呢?又,最尾一格,十三妹居然調轉槍頭投陳浩南一票,激到韓賓死死吓,呢下真係估牛佬唔到,唔通十三妹、陳耀同陳浩南老早串通埋?為免被臥底浩然指證,夾硬扯韓賓下馬,由南哥一個人頂晒?

Read more ›
《古惑仔》巨星之戰競猜遊戲 估洪興同三聯五比五平手收場

《古惑仔》巨星之戰競猜遊戲 估洪興同三聯五比五平手收場

《古惑仔》三聯對洪興嘅巨星之戰正式開打,男一陳浩南戰牛姑,一開波牛姑就處於劣勢。為煲大呢壇大戰,牛佬搞咗個「巨星之戰競猜遊戲」,邊個估中十場對戰勝出者,即送「得奬者本人與陳浩南一起的彩畫一張」,獨一無二親筆畫,正呀喂,截止日期5月27日午夜12時正。我呢,就咁估,頭場陳浩南險勝、第二場李成克慘勝、第三場何小海勝迪文死、第四場甘尚武大勝、第五場北正恩使詐勝、第六場加藤二勝小馬死、第七場郭秀青勝、第八場立花正仁勝天川秀死、第九場佐維極速勝、第十場大梵完勝亞披勒死,結果係五比五打成平手,廃後輪到金尊貴出場執死雞,唔知估唔估得中呢?

Read more ›
讀者熱烈討論 《古惑仔》牛姑使唔使死?

讀者熱烈討論 《古惑仔》牛姑使唔使死?

今期第2098期《古惑仔》書名真係何其浪漫與悲壯,叫〈我死也為了她!〉,「她」指潘少枝,為佢死嘅係牛姑。故事講到三聯九尾狐同建興擺局,搞到洪興李志高同牛姑無端端打餐死,牛姑寡不敵眾,攬住自己個女人瘋狂捱斬。畫到呢段,網民熱烈討論牛姑使唔使死,我呢,就認為唔會,一,每逄一個重要角色死,牛佬都或多或少會喺自己專欄事先張揚,今次唔覺;二,牛姑應該仲有大把戲可以寫,佢應該係激起三聯同洪興鬥個你死我活嘅催化劑,呢個催化劑暫時好明顯未用盡;三,都未見牛姑嘅「往事回憶」,所以應該未死得住。執筆至此,我反而有個不祥預兆,唔知點解,我覺得李志高反而會打柴,仲要死得好無厘頭嗰隻,希望估錯喇。

Read more ›
《古惑仔》送武神太子海報 有埋洪興+三聯權力排行榜好抵睇

《古惑仔》送武神太子海報 有埋洪興+三聯權力排行榜好抵睇

三個開心,今期第2059期《古惑仔》送武神太子海報,製作精美就梗,難得背頁有埋洪興同三聯權力排行榜,榜裡面有好多新名字,睇個勢遲啲應該有好多新角色出場,咁先似番早期《古惑仔》描寫嘅大江湖嘛,此乃第一個開心;映姐同丁瑤結義金蘭一段文戲,畫得好密格,對白處理同分鏡亦精彩,埋尾趙繼邦仲出動埋久違了的Q版畫法添,真係好耐未見過咯,此乃第二個開心;第三個開心係,專欄強化咗,多咗海報同連載小說《飛女正傳》,成本公仔書即時紮實襟睇咗,我足足睇咗四個地鐵站先睇完,幾耐未試過呀大佬,抵讚呀牛佬。

Read more ›

《古惑仔》哀傷一期!別矣世飛!別矣趙縈!

《古惑仔》哀傷一期!別矣世飛!別矣趙縈!

雖然老早知道結果,但真正睇到徐世飛同趙縈一齊陣亡,個心著實好罨,今期第2001期《古惑仔》,我反覆睇咗三次,逐頁慢慢揭慢慢睇,真係好唔捨得呢個洪興二代離我而去。初初都有少少俾今期書名〈自盡〉Fake一Fake嘅,以為趙縈為情自殺,卻原來係坤丁瑤埋身諗住劈死老母,可惜最後俾金尊貴一把飛刀穿頭而亡。推測牛佬之所以整死徐世飛,全因要製造洪興同東英兩幫開Band嘅導火線,順便攬埋丁瑤上路,睇怕呢輯「滅東英」都會死得人多,到時又唔知有幾多主要角色打柴,嘩,諗吓都寒一寒。

Read more ›

《古惑仔》立花正仁正式復出 同雷霆有仇?

