fbpx

Tag: 林國魂

《火武耀揚》巨咪三頁高三吋 佳哥復出歸邊赤柱同盟

《火武耀揚》巨咪三頁高三吋 佳哥復出歸邊赤柱同盟

《火武耀揚》呢幾期劇情都好緊湊吓,隨住林國魂迫到一哥要放重犯出監,華興會同赤柱同盟啲大佬輩正式交鋒。不過可能連邱瑞新都緊張過頭,搞到今期第964期旁白出錯呀喂。第六頁第一格寫「六尺三寸巨霸身軀,力貫精鋼──橫掃千軍!」第九頁第一格卻寫「巨咪六尺六寸,比自己還要高大健碩的怪獸,連巨咪也震驚!」三頁之間,巨咪竟然高咗六吋?哈哈,當然係手民之誤喇,下次要小心啲喇。另,埋尾都有個高潮位,赤柱同盟有個光頭佬出場,無記錯的話,應該係以前拜鐵紅門下嘅光頭幫一員,叫佳哥,但衰乜入冊呢,我就真係唔記得咗咯。

Read more ›

邱瑞新加價 《火武耀揚》+《火紅年代黑骨棠》賣$19

邱瑞新加價 《火武耀揚》+《火紅年代黑骨棠》賣$19

《火武耀揚》同《火紅年代黑骨棠》拖到依家先加價,算係咁咯,每本加到$19,同《鐵將縱橫》看齊。加價原因,「瑞新週記」咁話:「講真!對仍然熱情捧場又出錢購買嘅讀者而言,向你地爭取每期多兩蚊使費,對你有點不公,而我有點慚愧!但喺讀者人數不變,而銷路變嘅情況之下,瑞新無奈地無其他方法,我唯一可以做到嘅係更加俾心機,更加倍用心創作,回饋最好嘅港漫娛槳俾讀者朋友們。」其實計我話,兩蚊直頭加得少喇,估計真心讀者唔會為呢區區兩蚊而放棄捧場,努力加油喇瑞新。不過話時話,小弟有一個問題,點解第865期《火武耀揚》期名咁特別嘅?《雲中 霧中 霜雪中》下面,仲有小字寫住「青雲Sir被林國魂邗教魅力感染」,植錯字?唔覺意當期名一齊出咗?有無人答到我?

Read more ›
《火武耀揚》林國魂導神通跳樓 單鳳唔係死咗咩?

《火武耀揚》林國魂導神通跳樓 單鳳唔係死咗咩?

一連兩期《火武耀揚》交代神通之死,睇到我個心都有啲Up,始終佢係「江湖戰將」而非一般二打六角色,感性啲講,陪伴咗我都三五七年,又焉能不傷感?呢兩期故事,我有彈有讚,要讚嘅係上期,用大篇幅交代林國魂點樣靠把口導神通自殺,唔使下下刀刀槍槍,呢條橋幾新穎,又話見到鬼魂又話毫無做人樂趣諸如此類,最後用亡妻糖心迫死江湖巨人,情節雖然誇張咗啲,但總算無犯駁;要彈嘅係今期,神通出殯,黑道白道幾畀面都好,都無可能行國家元首級喪禮啩?埋尾講青雲Sir,我有啲疑問,單鳳唔係死咗架咩?記憶中佢斬完人被捕訓醫院,暴力王曾經叫律師交個蓋掩畀佢,暗示要佢自殺,唔通我記錯咗?

Read more ›