記得牛佬講過除咗《古惑仔》外就唔多睇其他漫畫，咁呢一輩漫畫家又睇唔睇嘅呢？如果睇，又睇邊類型漫畫多呢？想知，可以留意面書專頁「格子」即將推出嘅Podcast《漫畫家睇啲乜》。暫定連續四個禮拜五開Band，1月15日嘉賓有葉偉青、Jack Lee、Man僧；1月22日嘉賓有姚希麟、YANAI、周小某、柳廣成；1月29日嘉賓有草日、江記、黎達達榮；2月5日嘉賓有阿柱、肥佬、Walter from童創文化，請大家多多捧場。

柳廣成好多搞作，嚟緊又同PTstudio片糖工作室合辦《不怕沾濕毛髮 因能與你暢游》展覽。展覽主題係喵星人，有一系列小貓阿公同金魚遊玩的幻想之作，奴才們肯肯定啱睇。睇啱邊幅畫，仲可以即場落訂買番件衫，片糖工作室會幫你搞埋絲印，14日後取貨，每件$328。

Firstly，要講番，我有心撐柳廣成架，But撐唔到。話說上周我有去旺角RaiderHK睇《紙本石墨：深邃之境》展覽，但實在太多人，排隊排到出樓梯，而樓梯又完全密封，抖唔到氣兼流汗流到自己都驚，所以排咗十分鐘頂唔住閃人。Fortunately，柳廣成仲有個《Fantaisie Ordinaire》漫畫原稿展，今次選址香港藝術中心，地方一定夠大嘞啩，我一定會捧番場。入正題，介紹少少背景資料先，《Fantaisie Ordinaire》係柳廣成新漫畫，全書近100頁，講嘅係「一男一女在歐洲小鎮相約見面的故事」，之前喺法國同比利時書店發售，依家由香港藝術中心獨家發售。更巴閉嘅係，除咗展覽，柳廣成仲會搞個「現場繪畫+音樂表演」Event，睇展覽聽音樂二合一，我未見識過，好有興趣體驗吓。

很羨慕畫得一手好畫之人，如柳廣成，其鉛筆畫真係非常高質。佢搞咗個《紙本石墨：深邃之境》漫畫原稿展，何謂「深邃之境」？佢話：「紙張厚不過0.1毫米，卻能挖掘深度；固體的石墨滲不透紙張纖維，卻能渲染意境，是為深邃之境。」Fine，我決定親臨現場聞畫，Feel吓有幾深邃至得。同場有聯乘@RaiderHK合作推出嘅Tee、海報、Postcard同Sticker售賣，請大家多多支持。

齋睇封面，《Comic O》Vol.4同之前三期風格好唔同，今期主題係「未來日常」，作者有姚希麟、木田東、彭康兒、Adam Pun、蚊張、柳廣成、卓翹、姜智傑同黎達達榮。留意番，7月11日會有首賣簽名會，之後會喺書展繼續售賣，普通版$98，另有手繪簽名版$480，請大家多多支持本地創作。