影埋相,先表明我有真金白銀撐牛佬先。喺我心目中,今期第1872期《古惑仔》係個里程碑,因為正式宣佈立花正仁翻生復出,劇情則講到雷霆俾東英四虎扑濕,受傷休息發夢,夢見立花正仁追殺自己,嚇到扎醒。睇個勢,牛佬好似設定佢同雷霆一早有仇咁,但初初佢哋兩個喺富士山偶遇,好似好有偈傾咁噃,究竟乜葫蘆賣乜嘢藥呢?而雷霆力溝山下詩織,即係等同辣著甘尚武,亦即係等同向成個洪興挑戰。大抵,之前佈下嘅伏線開始收番埋一齊嘞,尚欠下期一條──陳浩南遇立花正仁,唔知浩南哥會唔會誤會佢係山下忠秀呢?

Read more ›

牛佬創新猷 內文格仔喪插盜版

每個禮拜要起兩期書,個腦幾叻都會靈感枯竭,所以我係真心Mode佩服牛佬嘅,久唔久就整啲新花款,留住讀者心之餘,仲成功引起話題。今期第1827期《古惑仔》牛姑重出江湖固然係重點,但都唔夠喺內文格仔裡面標字托底咁養眼──「內地網站刊登之《古惑仔》全屬未經授權之盜版上載」、「上載盜版損人利己,創作行業快將滅亡」、「全國盜版閪網大追查:動漫屋、在綫漫畫、極速漫畫」啱架,睇盜版漫畫實屬賊仔所為,應該予以強烈譴責,呢鋪我撐牛佬架。另外,今期亦登咗幾頁「千人對決」精彩片段,亦惹嚟「古惑仔俱樂部」會員熱烈討論,鬼咩,睇個勢好似想摺埋徐世飛咁,九尾狐又疑似死喺佐敦仔懷內。講真,呢兩個角色我都好Like,牛佬手下留情,唔好整死佢哋呀。

Read more ›

《古惑仔》送甘尚武海報

時間過得好快,話咁快洪興新一代海報已經送到第四張,第1824期《古惑仔》送太子之子甘尚武海報,構圖同之前三幅無乜分別,都係低炒視角,肢體動作都係凌空飛身劈友。儲開嘅,梗要儲埋禮拜四最後一張徐世飛海報啦,到時集齊五張,攤開一齊睇都咪話唔型棍。

Read more ›

《古惑仔》送海報 伊文華擔正

讚一讚先,今期第1822期《古惑仔》封面真真不俗,三聯龍頭佐敦仔有幾可做封面吖,又畫得佢幾有智慧喎。仲有一樣嘢想讚,黑白灰呢個Tone好蝦人用,公仔書唔落色好易分唔清邊個打邊個,家陣一眼就睇得出係畫緊佐敦仔,都要畀Like。言歸正傳,今期送綽號「鬼刀華」嘅伊文華海報,係畫得好靚嘅,用色同構圖都係高水準之作,不過好多網友都話涉嫌抄襲。抄邊個?啲姿體動作好似《進擊之巨人》喎,似唔似就真係見仁見智嘞。下期送邊個洪興新一代呢?有啲期待添。

Read more ›

加入古惑仔俱樂部 做洪興新一代打不死門生

買咗今期《古惑仔》未呀?講咗個幾月嘅古惑仔俱樂部終於有定案,如果大家想定候親親牛佬的話,唔該快啲申請做會員喇。會員分「普通」同「尊貴」兩種,前者會費$180,後者$500,兩者福利相若,都係限時限候有聚餐、買精品有九折等等,不過尊貴會員有樣好玩嘢,就係一經申請成功,就可以自己開名創作一個角色,成為洪興新一代梁家仁、徐世飛、甘尚武、李志高或者伊文華門生,牛佬仲Promise喺會籍期內唔會整死角色,諗落都幾過癮。唔,我想跟獨眼伊文華呀……至於角色……就叫番尉遲一喇。

Read more ›

有片:《古惑仔回憶錄3》戰神輓歌 太子的一生

食老本唔係罪,讀者如我最鍾意吹公仔書經,牛佬醒,久唔久就出片Recall吓讀者回憶,今次《古惑仔回憶錄3》講洪興戰神太子,短短一百幾十字「曾經有一位戰神,在香港黑道呼風喚雨,為亡友,押下所有與敵人開戰,甚至與龍頭抗衡;為兄弟,可拋下妻兒,犧牲性命。這個位高權重的江湖大佬,卻對武學迷戀非常,與其說他是一位江湖人,倒不如說他是一位武學宗師……讓我們回顧一下這位英雄光輝的一生,向這位對武學孜孜不倦的巨人──太子致敬。」總括呢個尖東揸Fit人一生,睇番,真係好欷歔呀,如果太子仲在生,你話幾好呢?

Read more ›